ក្រុមហ៊ុនប៊ូអ៊ីងនឹងបើករោងចក្រដំឡើងយន្តហោះនៅក្នុងប្រទេសចិន
ក្រុមហ៊ុនផលិតយន្តហោះរបស់អាមេរិក គឺប៊ូអ៊ីង បានប្រកាសឲ្យដឹងថាខ្លួននឹងបើករោងចក្រដំឡើងយន្តហោះនៅក្នុងប្រទេសចិន ដោយសហការជាមួយក្រុមហ៊ុនផលិតយន្តហោះក្នុងស្រុករបស់ចិន។ ការប្រកាសនេះត្រូវបានធ្វើឡើង នៅក្នុងអំឡុងដំណើរទស្សនកិច្ចរបស់លោកប្រធានាធិបតីចិន ស៊ី ជីនពីង នៅសហរដ្ឋអាមេរិក។ ដំណើរទស្សនកិច្ច ដែលក៏មានចុះផងដែរនូវកិច្ចសន្យាបញ្ជាទិញយន្តហោះប៊ូអ៊ីងរហូតដល់ទៅ ៣០០គ្រឿង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
យន្តហោះទាំង ៣០០គ្រឿង ដែលប៊ូអ៊ីងទទួលការបញ្ជាទិញ ពីក្រុមហ៊ុនចិន កាលពីថ្ងៃពុធម្សិលមិញនេះ មានតម្លៃជាទឹកប្រាក់រហូតដល់ទៅ ៣៨ពាន់លានដុល្លារ ដែលជាការបញ្ជាទិញដ៏ធំមិនធ្លាប់មានក្នុងវិស័យអាកាសចរណ៍ស៊ីវិល។ ជាការប្រៀបធៀប គេនៅចាំបានថា នៅពេលដែលលោកនាយករដ្ឋមន្រ្តីចិន លី ខឺឈាំង ទៅបំពេញទស្សនកិច្ចនៅរោងចក្រផលិតយន្តហោះ Airbus នៅទីក្រុង Toulouse ប្រទេសបារាំង ចិនបានបញ្ជាទិញយន្តហោះ Airbus តែ ៧៥គ្រឿង ហើយគិតជាទឹកប្រាក់តែ ១៨ពាន់លានដុល្លារតែប៉ុណ្ណោះ។
គួរបញ្ជាក់ថា យន្តហោះប៊ូអ៊ីងទាំង ៣០០គ្រឿង ដែលចិនបញ្ជាទិញនេះ គឺជាការបញ្ជាទិញរួមគ្នា សម្រាប់ក្រុមហ៊ុនអាកាសចរណ៍ចិន (Air China, China Southerne Airlines, China Eastern Airlines, … ) ព្រមទាំងក្រុមហ៊ុនរកស៊ីជួលយន្តហោះ។
នាយកផ្នែកអាកាសចរណ៍ស៊ីវិលនៃក្រុមហ៊ុនប៊ូអ៊ីងបានលើកឡើងថា ចិន គឺជាទីផ្សារដ៏ធំបំផុតរបស់ប៊ូអ៊ីង ដោយគេសង្កេតឃើញថា នៅក្នុងឆ្នាំ២០១៥នេះ ការនាំចេញរបស់ប៊ូអ៊ីង រហូតដល់ទៅ ២៥% គឺនាំចេញទៅកាន់ប្រទេសចិន។ ក៏ប៉ុន្តែ ក្នុងពេលជាមួយគ្នានេះ គេក៏សង្កេតឃើញផងដែរថា ចំណែកទីផ្សាររបស់ប៊ូអ៊ីងត្រូវក្រុមហ៊ុន Airbus ដណ្តើមយកបន្តិចម្តងៗ ចាប់តាំងពី Airbus ទៅបើករោងចក្រដំឡើងយន្តហោះនៅចិន កាលពីឆ្នាំ២០០៨។
ហេតុដូច្នេះហើយបានជាប៊ូអ៊ីងបានប្រកាសឲ្យដឹង កាលពីថ្ងៃពុធនេះថា ខ្លួនក៏នឹងទៅបើករោងចក្រដំឡើងយន្តហោះនៅក្នុងប្រទេសចិនដែរ ហើយការបើករោងចក្រនៅចិននេះនឹងត្រូវធ្វើឡើង ដោយសហការជាមួយក្រុមហ៊ុនផលិតយន្តហោះក្នុងស្រុករបស់ចិន។ ប៊ូអ៊ីងមិនបានបញ្ជាក់លម្អិតអំពីកាលបរិច្ឆេទ និងទីតាំង ដែលត្រូវដំឡើងរោងចក្រនេះនៅឡើយទេ ដោយគ្រាន់តែឲ្យដឹងថា នៅក្នុងជំហានដំបូង រោងចក្រនេះនឹងមិនធ្វើការដំឡើងតួយន្តហោះទាំងមូលនោះទេ គឺគ្រាន់តែលាបថ្នាំ និងរៀបចំផ្នែកខាងក្នុងយន្តហោះតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ