អាមេរិកកាត់បន្ថយទីប្រឹក្សាយោធាសម្រាប់សម្ព័ន្ធមិត្តអារ៉ាប់នៅយេម៉ែន
អាមេរិកបានកាត់បន្ថយចំនួនបុគ្គលិកផ្នែកប្រឹក្សាយោធា ដែលធ្វើការជាមួយសម្ព័ន្ធមិត្តអារ៉ាប់ ដែលកំពុងអន្តរាគមន៍យោធានៅយេម៉ែន។ អាមេរិកប្រាប់ថា ការកាត់បន្ថយបុគ្គលិកនេះ មិនមែនដោយសារជនស៊ីវិលស្លាប់ច្រើននៅយេម៉ែនទេ។ ការកាត់បន្ថយបុគ្គលិក ធ្វើឡើងតែប៉ុន្មានថ្ងៃប៉ុណ្ណោះ មុនទស្សនកិច្ចរបស់ប្រមុខការទូតចន ឃែររី នៅអារ៉ាប៊ីសាអូឌីត ថ្ងៃ២៤-២៥សីហាសប្តាហ៍ក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ការដែលអាមេរិកកាត់បន្ថយចំនួនអ្នកប្រឹក្សាយោធាខ្លួន សម្រាប់សម្ព័ន្ធមិត្តអារ៉ាប់ ដែលកំពុងអន្តរាគមន៍នៅយេមែន មិនមែនដោយសារតែមានជនស៊ីវិលស្លាប់ច្រើននៅយេម៉ែនពេកទេ តែដោយសារអារ់ាប៊ីសាអូឌីត មិនសូវត្រូវការជំនួយពីអ្នកប្រឹក្សាយោធាអាមេរិកច្រើនដូចមុន។ នេះបើយោងតាមការអះអាងរបស់មន្ត្រីទទួលខុសត្រូវយោធាអាមេរិក ថ្ងៃសៅរ៍នេះ។
ចំនួនអ្នកប្រឹក្សាយោធាអាមេរិក សម្រាប់សម្ព័ន្ធមិត្តអារ៉ាប់ នឹងរក្សាអោយនៅតិចជាង៥នាក់ គឺតិចតួចណាស់។ កាលពីមុន អ្នកប្រឹក្សាយោធាអាមេរិកមាន៤៥នាក់ ធ្វើការអោយសម្ព័ន្ធអារ៉ាប់ នៅអារ៉ាប៊ីសាអូឌីត និងបារ៉ែន។
អារ៉ាប៊ីសាអូឌីត គាំទ្រប្រធានាធិបតីយេម៉ែននិកាយស៊ុននីត ម៉ាន់សួ ហាឌី ដែលកំពុងភៀសខ្លួន ក្នុងទឹកដីអារ៉ាប៊ីសាអូឌីត។ អារ៉ាប៊ីសាអូឌីត ដឹកនាំសម្ព័ន្ធអារ៉ាប់ កំទេចក្រុមឧទ្ទាមហ៊ូទី និកាយស្ហ៊ីអ៊ីត។ ក្រុមឧទ្ទាមហ៊ូទីគាំទ្រអតីតប្រធានាធិបតីសាឡេ កំពុងកាន់កាប់ទីក្រុងសាណា និងទីតាំងមួយចំនួននៅភាគខាងជើង។ អារ៉ាប៊ីសាអូឌីតចោទក្រុមឧទ្ទាមហ៊ូទីថា ទទួលបានជំនួយពីអ៊ីរ៉ង់ ដើម្បីបង្កអស្ថិរភាពនៅយេម៉ែន។ សម្ព័ន្ធមិត្តអារ៉ាប់បានបង្កើនការវាយប្រហារ តាំងពីថ្ងៃ៩សីហា ក្រោយកិច្ចពិភាក្សាសន្តិភាពយេម៉ែន ជួបបរាជ័យ។
ជាញឹកញាប់ ក្រុមសិទ្ធិមនុស្សរិះគន់អារ៉ាប៊ីសាអូឌីតថា ធ្វើការវាយប្រហារនៅយេម៉ែន សម្លាប់ជនស៊ីវិលសន្ធឹកសន្ធាប់។ អាមេរិកក៏តែងសុំអោយអារ៉ាប៊ីសាអូឌីតចៀសវាងកុំអោយមានជនស៊ីវិលស្លាប់ដែរ។ ថ្មីៗនេះ អង្គការគ្រូពេទ្យគ្មានព្រំដែនទើបសម្រេចជម្លៀសបុគ្គលិកខ្លួន ពីមន្ទីរពេទ្យប៉ែកខាងជើងយេម៉ែន ប៉ុណ្ណោះ ដើម្បីការពារសុវត្ថិភាពពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ