«ជនសង្ស័យចំណេញឱកាសរត់គេចខ្លួន ដោយសារការបង្ហោះរូបតាមបណ្តាញសង្គម» ៖អ្នកនាំពាក្យប៉ូលីសជាតិ
គិតមកដល់ថ្ងៃទី ៣វិច្ឆិកានេះ គឺមានរយៈពេល ៩ថ្ងៃហើយ បន្ទាប់ពីមានមនុស្សមួយក្រុម បានវាយដំទៅលើអ្នកតំណាងរាស្ត្រពីររូប របស់គណបក្សសង្គ្រោះជាតិ។ ប៉ុន្តែរហូតមកដល់ពេលនេះ គណៈកម្មការស្រាវជ្រាវ ដែលបានបង្កើតឡើងដោយក្រសួងមហាផ្ទៃ នៅមិនទាន់ចាប់ខ្លួនជនដៃដល់មកផ្តន្ទាទោស បាននោះទេ។ អ្នកនាំពាក្យអគ្គស្នងការនគរបាលជាតិ ថាសមត្ថកិច្ច កំពុងញាប់ដៃញាប់ជើង ប្រមូលភស្តុតាង ចាប់ជនដៃដល់។ តែខាងបក្សសង្គ្រោះជាតិ ដែលជាជនរងគ្រោះ គ្មានសុទិដ្ឋិនិយម ហើយថាចំណាត់រដ្ឋាភិបាល មានភាពយឺតយ៉ាវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
អ្នកនាំពាក្យអគ្គស្នងការរងនគរបាលជាតិ លោកឧត្តមសេនីយ៍ឯក គៀត ច័ន្ទថារិទ្ធិ បានផ្តល់ព័ត៌មានឲ្យដឹង តាមគេហទំព័រនគរបាលជាតិថា នៅពេលនេះ សមត្ថកិច្ច កំពុងតែសកម្ម ក្នុងការប្រមូល រូបភាពនិង ឯកសារនានា ដែលអាចជាភស្តុតាង ក្នុងការកំណត់អត្តសញ្ញាណជនសង្ស័យ ដែលបានបង្ករបួសស្នាម ដល់សមាជិកសភាពីររូប មកពីគណបក្សសង្គ្រោះជាតិ គឺលោកញ៉យ ចំរើន និងលោកគង់ សភា។
ក្នុងនោះ សមត្ថកិច្ច ក៏បានបំពេញនីតិវិធី ជាមួយតុលាការ ដើម្បីបើកការស៊ើបអង្កេត និងបានចុះពិនិត្យកន្លែងកើតហេតុ។ ថែមទាំងបានសាកសួរសាក្សីមួយចំនួន ដូចជាអ្នកបើកបរ អ្នកនៅជិត និងអ្នកដែលបានឃើញហេតុការណ៍ផ្ទាល់ផងដែរ។
យ៉ាងណាក៏ដោយ លោកគៀត ច័ន្ទថារិទ្ធិ បានឲ្យដឹងថា សមត្ថកិច្ចក៏ជួបនឹងបញ្ហាមួយចំនួន ដែលបង្កឲ្យមានការយឺតយ៉ាវ ដូចជាការបង្ហោះរូបភាពរបស់សាធារណជន នៅក្នុងបណ្តាញសង្គម និងសារព័ត៌មាននានាជាច្រើននោះ បានធ្វើឲ្យចំណេញដល់ជនសង្ស័យ អាចរត់គេចខ្លួន ហើយធ្វើឲ្យសមត្ថកិច្ចមានការលំបាក ក្នុងការអនុវត្តនីតិវិធី ដើម្បីកំណត់អត្តសញ្ញាណ និងចាប់ខ្លួនជនសង្ស័យ។ អ្នកនាំពាក្យប៉ូលីសជាតិ បានអះអាង រូបភាព និងឯកសារតាមរយៈបណ្តាញសង្គម ឬតាមសារព័ត៌មានមួយចំនួន មិនសូវជាផ្លូវការ ស្របតាមនីតិវិធីច្បាប់នោះទេ។
សមត្ថកិច្ច នៅតែបន្តអំពាវនាវ ដល់សាធារណជនជាថ្មីទៀត ត្រូវផ្តល់រូបភាព ឬឯកសារផ្សេងៗដោយផ្ទាល់តែម្តង មកកាន់សមត្ថកិច្ច ដែលអាចជួយដល់ក្នុងការស៊ើបអង្កេត និងឈានដល់ការកំណត់មុខសញ្ញា និងចាប់ខ្លួនជនសង្ស័យ។
គួររម្លឹកជូនថា បន្ទាប់ពីមានការវាយដំអ្នកតំណាងរាស្ត្រពីររូប ក្នុងអំឡុងពេលបាតុកម្មប្រឆាំងលោកកឹម សុខា កាលពីថ្ងៃទី ២៦តុលា ក្រោយមួយថ្ងៃ ពោលគឺនៅថ្ងៃទី ២៧តុលា រដ្ឋមន្ត្រីក្រសួងមហាផ្ទៃ បានប្រកាសបង្កើតគណៈកម្មការស្រាវជ្រាវមួយ ដែលដឹកនាំដោយលោកឯម សំអាន ដើម្បីតាមរកជនដៃដល់មកចាត់ការតាមនីតិវិធីច្បាប់។ ប៉ុន្តែខាងគណបក្សសង្គ្រោះជាតិ បានចេញសេចក្តីថ្លែងការណ៍ បង្ហាញទុទិដ្ឋិនិយមថា ការស្វែងរកចាប់ខ្លួនជនដៃដល់ មានភាពយឺតយ៉ាវ ហើយមិនបានផ្តល់ទំនុកចិត្តដល់មហាជន និងថែមទាំងបង្កក្តីបារម្ភ ដល់សុវត្ថិភាព ក្នុងការបំពេញតួនាទីរបស់អ្នកតំណាងរាស្ត្រទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ