បាតុកម្មប្រឆាំងស្ថានទូតវៀតណាមផ្ទុះឡើងជាថ្មី បើទោះបីជាអាជ្ញាធរហាមឃាត់
បាតុកម្មប្រឆាំងស្ថានទូតវៀតណាមប្រចាំនៅកម្ពុជា បានផ្ទុះឡើងសាជាថ្មីនៅព្រឹកថ្ងៃទី៤ខែតុលានេះ។ ជាបាតុកម្មនៅថ្ងៃទីមួយ នៃគម្រោងបាតុកម្មរយៈពេល៥ថ្ងៃ ដឹកនាំដោយសហគមន៍ខ្មែរកម្ពុជាក្រោម និងសម្ព័ន្ធយុវជនខ្មែរដើម្បីប្រជាធិបតេយ្យ។ នៅថ្ងៃទី១នៃបាតុកម្មនេះ ក៍មានការប៉ះទង្គិចគ្នាមួយប្រាវផងដែរ ខណៈដែលកំហឹងរបស់បាតុករបានឈានដល់ការដុតទង់ជាតិរបស់ប្រទេសវៀតណាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
បាតុកម្មនៅតែបន្តធ្វើ ល្គឹកណាមន្ត្រីស្ថានទូតវៀតណាមប្រចាំនៅកម្ពុជា មិនចេញមុខមកសុំទោសចំពោះប្រជាពលរដ្ឋខ្មែរ។ នេះបើតាមការប្រកាសរបស់លោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម ដែលបានដឹកនាំបាតុកម្មនៅមុខស្ថានទូតវៀតណាមនៅថ្ងៃសៅរិ៍ទី៤តុលានេះ។ លោក ថាច់ សេដ្ឋា បានថ្លែងថា "ក្រុមបាតុករបានទុកពេលច្រើនមកហើយ ដើម្បីអោយរដ្ឋាភិបាលវៀតណាមសុំទោសនិងទទួលស្គាល់ការពិត។ ក្នុងនោះរាប់ទាំងការ ដាក់ញត្តិ និងធ្វើបាតុកម្មផងដែរ តែរដ្ឋាភិបាលវៀតណាមនៅតែមិនឆ្លើយតប។ ដូច្នេះបាតុកម្មនៅថ្ងៃនេះ យើងមិនបានដាក់ញត្តិទៀតនោះទេ តែយើងនឹងទាមទារអោយរដ្ឋាភិបាលវៀតណាមចេញមកសុំទោសតែម្តង"។ នេះបើតាមការបញ្ជាក់បន្ថែមរបស់ លោក ថាច់ សេដ្ឋា នៅចំពោះមុខហ្វូងបាតុករដែលកំពុងមានកំហឹងរាប់រយនាក់។ បាតុកម្មបានឈានដល់ការដុតទង់ជាតិប្រទេសវៀតណាម នៅប្រមាណជាម៉ោងជាង១១ព្រឹក ខណៈដែលមន្ត្រីស្ថានទូតវៀតណាមប្រចាំនៅកម្ពុជា នៅតែមិនអើពើ ទៅនឹងបាតុកររាប់រយនាក់ដែលស្ថិតនៅខាងក្រៅរបងស្ថានទូតវៀតណាម ដែលការពារបន្ថែមដោយរបាដែករបស់ប៉ូលីសស្ទើរពេញមួយកំណាត់ផ្លូវមុខស្ថានទូតវៀតណាម។
ការធ្វើបាតកម្មថ្ងៃនេះ មិនមានការអនុញ្ញាតពីសាលារាជធានីភ្នំពេញនោះទេ ដោយអាជ្ញាធរបានអនុញ្ញាតអោយធ្វើនៅថ្ងៃទី៧តុលា នៅទីលានប្រជាធិបតេយ្យ ដោយមិនអោយមានការហែក្បួននោះទេ។
នៅក្នុងការធ្វើបាតុកម្ម ប្រឆាំងវៀតណាមកាលពីព្រឹក ក្រុមបាតុករ ក៍បានទម្លាយរបាំងដែក របស់សមត្ថកិច្ច ដែលដាក់ការពារសុវត្ថិភាពស្ថានទូត ដែលនាំអោយមានការប៉ះទង្គិចគ្នាមួយប្រាវ តែបានស្ងប់ស្ងាត់ទៅវិញ។ នៅក្នុងការដឹកនាំបាតុកម្មនៅថ្ងៃនេះ លោក ថាច់ សេដ្ឋា ក៍បានអំពាវនាវអោយប្រជាពលរដ្ឋខ្មែរធ្វើពហិការឈប់ប្រើប្រាស់ទំនិញមកពីប្រទេសវៀតណាមផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ