ផ្កាយរណបថតបានសកម្មភាពផលិតមីស៊ីលចម្ងាយឆ្ងាយរបស់កូរ៉េខាងជើង
ថ្នាក់ដឹកនាំយោធារបស់កូរ៉េខាងជើង និងកូរ៉េខាងត្បូងបានជួបពិភាក្សាគ្នា នៅថ្ងៃអង្គារទី ៣១កក្កដា នៅតំបន់គ្មានកងទ័ព នៅព្រំដែនប្រទេសទាំងពីរ។ នៅពេលអ្នកនាំពាក្យរបស់ក្រសួងការពារជាតិកូរ៉េខាងត្បូង បានលើកឡើងពីវិធានការកាត់បន្ថយវត្តមានកងទ័ពរបស់ប្រទេសទាំងពីរ នៅតាមព្រំដែន ទីភ្នាក់ងារស៊ើបការណ៍សម្ងាត់របស់អាមេរិកវិញ បង្ហាញថា កូរ៉េខាងជើង នៅតែកំពុងបន្តសកម្មភាពផលិតមីស៊ីលចម្ងាយឆ្ងាយ ដែលអាចហោះទៅដល់ទឹកដីអាមេរិក។
ចុះផ្សាយនៅថ្ងៃ៖
វិធានការកាត់បន្ថយកងទ័ព នៅតាមព្រំដែន អាចជាសញ្ញាវិជ្ជមាន នៅក្នុងកិច្ចប្រឹង កាត់បន្ថយភាពតានតឹង និងការមិនទុកចិត្តគ្នារវាងបងប្អូនកូរ៉េទាំងពីរ ប៉ុន្តែ ជាមួយគ្នានេះ កូរ៉េខាងជើងកំពុងតែត្រូវបានក្រុងវ៉ាស៊ីនតោនសង្ស័យថា មិនបានកាត់បន្ថយសកម្មភាពយោធារបស់ខ្លួនទាល់តែសោះ នៅក្រោយជំនួបកំពូលជាមួយ លោកប្រធានាធិបតីអាមេរិក ដូណាស់ ត្រាំ។
តាម អ្នកទទួលខុសត្រូវអាមេរិកម្នាក់ដែលបាននិយាយប្រាប់ទីភ្នាក់ងារព័ត៌មានអង់គ្លេស Reuters ផ្កាយរណបរបស់ទីភ្នាក់ងារ ស៊ើបការណ៍សម្ងាត់របស់អាមេរិក នៅប៉ុន្មានសប្តាហ៍ចុងក្រោយនេះ ចាប់បានរូបភាពជាច្រើនដែលបង្ហាញពីសកម្មភាពដ៏មមាញឹក នៅរោងចក្រ មួយ ដែលធ្លាប់ជាទីតាំងផលិតមីស៊ីលបាលីស្ទីក ចម្ងាយឆ្ងាយ ដែលអាចបាញ់ហោះដល់ទឹកដីអាមេរិក។ ការលើកឡើងរបស់មន្រ្តីអាមេរិក បានបញ្ជាក់ការចុះផ្សាយរបស់កាសែតអាមេរិក Washington Post ដែល កាលពីថ្ងៃចន្ទម្សិលមិញ បានដកស្រង់ទីភ្នាក់ងារស៊ើបការណ៍សម្ងាត់អាមេរិកថា កូរ៉េខាងជើង កំពុងបន្តផលិត យ៉ាងហោច ណាស់មីស៊ីលអន្តរទ្វីបមួយដើម ឬ ក៏ពីរដើម នៅរោងចក្រស្រាវជ្រាវមួយកន្លែង ក្បែរក្រុងព្យុងយ៉ាង។
តាមកាសែតWashington Post រូបភាពរបស់ផ្កាយរណបទីភ្នាក់ងារស៊ើបការណ៍សម្ងាត់អាមេរិកមិនបានបង្ហាញពីការបង្កើនសមត្ថភាពយោធារបស់កូរ៉េខាងជើងទេ ប៉ុន្តែ វាបានឆ្លុះបញ្ចាំងឲ្យឃើញថា កូរ៉េខាងជើង នៅតែបន្តសកម្មភាព សម្រួចសម្រាំងសព្វាវុធរបស់ខ្លួន ទោះនៅក្រោយបានបើកជំនួបកំពូលជាមួយប្រធានាធិបតី អាមេរិក។
ការចុះផ្សាយរូបភាពផ្កាយរណប ដែលបង្ហាញពីសកម្មភាពផលិតមីស៊ីលរបស់កូរ៉េខាងជើង ធ្វើឡើងនៅតែប៉ុន្មានថ្ងៃក្រោយដែលប្រមុខការបរទេសអាមេរិក លោកMike Pompeo ទើបបាននិយាយទទួលស្គាល់ នៅក្នុងសវនាការរបស់ព្រឹទ្ធសភាអាមេរិកថា កូរ៉េខាងជើង គឺនៅតែបន្តផលិតសារធាតុនុយក្លេអ៊ែរ។
សម្រាប់មន្រ្តី និងអ្នកជំនាញអាមេរិកខាងផ្នែកអាវុធនុយក្លេអ៊ែរកូរ៉េខាងជើង គេមិនភ្ញាក់ផ្អើលទេ ដែលថា រោងចក្រផលិតមីស៊ីលកូរ៉េខាងជើងនៅតែមានសកម្មភាពមមាញឹក ពីព្រោះថា មេដឹកនាំកូរ៉េខាងជើងផ្ទាល់ ក៏មិនបានសន្យាអ្វីទេ នៅក្នុងជំនួបកំពូលជាមួយ លោកដូណាល់ ត្រាំ។ នៅក្នុងជំនួបកំពូលអាមេរិក កូរ៉េខាងជើង នៅប្រទេសសិង្ហបុរី កាលពីថ្ងៃទី ១២មិថុនាកន្លងទៅ លោកគីម ជុងអ៊ុនគ្រាន់តែបញ្ជាក់ពីការចូលរួមរបស់កូរ៉េខាងជើង នៅក្នុងលុបបំបាត់ចោល ទាំងស្រុង អាវុធនុយក្លេអ៊ែរ នៅឧបទ្វីបកូរ៉េតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ