ហ្វីលីពីន ៖ ប្រធានាធិបតីឈ្នះឆ្នោតថ្មីចង់កែប្រែរដ្ឋធម្មនុញ្ញ
លោក រ៉ូដ្រីហ្កូ ឌុយទែរតេ Rodrigo Duterte បានជាប់ឆ្នោត នៅក្នុងការបោះឆ្នោតជ្រើសរើសប្រធានាធិបតីហ្វីលីពីនហើយ ! គូប្រជែងទាំងអស់បានប្រកាសទទួលស្គាល់បរាជ័យរៀងៗខ្លួន និងអបអរជ័យជំនះរបស់ របស់លោក ឌុយទែរតេ ជាប្រធានាធិបតីថ្មី។ អនាគតប្រធានាធិបតីថ្មី ដែលនឹងត្រូវស្បថចូលកាន់តំណែងនៅថ្ងៃទី ៣០មិថុនា បានប្រកាសឱ្យដឹងនៅថ្ងៃនេះ អំពីចេតនាចង់សើរើមើលការរៀបចំប្រទេសឱ្យដល់ឬសគល់ ពោលគឺចង់ប្តូររដ្ឋធម្មនុញ្ញតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២១
កើតនៅថ្ងៃទី ២៨ មីនា ១៩៤៥ លោក រ៉ូដ្រីហ្កូ ឌុយទែរតេ Rodrigo Duterte គឺជាមេធាវី ជាអ្នកនយោបាយហ្វីលីពីនម្នាក់ ដែលចាប់ផ្តើមលេចឈ្មោះ បោះសំឡេងនៅឆ្នាំ១៩៨៨ ពេលបានក្លាយជាអភិបាលក្រុង Davao ក្រុងធំទីបួនរបស់ហ្វីលីពីន។ លោកត្រូវបានគេចាត់ទុកជាចៅហ្វាយក្រុង យូរជាងគេ ដោយបានកាន់កាប់តួនាទីចំនួន ៧ អាណត្តិ ពោលគឺជាង២២ឆ្នាំ។
មានប្រជាប្រិយភាពខ្លាំង នៅថ្នាក់តំបន់ ដោយសារតែនយោបាយមិនអនុគ្រោះសោះដល់ពួកឧក្រិដ្ឋជន រហូតដល់ទស្សនាវដ្តី Time បានប្រសិទ្ធិនាមថា អ្នកផ្តន្ទាទោស។ ក្នុងរយៈពេលជាង២០ឆ្នាំ ក្រុងDavao ដែលល្បីឈ្មោះក្នុងអតីតកាលជាក្រុងឧក្រិដ្ឋកម្ម បានក្លាយជាក្រុងដ៏មានសុវត្ថិភាពជាងគេបំផុត ប្រចាំតំបន់អាស៊ីអាគ្នេយ៍ នេះបើតាមការពិព័ណនារបស់ភ្នាក់ងារទេសចរណ៍ផ្សេងៗ។
លោក ធ្លាប់បានឈរឈ្មោះជាបេក្ខជនប្រធានាធិបតី ចំនួន៧ដងរួចមកហើយ។ គឺទើបតែនៅលើកនេះប៉ុណ្ណោះ ដែល Rodrigo Duterte បានទទួលជ័យជំនះ និងក្លាយជាប្រធានាធិបតីហ្វីលីពីនដំបូងគេ ដែលគ្មានត្រកូល និងក្រុមគ្រួសារ ខ្សែរយៈជាអ្នកធ្លាប់គ្រប់គ្រងអំណាច នៅក្នុងប្រទេស។
សូមបញ្ជាក់ថា ក្រោយការដួលរលំទៅនៃរបបផ្តាច់ការ ម៉ាកូស និងថ្វីបើស្ថិតនៅក្នុងគន្លងលទ្ធិប្រជាធិបតេយ្យ ជ្រើសរើសថ្នាក់ដឹកនាំតាមរយៈការបោះឆ្នោតដោយសេរីក្តី ក៏ឈ្មោះប្រធានាធិបតីនិងថ្នាក់ដឹកនាំ មានត្រកូលដដែលៗ សឹងជារាជ្យវង្សតែមួយ ជាបក្សពួកតែមួយ។ លោក Mar Roxas នៃបក្សកាន់អំណាចផុតអាណត្តិ ដែលស្ថិតនៅលំដាប់ទីពីរ ដោយបានទទួលសំឡេងគាំទ្រតិចជាងលោក ឌុយទែរតេ ជិតពីរដងនោះ ក៏មានជីតាធ្លាប់ជាប្រធានាធិបតីហ្វីលីពីន ក្រោយសង្គ្រាមលោកលើកទីពីរភ្លាមដែរ។
ប្តូររដ្ឋធម្មនុញ្ញ
ក្នុងអំឡុងពេលឃោសនាបោះឆ្នោត លោក ឌុយទែរតេ មានអាទិភាពធំសំខាន់ពីរ ៖ ប្រយុទ្ធប្រឆាំងនឹងឧក្រិដ្ឋកម្ម លុបបំបាត់អំពើពុករលួយ និងកាត់បន្ថយភាពក្រីក្រ វិសមភាពសង្គម។
ជាមួយនឹងប្រធានាធិបតីថ្មី ហ្វីលីពីនទំនងជានឹងត្រូវភ្លេច ពាក្យថា “សិទ្ធិមនុស្ស” ព្រោះលោកឌុយទែរតេ បានសន្យានិងគំរាមសម្លាប់តែម្តង ប្រសិនបើរឹងទទឹង មិនគោរពច្បាប់ សូម្បីតែថ្នាក់ដឹកនាំជាន់ខ្ពស់ក៏ត្រូវទទួលទោសបែបនេះដូចគ្នា។
នៅថ្ងៃអង្គារនេះទៀត លោក ឌុយទែរតេ បានប្រកាសចេតនាចង់កែប្រែរដ្ឋធម្មនុញ្ញ ដោយប្តូរប្រព័ន្ធដឹកនាំប្រទេស បែបប្រធានាធិបតីនិយម (ដូចនៅសហរដ្ឋអាមេរិក) ទៅជាប្រព័ន្ធដឹកនាំអាស្រ័យសភា នៃរដ្ឋសហព័ន្ធវិមជ្ឈការ មិនមែនរដ្ឋឯកភាពតែមួយដូចពេលនេះឡើយ។ ការធ្វើបែបនេះនឹងផ្តល់អំណាចច្រើនដល់ថ្នាក់ខេត្ត។
ការសើរើសរសេររដ្ឋធម្មនុញ្ញថ្មីនេះ វាស៊ីចង្វាក់គ្នាទៅនឹងប្រសាសន៍របស់ ឌុយទែរតេ ដែលចង់ប្រយុទ្ធប្រឆាំងនឹងពួកអ្នកកាន់អំណាច-ឥស្សរជនជាន់ខ្ពស់មួយក្តាប់តូច និងដើម្បីមួយក្រុមតូចមានអំណាចជ្រុលពេក នៅក្រុងម៉ានីល។
ស្តីអំពីជម្លោះក្នុងសមុទ្ទចិនខាងត្បូង រដ្ឋាភិបាលរបស់លោក ឌុយទែរតេ នឹងបន្តធ្វើការចរចាពហុភាគី ដើម្បីដោះស្រាយវិបត្តិជាមួយចិន ដោយរាប់បញ្ចូលជប៉ុន អូស្ត្រាលី និងអាមេរិកផង ថាជាភាគីសំខាន់របស់តំបន់ដែរ។ ប៉ុន្តែខាងផ្នែកសេដ្ឋកិច្ច គេដូចជាមិនសូវឃើញមានកម្មវិធីអ្វីច្បាស់លាស់ដើម្បីជំរុញ និងភ្ជោចកំណើនសេដ្ឋកិច្ចដែលមានស្រាប់ក្នុងលំដាប់៦%ទេ។
ចង់ប្តូរផ្លាស់ជាងគិតដល់របបផ្តាច់ការ
តាំងពីមុនថ្ងៃបោះឆ្នោតមក គ្រប់គ្នាសុទ្ធតែបានលើកឡើងអំពីហានិភ័យនៃការវិលត្រលប់ទៅរករបបផ្តាច់ការនៅហ្វីលីពីន។ លោកប្រធានាធិបតីផុតអាណត្តិ អាគីណូ បានស្នើឱ្យបេក្ខជនផ្សេងៗ ចងសម្ព័ន្ធជាធ្លុងមួយ ដើម្បីធ្វើជារនាំងទប់ស្កាត់លោក ឌុយទែរតេ។
ក្រុមអ្នកប្រឆាំងប្រឹងធ្វើគ្រប់យ៉ាង និងបានព្រមានអំពីគ្រោះត្រលប់ទៅរករបបផ្តាច់ការបែបថ្មីឡើងវិញនៅហ្វីលីពីន ប៉ុន្តែពាក្យគំរាមអស់នេះ គ្មានន័យ និងមិនអាចហាមឃាត់ពលរដ្ឋហ្វីលីពីនដែលសេចក្តីស្រេកឃ្លានខ្លាំងចង់បានការប្តូរផ្លាស់នោះទេ។
ម្យ៉ាងវិញទៀត ថ្វីត្បិតតែនៅពេលធ្វើយុទ្ធនាការ បេក្ខជនឌុយទែរតេ បានប្រើពាក្យសំឡុតគំរាម ព្រមានបិទសភាមែន តែនៅថ្ងៃនេះនៅពេលប្រកាសជ័យជំនះ លោក បានលាដៃទៅរកបក្សប្រឆាំង រកការផ្សះផ្សាជាតិឱ្យបានជាសះស្បើយ គឺមិនឱ្យត្រលប់ទៅរកគ្រោះភ័យ មហន្តរាយកើតមានដល់ប្រទេសទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ