លោកហ្វាំ មីញហួង ដែលត្រូវបានវៀតណាមដកសញ្ជាតិ ត្រូវបានចាប់បញ្ជូនមកដល់បារាំង
លោក ហ្វាំ មីញហួង សាស្ត្រាចារ្យ និងជាអ្នកសរសេរអត្ថបទរិះគន់រដ្ឋាភិបាលវៀតណាម ដែលត្រូវរដ្ឋាភិបាលកុម្មុយនីស្តិនេះ ដកសញ្ជាតិចោលនោះ នៅថ្ងៃអាទិត្យទី ២៥មិថុនា ត្រូវបានគេចាប់បញ្ជូន មកដល់ទីក្រុងប៉ារីស ប្រទេសបារាំងហើយ។ លោក ហ្វាំ មីញហួង បានថ្លែងប្រាប់អ្នកយកព័ត៌មានបារាំង ថា កន្លងមក លោកខិតខំ តស៊ូមតិ ទៅតាមលទ្ធភាពលោក តែពេលនេះ ការតស៊ូរបស់លោក ប្រឆាំងជាមួយនឹងអំណាចផ្តាច់ការកុម្មុយនីស្តវៀតណាម បានបរាជ័យហើយ។ លោក អស់សង្ឃឹមខ្លាំងណាស់!
ចុះផ្សាយនៅថ្ងៃ៖ កែប្រែថ្ងៃទី៖
“គេចោទខ្ញុំ ថាមានបំណងផ្តួលរំលំរបបគ្រប់គ្រង ដោយសារតែខ្ញុំបានសរសេរអត្ថបទជាច្រើន រិះគន់គេ។ អត្ថបទខ្ញុំ គឺខ្ញុំលើកឡើងអំពីការធ្វើយ៉ាងណា ដើម្បីលើកកំពស់ ការគោរពសិទ្ធិសេរីភាព និងលទ្ធិប្រជាធិបតេយ្យ។ ខ្ញុំសរសេររិះគន់ អំពីសកម្មភាពពុករលួយ។ ខ្ញុំបានបរិហារ អំពីសកម្មភាព ដែលចិន ចូលលុកលុយ និងប្រើឥទ្ធិពល ទៅលើគ្រប់វិស័យនៅវៀតណាម មិនថាវិស័យសេដ្ឋកិច្ច វិស័យនយោបាយ ឬក៏វិស័យយោធា។
ខ្ញុំសរសេរ ដើម្បីផ្តល់យោបល់របស់ខ្ញុំ ក្នុងការធ្វើកំណែទម្រង់លើវិស័យអប់រំ។ ខ្ញុំគឺជាសាស្ត្រាចារ្យនៅមហាវិទ្យាល័យ ដូច្នេះ វាគឺជាកាតព្វកិច្ចរបស់ខ្ញុំ ដែលត្រូវចូលរួមផ្តល់យោបល់ជួយជាតិ។ វាគឺជារឿងធម្មតាបំផុត។ ក៏ប៉ុន្តែ នៅវៀតណាម ក្រោមរបបផ្តាច់ការកុម្មុយនីស្តិ អ្វីដែលខ្ញុំធ្វើទាំងនេះ មិនមែនជារឿងធម្មតាទេ ក្នុងក្រសែរភ្នែកគេ។”
គួររំលឹកថា កាលពីថ្ងៃទី ១១ មិថុនា ២០១៧ លោក ហ្វាំ មីញហួង បានទទួលលិខិតមួយ របស់រដ្ឋាភិបាលវៀតណាម ចុះហត្ថលេខានៅថ្ងៃទី ១៧ ឧសភា ដែល លិខិតនោះ គឺជាការសម្រេច ដកសញ្ជាតិវៀតណាមពីលោក។ រដ្ឋាភិបាលវៀតណាម បានបញ្ជារឲ្យលោក ចាកចេញពីវៀតណាម ជាបន្ទាន់។
កាលពីថ្ងៃសុក្រ ទី ២៣ មិថុនា កម្លាំងសមត្ថកិច្ច បានចុះទៅចាប់ខ្លួនលោក ហ្វាំ មីញហួង ដល់ផ្ទះក្នុងសម្លៀកបំពាក់ខោជើងខ្លី ដើម្បីបញ្ជូនលោក ឲ្យឡើងយន្តហោះ ត្រលប់មកប្រទេសបារាំង។ លោក ហ្វាំ មីញហួង បានបញ្ជាក់ថា លោកមិនបានមានពេលនិយាយលាគ្នា ជាមួយភរិយាលោកទេ។ គេបានអនុញ្ញាតិ ឲ្យលោកជួបមន្ត្រីនៅស្ថានទូតបារាំង និងមេធាវីម្នាក់ តែក្នុងរយៈពេលខ្លីប៉ុណ្ណោះ។ លោកបានមកដល់ទីក្រុងប៉ារីស នៅព្រឹកថ្ងៃអាទិត្យទី ២៥ មិថុនា។
សូមបញ្ជាក់ថា លោក ហ្វាំ មីញហួង (Pham Minh Hoang) អាយុ៦២ឆ្នាំ មានសញ្ញាតិពីរ វៀតណាមផង បារាំងផង។ លោក បានរត់ភៀសខ្លួនមករស់នៅប្រទេសបារាំង នៅឆ្នាំ១៩៧៣ ជាទីដែលលោក បានសិក្សាផ្នែកគណិតវិទ្យា ហើយបានក្លាយជាសាស្ត្រាចារ្យនៅមហាវិទ្យាល័យ។ ក៏ប៉ុន្តែនៅឆ្នាំ២០០០ លោកបានសម្រេចចិត្តត្រលប់ទៅវៀតណាមវិញ ដើម្បីធ្វើការជាសាស្ត្រាចារ្យ នៅសកលវិទ្យាល័យ ពហុបច្ចេកទេសក្រុងហូជីមីញ។
លោកបានសរសេរអត្ថបទជាច្រើន ដែលមានខ្លឹមសាររិះគន់ ពីបញ្ហាសង្គម ពីការរិតបន្តឹងសេរីភាពនៅវៀតណាម ដោយប្រើនាមជាអ្នកនិពន្ធថា ហ្វាំង កៀនកួក។ កាលពីឆ្នាំ២០១១ លោកត្រូវបានតុលាការវៀតណាម កាត់ទោសឲ្យជាប់ពន្ធនាគារ៣ឆ្នាំ តែក៏ត្រូវបានដោះលែងមកវិញ ក្រោយជាប់គុករយៈពេល១៧ខែ តែត្រូវគេកំណត់ជាប់ឃុំក្នុងផ្ទះរយៈពេល៣ឆ្នាំ។ តែយ៉ាងណា លោកបានបន្តសរសេរអត្ថបទរិះគន់ ការដឹកនាំផ្តាច់ការរបស់រដ្ឋាភិបាលវៀតណាម ដែលជាការរិះគន់ដើម្បីការផ្លាស់ប្តូរដោយសន្តិវិធី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ