ម៉ាល់ឌីវរៀបចំបោះឆ្នោតសភាក្នុងកាលៈទេសៈប្រជែងឥទ្ធិពលអំណាចរវាងឥណ្ឌានិងចិន
ប្រទេសបណ្តុំកូនកោះ ម៉ាល់ឌីវ រៀបចំការបោះឆ្នោតសភា នៅថ្ងៃអាទិត្យ ទី២១មេសា។ ការបោះឆ្នោតជ្រើសរើសតំណាងរាស្ត្រលើកនេះ ឋិតក្នុងបរិបទនៃការប្រជែងឥទ្ធិពលអំណាចដ៏ក្តៅគគុក រវាងមហាយក្សចិន និងឥណ្ឌា។ ដ្បិតថា រដ្ឋសភាផុតអាណត្តិ មានសំឡេងភាគច្រើនទំនោរគាំទ្រឥណ្ឌា ត្រូវប្រឈមមុខនឹងបក្សកាន់អំណាចរបស់ប្រធានាធិបតីថ្មី ដែលគាំទ្រចិនផ្កាប់មុខ។
ចុះផ្សាយនៅថ្ងៃ៖
ស្តាប់ - ០៣:២៦
ប្រទេសអាស៊ីខាងត្បូង ម៉ាល់ឌីវ ជាទីតាំងភូមិសាស្ត្រនយោបាយដ៏គន្លឹះ ដែល ចិន និងឥណ្ឌា ប្រជែងដណ្តើមឥទ្ធិពលគ្នា ដើម្បីផលប្រយោជន៍យុទ្ធសាស្ត្រផ្លូវនាវាចរណ៍សំខាន់ នៅឥណ្ឌូបាស៊ីហ្វិក។ ដ្បិតថា ការដឹកនាំប្រេងទៅកាន់ពិភពលោក ស្ទើរតែ១ភាគ៣ ត្រូវឆ្លងកាត់កំពង់ផែម៉ាល់ឌីវ។
ក្នុងឱកាសឃោសនាបោះឆ្នោតសភាលើកនេះ គណបក្សប្រឆាំង ខំប្រឹងឃោសនាជំទាស់នឹងមហិច្ឆតាចិននិយម របស់បក្សកាន់អំណាចរបស់ប្រធានាធិបតីថ្មី។ គណបក្សប្រជាធិបតេយ្យម៉ាល់ឌីវ MDP ដែលមានសំឡេងភាគច្រើននៅក្នុងសភាផុតអាណត្តិ ត្រូវគេស្គាល់ច្បាស់ថា មានជំនោរគាំទ្រឥណ្ឌា តាមទម្លាប់ជាយូរមកហើយ។ ថ្នាក់ដឹកនាំបក្សប្រឆាំង លោក Mariya Didi ដែលធ្លាប់ធ្វើជារដ្ឋមន្ត្រីការពារជាតិអាណត្តិចាស់ បានថ្លែងថា ឥណ្ឌា ជាប្រទេសជិតខាង ហើយតែងតែជួយម៉ាល់ឌីវជានិច្ច នៅពេលមានទុក្ខព្រួយអាសន្នលំបាក។ ប្រឈមមុខនឹងការប្រែប្រួលអាកាសធាតុ ដែលអាចនឹងលិចកោះម៉ាល់ឌីវ មានតែឥណ្ឌាទេ ដែលនៅជិត និងអាចជួយស្រោចស្រង់ម៉ាល់ឌីវទាល់ពេលវេលា។ ចំណែក ចិនវិញនៅឆ្ងាយណាស់។ រំពឹងមិនបានទេ។ នេះបើតាមអ្នកនយោបាយប្រឆាំងលោក Mariya Didi។
ផ្ទុយទៅវិញ ប្រធានាធិបតីម៉ាល់ឌីវ លោក Mohamad Muizzu ដែលជាប់ឆ្នោតពីឆ្នាំទៅមិញ ជាអ្នកនយោបាយមាននិន្នាការទន់ទោរទៅគាំទ្រចិនយ៉ាងផ្កាប់មុខ។ តាំងពីឡើងកាន់អំណាចជាប្រមុខរដ្ឋជាង៦ខែមកនេះ លោកបានដាក់ឱសានុវាទបណ្តេញ កងទាហានឥណ្ឌាជាង៨០នាក់ ឲ្យចាកចេញ ពីម៉ាល់ឌីវ យ៉ាងយូរត្រឹម ថ្ងៃទី១០ ឧសភា។ បើតាមសេចក្តីរាយការណ៍ព័ត៌មានខ្លះទៀត, លោកក៏អំពាវនាវឲ្យពលរដ្ឋឥណ្ឌា ចាកចេញពីម៉ាល់ឌីវ ដែរ។ ជំនួសមកវិញ លោកទទួលឲ្យនាវាចិនចូលចុះចត ហើយនិងបានចេញទៅបំពេញទស្សនកិច្ចផ្លូវរដ្ឋ នៅប៉េកាំងទៀតផង។ យោងតាមក្រសួងការពារជាតិម៉ាល់ឌីវ, ក្នុងខែមីនាកន្លងទៅ ម៉ាល់ឌីវ បានចុះកិច្ចព្រមព្រៀងទទួលជំនួយយោធាចិន និងពង្រឹងកិច្ចសហការផ្ទេរភាគី ថែមទៀត។
ក្នុងឱកាសឃោសនាបោះឆ្នោតសភា ប្រធានាធិបតីម៉ាល់ឌីវទំនោរគាំទ្រចិន លោក Mohamad Muizzu បានស្តីបន្ទោសសមាជិកសភាផុតអាណត្តិ ដែលមិនសហការជាមួយរូបលោក តាំងតែលោកឡើងកាន់អំណាចមក។ ជាក់ស្តែង តាំងពីចុងឆ្នាំ ២០២៣មក សមាជិកសភាភាគច្រើនគាំទ្រខាងឥណ្ឌា បានបោះឆ្នោតរារាំងបដិសេធគម្រោងថវិកាវិនិយោគរបស់រដ្ឋាភិបាល ហើយនិងរារាំងការតែងតាំងសមាជិករដ្ឋាភិបាល ៣ នាក់។ ដូច្នេះ ក្នុងការបោះឆ្នោតសភាលើកនេះ លោក Mohamad Muizzu សង្ឃឹមថានឹងឈ្នះសំឡេងភាគច្រើននៅសភា ដើម្បីអាចសម្រេចគោលនយោបាយដូចដែលលោកបានសន្យា។
ប្រជាពលរដ្ឋម៉ាល់ឌីវ ចុះឈ្មោះបោះឆ្នោត ប្រមាណជា ២៨៤ ០០០ នាក់ ត្រូវបោះឆ្នោតជ្រើសរើសសមាជិកសភា ចំនួន ៩៣ អាសនៈ ដែលរើសចេញពីក្នុងចំណោមបេក្ខជនតំណាងរាស្ត្រ ៣៦៨ នាក់។ អាណត្តិសមាជិកសភាម៉ាល់ឌីវ មានរយៈពេល ៥ ឆ្នាំ។ តាមទម្លាប់នៅម៉ាល់ឌីវ លទ្ធផលបោះឆ្នោត អាចនឹងចេញដឹងភ្លាមៗ ពេលបិទការិយាល័យបោះឆ្នោត ហើយការរៀបចំសមាសភាពសមាជិកសភាថ្មី ក៏អាចនឹងត្រូវដឹងភ្លាមៗ ក្នុងថ្ងៃតែ១ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ