តែពីរថ្ងៃក្រោយព្យុះសង្ឃរា ជប៉ុន រងគ្រោះរញ្ជួយដីមរណៈ
ទើបរងគ្រោះទឹកជំនន់ដ៏ខ្លាំងក្លានៅភាគខាងលិចប្រទេស ព្យុះសង្ឃរាដ៏កំណាចចេប៊ីមិនទាន់រសាត់ទៅផុតស្រួលបួលផង ថ្ងៃពុធនេះ រងគ្រោះរញ្ជួយដីដ៏ធ្ងន់ធ្ងរមួយ ក្នុងកំរិត ៧,៦បានកើតឡើង នៅភាគខាងជើងនៃប្រទេស ក្នុងកោះហុកកៃដូ។ មានស្លាប់យ៉ាងហោចណាស់ ៤នាក់ បាត់ខ្លួន៣៣នាក់ និងរបួសជាង១២០នាក់។
ចុះផ្សាយនៅថ្ងៃ៖ កែប្រែថ្ងៃទី៖
តុល្យការនៃជនរងគ្រោះនឹងកើនឡើងជាលំដាប់ ទៅតាមលទ្ធផលនៃប្រតិបត្តិការសង្គ្រោះ និង បើតាមទូរទស្សន៍ជាតិ មានជនរងគ្រោះធ្ងន់៦នាក់ផ្សេងទៀត អាចនឹងត្រូវប្រកាសស្លាប់ជាផ្លូវការ។
ព្រះធរណីបានចាប់រញ្ចួយ នៅវេលាម៉ោង បីទៀបភ្លឺ ចម្ងាយតែប្រមាណតែ៦៥គីឡូម៉ែត្រពីក្រុង Sapporo ក្រុងដ៏ធំជាងគេរបស់កោះហុកកៃដូ ក្នុងជម្រៅ៤០គីឡូម៉ែត្រ។ តំបន់ជុំវិញ ក៏រងការខូចខាតយ៉ាងដំណំ ជាមួយនឹងការបាក់ដីរាប់កន្លែង។ កូនភ្នំខ្លះត្រូវបានចិត ដោយការបាក់ដីទាំងផ្ទាំងៗ ដើមឈើដួលរលំរលើងឬស ...
អាកាសយានដ្ឋានដ៏ធំជាងគេប្រចាំកោះហុកកៃដូ ត្រូវបិទ ជាមួយការលុបជើងហោះហើរជាង២០០ជើង និងក្នុងខណៈដែលអាកាសយានដ្ឋានអន្តរជាតិកងសៃ ក៏បានបិទ ដោយហេតុតែរងគ្រោះដោយព្យុះសង្ឃរាចេប៊ីកាលពីបីថ្ងៃមុន។
ចរាចរណ៍ផ្លូវដែក ត្រូវបានកាត់ផ្តាច់ទាំងស្រុង នៅទូទាំងកោះហុកកៃដូ ដែលធំប៉ិនប្រទេសអូទ្រីសតែម្តង។ ប្រជាជនជាង៥,៣លាននាក់ គ្មានអគ្គីសនីប្រើប្រាស់ យ៉ាងហោចក្នុងរយៈពេល១២ម៉ោងដំបូងនៃការរញ្ជួយដី មុននឹងភ្នាក់ងារចាប់ផ្តើមភ្ជាប់បណ្តាញជាបណ្តើរៗឡើងវិញ នៅតាមក្រុងធំៗ។ ក្រុមហ៊ុនអគ្គីសនីហុកកៃដូ បង្ខំចិត្តត្រូវផ្តាច់ភ្លើងដើម្បីជាកិច្ចការពារ ប៉ុន្តែក្រុមហ៊ុនមិនអាចធានាថាពេលណាអាចដាក់ឱ្យដំណើរការពេញលេញវិញបានទេ។ បើតាមរដ្ឋមន្ត្រីក្រសួងពាណិជ្ជកម្មនិងឧស្សាហកម្ម គេត្រូវការពេលវេលាយ៉ាងហោចណាស់ក៏មួយសប្តាហ៍ដែរ ទម្រាំអាចបើកមជ្ឈមណ្ឌលអគ្គិសនីដែលរងការខូតខាតដោយសារការរញ្ជួយដី ឱ្យមានដំណើរការត្រឹមត្រូវវិញបាន។
ជាសំណាងល្អ មជ្ឈមណ្ឌលនុយក្លេអ៊ែរដែលអាជ្ញធរជប៉ុនបានបិទតាំងពីឆ្នាំ២០១១មកមិនរងការប៉ះពាល់ខ្លាំង។ លោកនាយករដ្ឋមន្ត្រីបានប្រកាសបញ្ជូនកងកម្លាំងយោធាស្វ័យការពារ ចំនួន ២៥០០០នាក់ ដើម្បីចូលរួមក្នុងប្រតិបត្តិការសង្គ្រោះ។ គណបក្សសេរីប្រជាធិបតេយ្យរបស់លោកស្ហ៊ីនហ្សូ អាបេ ដែលត្រូវបើកយុទ្ធនាការឃោសនាបោះឆ្នោតក្នុងបក្ស នៅថ្ងៃសុក្រស្អែក បានប្រកាសផ្អាករាល់គ្រប់សកម្មភាពរហូតដល់ថ្ងៃអាទិត្យ។
ជប៉ុនមានទីតាំងភូមិសាស្ត្រនៅចំលើខ្សែក្រវាត់ភ្នំភ្លើងប៉ាស៊ីហ្វិក ទើបងាយរងគ្រោះរញ្ជួយដី។ កាលពីថ្ងៃសៅរ៍ ជប៉ុនទើបបានប្រារព្វខួប៩៥ឆ្នាំនៃការរញ្ជួយដីមរណៈប្រចាំសតវត្សរ៍ ដែលបានសម្លាប់ជីវិតមនុស្សនៅតំបន់តូក្យូ-យូកូហាម៉ា អស់ ១៤ម៉ឺននាក់ នៅថ្ងៃទី ១កញ្ញា១៩២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ