សិង្ហបុរីចូលរួមរំលឹកវិញ្ញាណក្ខន្ធថ្ងៃចុងក្រោយឲ្យសព លោកលី ក្វាន់យូ
ប្រជាជនសិង្ហបុរី រាប់ម៉ឺននាក់ នៅថ្ងៃអាទិត្យ ទី ២៩ មីនា បានតស៊ូ ឈរក្រោមទឹកភ្លៀង ដើម្បី សំដែងការគោរព ថ្ងៃចុងក្រោយ ដល់សពលោកលី ក្វាន់យូ វីរបុរស និងសា្ថបនិកជាតិសិង្ហបុរី។ ប្រមុខដឹកនាំបរទេសជាច្រើនដែលនៅក្នុងនោះ មាននាយករដ្ឋមន្រ្តីជប៉ុន កូរ៉េខាងត្បូង និងកម្ពុជា ជាដើម នឹងចូលរួមសំដែងការគោរពវិញ្ញាណក្ខន្ធសពលោកលី ក្វាន់យូ ដែលត្រូវបញ្ចុះ នៅថ្ងៃអាទិត្យនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
មជ្ឈូសដាក់សព លោកលី ក្វាន់យូ បិតាបង្កើតសិង្ហបុរី ត្រូវបានដឹកដង្ហែចេញពីវិមានរដ្ឋសភា នៅថ្ងៃអាទិត្យនេះ សំដៅសកលវិទ្យាល័យជាតិ ជាទី ដែលរដ្ឋាភិបាលរៀបចំពិធីបុណ្យសព ដោយមានការចូលរួម ពីក្រុមគ្រួសារ មន្រ្តីរដ្ឋាភិបាលសិង្ហបុរី និងមេដឹកនាំបរទេសជាច្រើនរូប។ ទៅតាមការគ្រោងទុក ពិធីបូជាសពនឹងត្រូវធ្វើឡើងជាឯកជន នៅឯឈាបនដ្ឋាន Mandai។
លោកលី ក្វាន់យូបានទទួលអនិច្ចកម្ម កាលពីព្រឹកថ្ងៃចន្ទ នៅក្នុងជន្មាយុ ៩១ឆ្នាំ ដោយជម្ងឺរលាកសួត។ រដ្ឋាភិបាលសិង្ហបុរីបានប្រកាសកាន់ទុក្ខជាតិ រយៈពេល ៧ថ្ងៃ ហើយ តាំងពីថ្ងៃពុធ ប្រជាជនសិង្ហបុរី ជាង ៤សែននាក់ គឺស្មើនឹង១០ភាគរយនៃប្រជាជនសិង្ហបុរី សរុបបានចូលទៅគោរពសពលោកលី នៅវិមានរដ្ឋសភា។
នៅថ្ងៃអាទិត្យនេះ ប្រជាជនសិង្ហបុរី បានសំដែងការគោរពជាចុងក្រោយ ដល់បិតាបង្កើតជាតិរបស់ខ្លួន។ ចំណែក នៅលើផ្ទៃមេឃ ឯណោះវិញ យន្តហោះចម្បាំង៤គ្រឿងហោះរំលង ពីលើ និងកាណុងកាំភ្លើង ដែលគេប្រើ ជាពិសេសសម្រាប់តែថ្នាក់ដឹកនាំរដ្ឋាភិបាល បានបាញ់ផ្ទួនៗគ្នា ដើម្បីផ្តល់កិត្តិយស ជាចុងក្រោយ ដល់សពលោកលី ក្វាន់យូ។
មេដឹកនាំបរទេសជាច្រើនត្រូវបានអញ្ជើញឲ្យចូលរួមថ្ងៃគោរពចុងក្រោយសពលោកលីក្វាន់យូ ដែលនៅក្នុងនោះ មានអតីតប្រធានាធិបតីអាមេរិក លោកប៊ីល គ្លីនតុន លោកបាន គីមូន អគ្គលេខាធិការអង្គការសហប្រជាជាតិ ដែលធ្លាប់ជាមិត្តស្និទ្ធស្នាលនឹងលោកលី ក្វាន់យូ។ នៅក្នុងតារាងភ្ញៀវដែលត្រូវអញ្ជើញឲ្យទៅចូលរួមពិធីបុណ្យសពអតីតនាយករដ្ឋមន្ត្រី សិង្ហបុរី មានផងដែរ លោកស៊ីនហ្សូ អាបេ នាយករដ្ឋមន្រ្តីជប៉ុន លោកស្រី ប្រធានាធិបតីកូរ៉េខាងត្បូង ប៉ាក់ គុនហេ នាយករដ្ឋមន្រ្តីអូស្ត្រាលី ឥណ្ឌា ឥណ្ឌូណេស៊ី និងព្រះចៅស៊ូតង់ របស់ព្រុយណេជាដើម។
លោកលី ក្វាន់យូរ បានលាចាកលោកទៅ ដោយបន្សល់ទុកនូវកេរ្តិ៍ឈ្មោះជារដ្ឋបុរសដែលបានប្រែក្លាយសិង្ហបុរី ពីកូនកោះមួយដុំតូចដ៏សែនក្រីក្រ ឲ្យក្លាយទៅជាប្រទេសអ្នកមាននិងជឿនលឿនបំផុត មួយនៅលើពិភពលោក ទាំងផ្នែកសេដ្ឋកិច្ច និងសុខភាព។
ថ្វីដ្បិត តែ លោក លី ត្រូវគេចាត់ទុក ជាមេដឹកនាំដែលប្រកាន់យករបៀបគ្រប់គ្រងបែបផ្តាច់ការ ក៏ប៉ុន្តែ លោកជាមេដឹកនាំផ្តាច់ការដែលគិតផលប្រយោជន៍ជាតិជាធំ គឺខុសពីមេដឹកនាំផ្តាច់ការនៅតាមបណ្តាប្រទេសអន់ថយជាច្រើន ដែលក្តោបក្តាប់អំណាច ដើម្បីយកទៅបម្រើតែផលប្រយោជន៍ផ្ទាល់ខ្លួន ក្រុមគ្រួសាររបស់ខ្លួន បក្សពួករបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ