ជំនួបកំពូល អឺរ៉ុប-ចិន ដើម្បីរឹតចំណងសេដ្ឋកិច្ច
នៅទីក្រុងប៉េកាំង រដ្ឋធានីចិន កំពុងតែបើកការប្រជុំកំពូលលើកទី១៨ រវាងថ្នាក់ដឹកនាំសហភាពអឺរ៉ុប និងថ្នាក់ដឹកនាំចិន ស្តីពីបញ្ហាសេដ្ឋកិច្ចរវាងមហាដៃគូទាំងពីរ។ ជំនួបកំពូល ដែលមានរយៈពេល២ថ្ងៃ គឺជាឱកាសដែលភាគីទាំងសងខាង លើកយកបញ្ហាមួយចំនួនមកដាក់លើតុ ជាពិសេសទាក់ទិនទៅនឹងការចាកចេញរបស់អង់គ្លេសពីសហភាពអឺរ៉ុប ដែលអាចប៉ះពាល់ដល់ហ៊ុនវិនិយោគរបស់ចិន និងបញ្ហាដោះដូរពាណិជ្ជកម្មសេរី ដែលចិនកំពុងធ្វើឲ្យអឺរ៉ុបជួបការលំបាក។
ចុះផ្សាយនៅថ្ងៃ៖
ស្តាប់ - ០២:១០
យោងតាមការឲ្យដឹងពីមន្ត្រីសហភាពអឺរ៉ុប ដែលអមដំណើរលោក ប្រធានក្រុមប្រឹក្សាអឺរ៉ុប និងលោកប្រធានគណកម្មការអឺរ៉ុប បញ្ហាចំបងដែលអឺរ៉ុប នឹងលើកទៅនិយាយជាមួយចិន គឺការរៀបចំឲ្យមានភាពស្របគ្នារវាងវិធាននានា ក្នុងវិស័យវិនិយោគ។ ភាគហ៊ុនវិនិយោគចិន មានកាន់តែច្រើននៅក្នុងសហភាពអឺរ៉ុប ដែលអឺរ៉ុបបានបើកផ្លូវទទួលស្វាគមន៍ ដោយបានសម្រួល និងផ្តល់អត្ថប្រយោជន៍ជាច្រើនដល់ចិន ជាងអ្នកណាៗទាំងអស់។ ដូច្នេះវាជារឿងចាំបាច់ ដែលវិធានច្បាប់វិនិយោគរបស់ចិន ត្រូវតែដើរឲ្យស្របជាមួយវិធានច្បាប់វិនិយោគរបស់សហភាពអឺរ៉ុប ដើម្បីចៀសវៀងជម្លោះគតិយុត្តិ។
ការរៀបចំសម្រួលនូវអត្រាប្តូរប្រាក់ រវាងប្រាក់យាន់ចិន និងប្រាក់អឺរ៉ូ ក៏ត្រូវលើកមកនិយាយដែរ ជាពិសេស ស្របពេលដែលពេលនេះ ប្រាក់ផោនរបស់អង់គ្លេស កំពុងដាំក្បាលចុះ ដោយនាំយកប្រាក់អឺរ៉ូទៅជាមួយ។ ចិនដែលតែងតែរំកិលអត្រាតម្លៃរូបិយបណ្ណរបស់ខ្លួន ឲ្យនៅថោកជាងគេខ្លាំងជានិច្ចនោះ កំពុងតែព្រួយបារម្ភពីផលប៉ះពាល់ទៅដល់ការនាំចេញរបស់ខ្លួន ទៅក្នុងទីផ្សារអឺរ៉ុប។
ដោយឡែក បញ្ហាដោះដូរពាណិជ្ជកម្មសេរី គឺជាចំណុចរសើប ដែលភាគីទាំងពីរ ពិបាកនឹងលើកឡើងមកនិយាយ។ ចំណុចក្តៅជាងគេ គឺផលិតផលដែកថែបរបស់ចិន ដែលស្មើនឹង៥០%នៃផលិតផលសរុបរបស់ពិភពលោក។ បញ្ហានេះកំពុងធ្វើឲ្យគ្រប់គ្នាមានការលំបាកក្នុងការប្រកួតប្រជែង មិនថាអឺរ៉ុប រឺអាមេរិក។ ចិន អាងតែសំបូរ និងផលិតបានក្នុងតម្លៃថោក បានចាក់បញ្ចូលក្នុងទីផ្សារ នូវផលិតផលរបស់ខ្លួន ធ្វើឲ្យជន់ជោរ ក្នុងតម្លៃលក់ឡៃឡុង ដ៏ថោក។ ទាក់ទិននឹងបញ្ហានេះ សហភាពអឺរ៉ុប ទើបបានសម្រេចតម្លើងពន្ធនាំចូល ទៅលើផលិតផលដែកថែបចិន ឲ្យដល់៣៥% ហើយការតព្វកិច្ចពន្ធនេះ នឹងជាប់ទៅដល់ផលិតដែលនាំចូល គិតតាំងពីឆ្នាំ២០១៥មក។
យ៉ាងណាមិញ កាលពីថ្ងៃអាទិត្យ លោករដ្ឋមន្ត្រីក្រសួងពាណិជ្ជកម្មបារាំង បានថ្លែងថា ការដោះដូរពាណិជ្ជកម្មសេរី មិនត្រូវបើកចំហរវាឲ្យសេរីពេកនោះទេ។ ពេលខ្លះគេត្រូវរិតត្បិតវាខ្លះ ដើម្បីកុំឲ្យប្រទេសមួយធ្វើវាស្រេចតែនឹងចិត្ត ដោយមិនគិតពីភាពយុត្តិធម៌ក្នុងទីផ្សារ។
សូមរំលឹកថា កាលពីខែឧសភា កន្លងទៅសភាអឺរ៉ុប បានបោះឆ្នោតសម្រេចបដិសេធមិនទទួលស្គាល់ចិន ថាជាប្រទេសដែលមានសេដ្ឋកិច្ចទីផ្សារសេរីទេ។ សេចក្តីសម្រេចនេះ គឺដើម្បីបញ្ជាក់ប្រាប់ចិនថា ក្នុងនាមជាសមាជិកអង្គការពាណិជ្ជកម្មពិភពលោក ចិនត្រូវតែធ្វើការកែប្រែនូវរបៀបធ្វើជំនួញរបស់ខ្លួន ធ្វើយ៉ាងណាស្មោះត្រង់ជាមួយដៃគូដ៏ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ