អ្នកនាំពាក្យ៖រដ្ឋាភិបាលខ្មែរនិងចិនមិនទៅចាប់អារម្មណ៍រឿងបាតុកម្មរបស់ក្រុមប្រឆាំងនៅអាមេរិកទេ
អ្នកនាំពាក្យគណបក្សប្រជាជនកម្ពុជា លោកសុខ ឥសាន នៅព្រឹកថ្ងៃអាទិត្យនេះ បានអះអាងប្រាប់វិទ្យុបារាំងអន្តរជាតិថា រដ្ឋាភិបាលកម្ពុជា ក៏ដូចរដ្ឋាភិបាលចិនមិនទៅចាប់អារម្មណ៍នឹងការធ្វើបាតុកម្មរបស់អ្នកគាំទ្រអតីតបក្សប្រឆាំងនៅអាមេរិកឡើយ។ ការអះអាងដូច្នេះ គឺជាការឆ្លើយតបទៅនឹងការធ្វើបាតុកម្មរបស់ប្រជាពលរដ្ឋខ្មែរមួយចំនួននៅមុខស្ថានទូតកម្ពុជា និង ស្ថានទូតចិនប្រចាំនៅអាមេរិកកាលពីយប់ថ្ងៃទី៣១ ខែសីហា។
ចុះផ្សាយនៅថ្ងៃ៖
ស្តាប់ - ០២:០៧
ប្រជាពលរដ្ឋខ្មែររស់នៅអាមេរិក និងកាណាដាមួយចំនួនដែលគាំទ្រអតីតគណបក្សគណបក្សសង្គ្រោះជាតិ បានជួបជុំគ្នាតវ៉ា និងហែរញតិ្តទៅដាក់នៅស្ថានទូតចិន និង កម្ពុជាប្រចាំនៅសហរដ្ឋអាមេរិកកាលពីថ្ងៃសៅរ៍ម្សិលមិញនេះ។ ចំពោះស្ថានទូតចិន ពួកគេបានដាក់ញតិ្តទាមទារឱ្យប្រទេសចិនគោរពដែនអធិបតេយ្យភាពរបស់កម្ពុជា គោរពលទ្ធិប្រជាធិបតេយ្យនិងសិទ្ធិមនុស្ស ជាពិសេសទៀតនោះ គឺពួកគេទាមទារឱ្យរដ្ឋាភិបាលចិនព្យួរជំនួយទាំងឡាយដល់រដ្ឋាភិបាលកម្ពុជា រហូតដរាបណាមានដំណោះស្រាយផ្នែកនយោបាយរវាងរដ្ឋាភិបាលកម្ពុជា និងអតីតគណបក្សសង្គ្រោះជាតិ។ នេះបើតាមការបញ្ជាក់ឱ្យដឹងរបស់អ្នកដឹកនាំធ្វើបាតុកម្ម។
ចំណែក ចំពោះស្ថានទូតកម្ពុជាប្រចាំនៅអាមេរិកវិញ បើតាមអ្នកដឹកនាំធ្វើបាតុកម្មដដែល គឺក្រុមបាតុករបានទាមទារឱ្យរដ្ឋាភិបាលកម្ពុជាដោះលែងលោកកឹម សុខា ដែលត្រូវបានឃុំខ្លួនប្រមាណជា២ឆ្នាំកន្លងមកនេះ។ ក្រៅពីបញ្ហានេះ ពួកគេក៏បានទាមទារឱ្យមានការដាក់ឱ្យដំណើរការអតីតគណបក្សសង្គ្រោះជាតិឡើងវិញ និង ទាមទារឱ្យមានការដោះលែងសកម្មជនអតីតបក្សប្រឆាំង សង្គមស៊ីវិល និង អ្នកសារព័ត៌មានឱ្យមានសេរីភាពពេញលេញឡើងវិញផងដែរ។
ចំពោះការធ្វើបាតុកម្មទាមទារទាំងនេះ លោកសុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា វាគ្រាន់តែជាការសម្តែងមតិតែប៉ុណ្ណោះ ហើយមិនទទួលបានការចាប់អារម្មណ៍ពីសំណាក់រដ្ឋាភិបាលកម្ពុជា និងចិននោះទេ។ សម្រាប់រដ្ឋាភិបាលចិន លោកបានគូសបញ្ជាក់ថា ប្រទេសចិនជាមហាអំណាចនិងជាប្រទេសឯករាជ្យដែលគ្មានហេតុផលណាមួយដែលចិនត្រូវទៅស្តាប់ក្រុមអ្នកតវ៉ាទាំងនោះឡើយ។ រីឯ ការចង់ឱ្យដោះលែងលោកកឹម សុខាវិញ លោកសុខ ឥសាន ប្រតិកម្មថា នេះជាសកម្មភាពរំលោភបំពានលើនីតិរដ្ឋដែលរដ្ឋាភិបាលកម្ពុជាមិនអាចធ្វើទៅបាន។
បើជាទោះបែបនេះក្តី អ្នកដឹកនាំធ្វើបាតុកម្មនៅអាមេរិកបានបង្ហាញការជឿជាក់ថា តាមរយៈបាតុកម្មរបស់ពួកគេនេះ អន្តរជាតិនឹងធ្វើការគាបសង្កត់លើរដ្ឋាភិបាលរបស់លោកនាយករដ្ឋមន្ត្រីហ៊ុន សែន ឱ្យគោរពសិទ្ធិមនុស្ស និងលទ្ធិប្រជាធិបតេយ្យ។ ក៏ប៉ុន្តែ លោកសុខ ឥសាន បានតបទៅវិញថា បាតុកម្មនេះ គឺគ្រាន់តែជារូបភាពប៉ុណ្ណោះ គឺគ្មានប្រសិទ្ធភាព និងឥទ្ធិពលណាមួយមកលើរដ្ឋាភិបាលកម្ពុជាបច្ចុប្បន្ននោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ