ប្រវត្តិសង្ខេបរបស់លោកហូស្នី មូបារ៉ាក់
លោកហូស្នី មូបារ៉ាក់ (Hosni Moubarak) គឺជាប្រធានាធិបតី ដែលកាន់តំណែងយូរជាងគេបំផុតនៅអេហ្ស៊ីព្ទ។ ដោយមានការគាំទ្រពីសំណាក់កងទ័ព លោកមូបារ៉ាក់បានកាន់អំណាច ដោយប្រើកណ្តាប់ដៃដែក រយៈពេល ៣០ឆ្នាំ ដោយបានបង្រ្កាបគ្រប់ចលនាប្រឆាំងទាំងអស់ មុននឹងត្រូវធ្លាក់ពីអំណាច ដោយចលនាបាតុកម្មប្រឆាំង។ តើលោកមូបារ៉ាក់ មានប្រវត្តិបែបណា?
ចុះផ្សាយនៅថ្ងៃ៖
ការពន្យល់របស់សេង ឌីណា
លោកមហាមេដ ហូស្នី មូបារ៉ាក់ មានអាយុ ៨២ឆ្នាំ។ លោកមានដើមកំណើតចេញពីភូមិតូចមួយ ស្ថិតនៅក្នុងតំបន់ដីសណ្ដទន្លេនីល។
ក្រោយពីបានបញ្ចប់ការសិក្សានៅវិទ្យាល័យ លោកមូបារ៉ាក់បានចូលបម្រើក្នុងជួរកងទ័ពអេហ្ស៊ីព្ទ ហើយបានបញ្ចប់ការសិក្សាពីបណ្ឌិតសភាយោធាអេហ្ស៊ីព្ទ នៅឆ្នាំ១៩៤៩។ ចាប់ពីពេលនោះមក លោកមូបារ៉ាក់បានឡើងឋានៈជាបន្តបន្ទាប់ រហូតដល់ក្លាយទៅជាមេបញ្ជាការកងទ័ពជើងអាកាស និងជាអនុរដ្ឋមន្រ្តីការពារជាតិ នៅឆ្នាំ១៩៧២។
ក្នុងឋានៈជាមេបញ្ជាការកងទ័ពជើងអាកាស លោកមូបារ៉ាក់ ត្រូវបានគេទទួលស្គាល់ថាមានស្នាដៃល្អ នៅក្នុងពេលធ្វើសង្រ្គាមជាមួយអ៊ីស្រាអែល នៅឆ្នាំ១៩៧៣ ដែលគេឲ្យឈ្មោះថា “សង្រ្គាមគីពួរ”។ ពីរឆ្នាំក្រោយមក (១៩៧៥) ប្រធានាធិបតីអេហ្ស៊ីព្ទ គឺលោកអេល សាដាត (el-Sadate) បានតែងតាំងលោកហូស្នី មូបារ៉ាក់ ជាអនុប្រធានាធិបតី។
ក្នុងឋានៈជាអនុប្រធានាធិបតីអេហ្ស៊ីព្ទ លោកមូបារ៉ាក់បានចូលរួមចំណែកក្នុងការចរចាជាមួយអ៊ីស្រាអែល រហូតដល់បានចុះកិច្ចព្រមព្រៀងសន្តិភាព នៅឆ្នាំ១៩៧៩។ នៅឆ្នាំ១៩៨១ ប្រធានាធិបតីសាដាត ត្រូវបានធ្វើឃាតដោយក្រុមអ្នកប្រឆាំងនឹងកិច្ចព្រមព្រៀងសន្តិភាពជាមួយអ៊ីស្រាអែល។ លោកហូស្នី មូបារ៉ាក់ ក៏បានឡើងមកកាន់តំណែងជាប្រធានាធិបតីអេហ្ស៊ីព្ទ។
នៅពេលនោះ មនុស្សភាគតិចណាស់ ដែលប្រមើលឃើញថា លោកមូបារ៉ាក់អាចកាន់តំណែងបានយូរ ពីព្រោះ កន្លងមក គាត់មិនមែនមនុស្សចេញមុខចេញមាត់ ហើយមិនសូវមានប្រជាប្រិយភាព ទាំងក្នុងប្រទេស និងនៅលើឆាកអន្តរជាតិ។ ក៏ប៉ុន្តែ តាមរយៈជំហរការពារកិច្ចព្រមព្រៀងសន្តិភាពជាមួយអ៊ីស្រាអែល លោកមូបារ៉ាក់ក៏បានទទួលការគាំទ្រយ៉ាងពេញទំហឹងពីសំណាក់សហរដ្ឋអាមេរិក។ សម្រាប់អាមេរិក និងប្រទេសលោកខាងលិច អេហ្ស៊ីព្ទ និងលោកមូបារ៉ាក់ គឺជាសម្ព័ន្ធមិត្តដ៏សំខាន់ នៅក្នុងតំបន់ដើមបូព៌ា។ ជំនួយរាប់ពាន់លានដុល្លារ ត្រូវបានអាមេរិកផ្តល់ទៅឲ្យអេហ្ស៊ីព្ទ ដែលភាគច្រើនជាជំនួយយោធា។
នៅឯក្នុងប្រទេសវិញ ដោយមានការគាំទ្រពីសំណាក់កងទ័ព លោកមូបារ៉ាក់បានប្រើកណ្ដាប់ដៃដែក ដើម្បីបង្រ្កាបគ្រប់ចលនាប្រឆាំងទាំងអស់។ ពេញក្នុងរយៈពេល ៣០ឆ្នាំ ដែលលោកមូបារ៉ាក់កាន់អំណាច អេហ្ស៊ីព្ទត្រូវស្ថិតក្រោមច្បាប់ស្តីពីភាពអាសន្ន។ រាល់ការប្រមូលផ្តុំគ្នា ចាប់ពី៥នាក់ឡើងទៅត្រូវហាមឃាត់ជាដាច់ខាត។ ក៏ប៉ុន្តែ នៅទីបំផុត ច្បាប់ស្តីពីភាពអាសន្ននេះ នៅតែមិនអាចរារាំងចលនាមហាជនរាប់លាននាក់ ដែលងើបឡើងបះបោរ រហូតបណ្តេញលោកមូបារ៉ាក់ចេញពីអំណាចបានសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ