ភេរវកម្មនៅថៃ៖ឃុំមនុស្សចំនួន ១៥នាក់ តែអាថ៌កំបាំងនៅបន្តមាន
នៅក្នុងប្រទេសថៃ កងទ័ពបានប្រកាសឲ្យដឹងនៅថ្ងៃព្រហស្បតិ៍ ទី១៨សីហានេះថា មានមនុស្សសង្ស័យចំនួន ១៥នាក់ត្រូវបានឃុំខ្លួននៅក្នុងក្របខ័ណ្ឌនៃការស៊ើបអង្កេតស្តីពីអំពើភេរវកម្មជាច្រើនកន្លែងកាលពីថ្ងៃទី១១ និងថ្ងៃទី១២ សីហាកន្លងទៅ។ តែគេនៅមិនទាន់ដឹងថា តើជនសង្ស័យឃុំខ្លួនទាំង ១៥នាក់នោះមានអត្តសញ្ញាណអ្វីខ្លះទេ ហើយមកដល់ថ្ងៃនេះ ក៏នៅមិនទាន់មានជន និងចលនាណាមួយចេញសារភាពជាស្នាដៃរបស់ខ្លួនឡើយ។
ចុះផ្សាយនៅថ្ងៃ៖
ស្តាប់ - ០២:០១
ពីដំបូង រដ្ឋអំណាចបានឃាត់ខ្លួនជនសង្ស័យចំនួន ១៧នាក់ តែបានសម្រេចដោះលែងចំនួន ២នាក់វិញ នេះជាការប្រកាសរបស់អ្នកតំណាងរបបសឹកលោកវរសេនីយ៍ឯកប៊ូរិន តុងប្រាប៉ៃនាថ្ងៃព្រហស្បតិ៍ ទី១៨សីហា។ ក៏ប៉ុន្តែ អ្នកតំណាងរបបសឹករូបនេះមិនបានបញ្ជាក់ទេថា តើជនសង្ស័យឃុំខ្លួនទាំង ១៥នាក់នោះត្រូវបានចោទប្រកាន់ពីបទអ្វីខ្លះ មានអត្តសញ្ញាណយ៉ាងម៉េច និងត្រូវឃុំខ្លួនក្នុងរយៈពេលប៉ុន្មានថ្ងៃដែរ។
នៅក្នុងប្រទេសថៃ កងទ័ពមានសិទ្ធិឃុំខ្លួនជនសង្ស័យរហូតដល់ ៧ថ្ងៃដើម្បីសួរចម្លើយ មុននឹងប្រគល់ទៅឲ្យប៉ូលិសចោទសួរជាបន្តទៀត។ ករណីជនសង្ស័យទាំង ១៥រូបនឹងត្រូវកងទ័ពបញ្ជូនទៅឲ្យប៉ូលិសនៅថ្ងៃសុក្រ ទី១៩ សីហា។ សូមរម្លឹកជូនថាកាលពីថ្ងៃទី១១ និងថ្ងៃទី១២ សីហាកន្លងទៅ មានគ្រាប់បែកឆ្នៃចំនួន ១១គ្រាប់ត្រូវបានជនមិនស្គាល់មុខបំផ្ទុះនៅតំបន់មួយចំនួនស្ថិតប៉ែកខាងត្បូង ពិសេសតំបន់ទេសចរណ៍មាត់សមុទ្រចំនួនពីរដែលបណ្តាលឲ្យមានមនុស្សស្លាប់ចំនួន ៤នាក់ និងរបួសជាច្រើននាក់ ក្នុងនោះមានអ្នកទេសចរណ៍បរទេសចំនួន ១០នាក់។
មួយសប្តាហ៍ក្រោយព្រឹត្តិការណ៍ភេរវកម្មនោះមក គ្មានព័ត៌មានលំអិតណាមួយបានបែកធ្លាយពីការស៊ើបអង្កេត ហើយក៏នៅមិនទាន់មានជន ឬចលនាណាមួយចេញមុខសារភាពជាស្នាដៃរបស់ខ្លួនដែរ។ ចំណែកប៉ូលិសបានបដិសេធមិនទម្លាក់ការសង្ស័យលើជន ឬក្រុមណាមួយទេ។ តែរបបសឹកបានផ្តោតលើវិច្ឆេទកម្មក្នុងស្រុករៀបចំដោយក្រុមប្រឆាំងជាជាងដោយក្រុមភេរវជនបរទេស។ នៅក្នុងន័យនេះ ក្រុមអ្នកឯកទេសបានលើកឡើងថា អាចជាស្នាដៃរបស់ពួកប្រឆាំងដែលគេស្គាល់ជាពួកអាវក្រហមដើម្បីសងសឹក ឬមួយជាស្នាដៃរបស់ក្រុមឧទ្ទាមអ្នកទាមទារផ្តាច់ទឹកដីនិយមនៅប៉ែកខាងត្បូង។
យ៉ាងណាក៏ដោយ គណបក្សប្រឆាំងតាមរយៈលោកស្រីអតីតនាយករដ្ឋមន្រ្តីថៃយីងឡាក់បានចេញមុខទាត់ចោលការទទួលខុសត្រូវគ្រប់យ៉ាងនៅក្នុងអំពើភេរវកម្មនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ