ទឹកជំនន់នៅស្រីលង្កា៖ជំនួយអន្តរជាតិបានផ្តើមទៅដល់ជាបណ្តើរៗ
នៅក្នុងប្រទេសស្រីលង្កា រដ្ឋអំណាចបានប្រកាសឲ្យដឹងនៅថ្ងៃសៅរ៍ ទី២១ ឧសភាថា ជំនួយអន្តរជាតិពីសឹងគ្រប់ប្រទេសក្នុងលោកបានផ្តើមទៅដល់ទឹកដីរបស់ខ្លួនជាបណ្តើរៗហើយ។ ជាជំនួយសម្រាប់ជួយទំនុកបម្រុងដល់ប្រជាជនស្រីលង្កាប្រមាណជា ៥០០ ០០០នាក់ដែលបានបង្ខំចិត្តរត់ចេញពីផ្ទះសម្បែងដោយសារទឹកជំនន់។ ឥណ្ឌាជាប្រទេសទី១ ដែលបានរួសរាន់បញ្ជូនជំនួយទៅកាន់ប្រទេសស្រីលង្កាមុនគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
គឺតាមរយៈយន្តហោះយោធា និងនាវាចម្បាំងដែលឥណ្ឌាបានប្រើដើម្បីដឹកជំនួយទៅជួយជនរងគ្រោះស្រីលង្កាដោយទឹកជំនន់។ គឺជាជំនួយបន្ទាន់ដែលក្រសួងការបរទេសស្រីលង្កាបានប្រាប់ឲ្យដឹងថា ជំនួយដឹកតាមយន្តហោះយោធាឥណ្ឌាមួយបានទៅដល់ទីក្រុងកូឡុំបូ ហើយជំនួយដឹកតាមនាវាចម្បាំងឥណ្ឌាចំនួនពីរគ្រឿងកំពុងធ្វើដំណើរតាមផ្លូវ។ ជំនួយឥណ្ឌាភាគច្រើនមានថ្នាំពេទ្យ ម៉ាស៊ីនបូមទឹក ម៉ុងភួយ ឆ័ត្រ ឬមួយទូកស្បែកជាដើម។ ក្រៅពីឥណ្ឌា ជប៉ុនក៏បានដឹកជំនួយតាមយន្តហោះទៅកាន់ស្រីលង្កា ហើយអូស្រា្តលី និងអាមេរិកក៏បានផ្តល់ជាថវិកា។
គិតនៅត្រឹមយប់ថ្ងៃសៅរ៍ ទី២១ ឧសភា កម្រិតទឹកជំនន់ក្នុងទីក្រុងកូឡុំបូបានស្រកចុះបន្តិចវិញ តែនៅជាកម្រិតមួយខ្ពស់ខ្លាំងដែលមិនទាន់អាចអនុញ្ញាតឲ្យពលរដ្ឋភាគច្រើនអាចធ្វើដំណើរវិលត្រឡប់ចូលគេហដ្ឋានរបស់ខ្លួនវិញបានទេ។ មួយវិញទៀត ជាមួយនឹងភ្លៀងបន្តធ្លាក់នាំឲ្យគេបារម្ភខ្លាចទឹកក្នុងទន្លេគីឡានីកើនជោរជន់ជាថ្មី។
សូមជម្រាបជូនថា តាំងពីថ្ងៃអង្គារ ទី១៧ ឧសភា និងជាលើកទី១ គិតក្នុងរយៈពេល ១៥ឆ្នាំកន្លងទៅដែលស្រីលង្កាបានជួបប្រទះនឹងភ្លៀងធ្លាក់ខ្លាំងក្លាបង្កចេញជាទឹកជំនន់ និងការបាក់ដីច្រើនសមម្បើម។ គិតត្រឹមថ្ងៃសៅរ៍ ទី២១ ឧសភា ទឹកជំនន់ និងការបាក់ដីបានបណ្តាលឲ្យមានមនុស្សស្លាប់ ៧១នាក់ និងបាត់ខ្លួន ១២៧នាក់ផ្សេងទៀត ពិសេសនៅក្នុងស្រុកពីរមានចម្ងាយប្រមាណជា ១០០គីឡូម៉ែត្រពីទីក្រុងកូឡុំបូ។
ក្រៅពីជំនួយអន្តរជាតិ លោកប្រធានាធិបតីស្រីលង្កាក៏បានអំពាវនាវឲ្យមានសាមគី្គភាពផ្ទៃក្នុងរវាងប្រជាជន និងប្រជាជនចំពោះជនរងគ្រោះ។ តួលេខផ្តល់ដោយការិយាល័យគ្រប់គ្រងគ្រោះមហន្តរាយឲ្យដឹងថា មានស្រុកចំនួន ២២ ក្នុងចំណោមស្រុកទាំង ២៥ របស់ស្រីលង្កាបានជួបគ្រោះទឹកជំនន់ ហើយមានជនរងគ្រោះចំនួន ៣០០ ០០០នាក់កំពុងជ្រកកោណនៅទីតាំងបណ្តោះអាសន្នរៀបចំដោយរដ្ឋអំណាច និងមាន ២០០ ០០០នាក់ផ្សេងទៀតកំពុងស្នាក់នៅជ្រកកោណតាមផ្ទះបងប្អូន និងមិត្តភក្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ