លោកដូណាល់ ត្រាំ ត្រូវគេប្តឹងថារារាំងសិទ្ធិបញ្ចេញមតិ ដោយការបិទខ្ទប់គណនីTwitter របស់អ្នករិះគន់
លោកប្រធានាធិបតីអាមេរិក ដូណាល់ ត្រាំ ត្រូវបានសមាគមមួយ តំណាងឲ្យអ្នកប្រើប្រាស់បណ្តាញTwitter ដាក់ពាក្យប្តឹង ពីបទរារាំងសិទ្ធិសេរីភាពក្នុងការបញ្ចេញមតិ បន្ទាប់ពីគណនីTwitter របស់អ្នកប្រើប្រាស់មួយចំនួន ត្រូវបានលោកដូណាល់ ត្រាំ បិទខ្ទប់ មិនឲ្យចូលទៅអាន រឺសរសេរសារបញ្ចេញមតិ លើ ទំព័រ Twitter របស់លោក ដូណាល់ ត្រាំ ឡើយ។ ដើមបណ្តឹង បានលើកឡើងថា ថ្វីត្បិតតែគណនីTwitter របស់លោកត្រាំ គឺជាគណនីផ្ទាល់ខ្លួន តែគណនីនេះ ត្រូវបានសេតវិមាន ប្រើប្រាស់ជាបណ្តាញផ្លូវការរបស់ លោកប្រធានាធិបតី។
ចុះផ្សាយនៅថ្ងៃ៖
អ្នកប្រើប្រាស់បណ្តាញTwitter ចំនួន៧នាក់ បានដាក់ពាក្យប្តឹង លោកដូណាល់ ត្រាំ តាមរយៈសមាគម Knight First Amendment Institut នៅចំពោះមុខតុលាការក្រុងញូយ៉ក។ ក្រៅពី លោកដូណាល់ ត្រាំ ពាក្យបណ្តឹងនេះ ក៏បានសំដៅចោទប្រកាន់លើរូបលោក Sean Spicer អ្នកនាំពាក្យសេតវិមាន និងលោក Daniel Scavino ដែលជាមន្ត្រីទទួលបន្ទុកបណ្តាញសង្គម របស់សេតវិមាន ផងដែរ។
សមាគមដើមបណ្តឹង បានចោទប្រកាន់លោកប្រធានាធិបតីអាមេរិក និងក្រុមការងាររបស់លោក ថាបានបំពាន នឹងរដ្ឋធម្មនុញ្ញសហរដ្ឋអាមេរិក ដែលចែងការពារសិទ្ធិសេរីភាព ក្នុងការបញ្ចេញមតិ។ អ្នកប្រើប្រាស់ គណនីTwitter ទាំង៧នាក់ សុទ្ធតែត្រូវបាន លោក ដូណាល់ ត្រាំ បិទខ្ទប់ មិនឲ្យចូលទៅអាន រឺសរសេរបញ្ចេញមតិ នៅលើគណនីរបស់លោក ដូណាល់ ត្រាំទេ។
ជាការពិត ម្ចាស់គណនីនៅលើបណ្តាញសង្គម ម្នាក់ៗមានសិទ្ធិបិទខ្ទប់គណនីរបស់នរណាម្នាក់ មិនឲ្យចូលមកអាន រឺសរសេរបញ្ចេញយោបល់ លើគណនីរបស់ខ្លួន។ ក៏បន្តែសិទ្ធិនេះ អាចត្រូវដកហូត ក្នុងករណី ដែលគណនីនោះ ត្រូវបានចាត់ទុកថាជាវេទិកាសាធារណៈ។ យ៉ាងណាមិញ គណនីTwitter របស់លោកដូណាល់ ត្រាំ ថ្វីបើជាគណនីផ្ទាល់ខ្លួនរបស់លោកមែនពិត តែទីប្រឹក្សារបស់លោកដូណាល់ ត្រាំ ជាច្រើននាក់ ធ្លាប់បានប្រកាសថា រាល់សារដែលសរសេរលើទំព័រTwitter របស់លោកដូណាល់ ត្រាំ គឺមានតំលៃ ជាសារផ្លូវការរបស់សេតវិមាន។
យោងតាមសមាគមដើមបណ្តឹង លោកប្រធានាធិបតីអាមេរិក មានគណនីTwitter ផ្លូវការមួយ តែលោកមិនដែលប្រើវាទេ។ ផ្ទុយទៅវិញ សេតវិមាន បានប្រើប្រាស់គណនីTwitterផ្ទាល់ខ្លួន របស់លោកដូណាល់ ត្រាំ ដើម្បីផ្សព្វផ្សាយសេចក្តីប្រកាសជាផ្លូវការ ដើម្បីការពារវិធានការ ឬក៏ការសម្រេចផ្សេងៗ របស់លោកប្រធានាធិបតី។
ដើមបណ្តឹងសន្និដ្ឋានថា ដូច្នេះ គណនី Twitter របស់លោកដូណាល់ ត្រាំ មិនមែនជាគណនីផ្ទាល់ខ្លួនទៀតទេ តែវាជាគណនីតំណាងឲ្យវេទិកាសាធារណៈ តំណាងឲ្យរដ្ឋាភិបាល។ ក្នុងករណីនេះ ការបើកឲ្យមានការជជែក បញ្ចេញយោបល់ដោយសេរី ត្រូវតែធានាការពារ គោរពតាមរដ្ឋធម្មនុញ្ញ។ គេមិនអាចបិទខ្ទប់គណនីអ្នករិះគន់ ហើយបើកអនុញ្ញាតិ ឲ្យមានតែអ្នកសរសើរ ស្របតាមខ្លួននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ