ទឹកស្ទឹង-ទន្លេ លើពិភពលោក ភាគច្រើនមានផ្ទុកថ្នាំផ្សះ លើកំរិតសុវត្ថិភាព
ពីអឺរ៉ុបដល់អាស៊ី ដោយមិនភ្លេចទេអាហ្វ្រិក ពោលគឺ គ្មានទ្វីបមួយណា បានរួចពីគ្រោះប្រឈមនឹងបរិស្ថានពុលដោយថ្នាំផ្សះទេ។ បើតាមការសិក្សាទើបចេញផ្សាយនៅសប្តាហ៍នេះបានបង្ហាញថា អង់ទីប៊ីយូទិក ឬថ្នាំផ្សះ មានឆ្លងសាយភាយទៅក្នុងទឹកស្ទឹងទន្លេ នៅទូទាំងពិភពលោក។ ហើយនៅក្នុងតំបន់ខ្លះ ជាពិសេសអាស៊ីនិងអាហ្វ្រិក បរិមាណជាតិថ្នាំផ្សះក្នុងទឹកឡើងខ្ពស់ជាងកំរិតសុវត្ថិភាព ដល់ទៅបីរយដង។
ចុះផ្សាយនៅថ្ងៃ៖ កែប្រែថ្ងៃទី៖
គ្មានទ្វីបមួយគេចរួចពីការសាយភាយនៃថ្នាំអង់ទីប៊ូយូទិក ក្នុងបរិស្ថានទេ។ របាយការណ៍របស់ក្រុមអ្នកស្រាវជ្រាវវិទ្យាសាស្ត្រនៃសាកលវិទ្យាល័យYork ដាក់ជូនទៅអង្គសន្និសីទ ស្តីពីការជាតិពុលនិងគីមីនៅក្នុងបរិស្ថាន នៅទីក្រុងហែលសិនគី បានបង្ហាញថា ថ្នាំផ្សះបានឆ្លងទៅបំពុលប្រភពទឹកស្ទឹងទន្លេនៅពិភពលោកមួយចំនួនធំ។ នៅក្នុងចំណោមទឹកស្ទឹងទន្លេ ចំនួន៧១១ ក្នុងប្រទេសចំនួន៧២ នៃទ្វីបទាំង៦របស់ផែនដី ដែលអ្នកស្រាវជ្រាវ បានចុះទៅសិក្សា ៦៥%មានលាយធាតុថ្នាំផ្សះ យ៉ាងហោចក៏មួយប្រភេទដែរ លើពពួកថ្នាំផ្សះចំនួន១៤មុខ។
ពីមុនមកការសិក្សា តាមដានមើលជាតិថ្នាំអង់ទីប៊ីយូទិកក្នុងប្រភពទឹកធ្វើឡើងតែនៅអឺរ៉ុប អាមេរិកខាងជើង និងប្រទេសចិន ហើយចំពោះតែពពួកថ្នាំផ្សះពីរបីប្រភេទប៉ុណ្ណោះ។ ឯការសិក្សាថ្មីនេះ បានមកបំពេញនិងផ្តល់ដំណឹងបន្ថែម នូវកង្វះខាតពីមុន។
ជាលទ្ធផល ដ៏គួរឱ្យព្រឺខ្លាចនិងស្លុតចិត្ត ធាតុថ្នាំអង់ទីប៊ីយូទិកប្រើសម្រាប់ប្រឆាំងនឹងការចម្លងរោគនៅលើស្បែក និងក្នុងមាត់ មានកំរិតដល់ទៅ៣០០ដងលើសកំរិតសុវត្ថិភាព នៅក្នុងទឹកទន្លេប្រទេសបង់ក្លាដែស និង ទន្លេTamiseរបស់អង់គ្លេស។ ថ្នាំអង់ទីប៊ីយូទិកប្រឆាំងនឹងការរលាកតម្រងនោម ត្រូវបានគេរកឃើញជាញឹកញាប់ក្នុងទឹកញឹកញាប់ជាងគេ។ ចំណែកសារធាតុផ្សំនៃថ្នាំផ្សះCiprofloxacine សម្រាប់ព្យាបាលប្រឆាំងនឹងការបង្ករោគធ្ងន់ៗ ដូចជារលាកសួត រលាកផ្លូវដណ្តើម ... មានឆ្លងដល់ទឹកទន្លេក្នុងបរិមាណហួសកំរិតសុវត្ថិភាពញយជាងគេ។
កំរិតកំហាប់ធាតុផ្សំថ្នាំផ្សះក្នុងទឹកស្ទឹងទន្លេ ហួសបទដ្ឋានសុវត្ថិភាព មានច្រើនជាងគេនៅអាស៊ីនិងអាហ្វ្រិក ដូចជានៅបង់ក្លាដែស កេនយ៉ា ហ្កាណា ប៉ាគីស្ថាន និងនីហ្សេរីយ៉ា ជាដើម។ ប៉ុន្តែទ្វីបផ្សេងទៀតក៏មិនស្អាតជាងនេះប៉ុន្មានដែរ ៗ ការសាយភាពធាតុថ្នាំផ្សះក្នុងទឹកទន្លេ ជាបញ្ហាថ្នាក់ពិភពលោក។
រកឃើញនៅឆ្នាំ១៩២០ ថ្នាំផ្សះបានជួយសង្គ្រោះជីវិតមនុស្សបានរាប់សិបលាននាក់ពីជំងឺបង្កឡើងដោយបាត់តេរី (រលាកសួត របេង និងរលាកស្រោមខួរក្បាល)។ ប៉ុន្តែពីមួយទសវត្សរ៍ទៅមួយទសវត្សរ៍ បាក់តេរីកាន់តែធន់នឹងថ្នាំផ្សះឡើង រហូតដល់អង្គការសហប្រជាជាតិទាញសញ្ញាអាសន្ន កាលពីខែមុនអំពីគ្រោះខ្វះថ្នាំផ្សះប្រកបដោយប្រសិទ្ធភាព។
ការស៊ាំនឹងថ្នាំផ្សះបណ្តាលមកពីការប្រើប្រាស់ថ្នាំមិនត្រឹមត្រូវ និងមិនគ្រប់គ្រាន់ ឬខុសកាល។ តែវត្តមាននៃធាតុថ្នាំក្នុងបរិស្ថាន ក្នុងទឹកទន្លេស្ទឹង ក៏ជាចំណែកមួយដ៏សំខាន់ជំរុញឱ្យបាក់តេរីស៊ាំនឹងថ្នាំផ្សះ។ ដើម្បីដោះស្រាយបញ្ហានេះ ពិភពលោកចាំបាច់ត្រូវធ្វើវិនិយោគរថានាសម្ព័ន្ធចាត់ចែងសំរាមនិងទឹកកខ្វក់ កុំឱ្យហូរជ្រាបទៅដល់ប្រភពទឹកទាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ