ឥណ្ឌាផ្តើមកំណែទម្រង់លើវិស័យធនាគារ ខណៈប្រទេសបន្តស្គាល់កំណើនសេដ្ឋកិច្ចថមថយ
នៅក្នុងប្រទេសឥណ្ឌា រដ្ឋាភិបាលបានប្រកាសឲ្យដឹងនាថ្ងៃសុក្រ ទី៣០ សីហាពីការផ្តើមធ្វើកំណែទម្រង់ស៊ីជ្រៅលើវិស័យធនាគារ។ សេចក្តីប្រកាសនេះបានធ្លាក់មក ខណៈដែលប្រទេសបានស្គាល់កំណើនសេដ្ឋកិច្ចថមថយរយៈពេល ៥ត្រីមាសជាប់ៗគ្នា។ សម្រាប់ត្រីមាសទី១ ឆ្នាំ ២០១៩ ឥណ្ឌាមានកំណើនសេដ្ឋកិច្ចត្រឹម ៥% ពោលតិចជាងការប្រមើលទុករបស់ក្រុមអ្នកវិភាគដែលមាន ៥,៧%។ គួររម្លឹកថា តាំងពីលោកណារិន ដ្រា ម៉ូឌីឡើងកាន់តំណែងជានាយករដ្ឋមន្រ្តីក្នុងឆ្នាំ ២០១៤ ឥណ្ឌាបានស្គាល់កំណើនសេដ្ឋកិច្ចក្នុងរង្វង់ ៧%។
ចុះផ្សាយនៅថ្ងៃ៖
ស្តាប់ - ០២:៣១
ក្នុងរយៈពេល ៥ត្រីមាសជាប់គ្នា ឥណ្ឌាដែលថ្មីៗធ្លាប់ស្គាល់កំណើនសេដ្ឋកិច្ចក្នុងរង្វង់ ៧% បានធ្លាក់មកនៅត្រឹមប្រមាណជា ៥% ប៉ុណ្ណោះ។ ចំណែកអត្រាអ្នកការងារធ្វើក៏បានឡើងដល់កម្រិតមួយខ្ពស់គិតតំាងពីទសវត្សឆ្នាំ ៧០។ មានហេតុផលសំខាន់ចំនួនពីរដែលបានធ្វើឲ្យកំណើនសេដ្ឋកិច្ចឥណ្ឌាស្គាល់ភាពថមថយ ទី១ ការចាយវាយរបស់ពលរដ្ឋហាក់នៅទ្រឹង និងទី២ វិបត្តិកង្វះសាច់ប្រាក់ដែលបានជំរុញរដ្ឋាភិបាលរបស់លោកនាយករដ្ឋមន្រ្តីណារិនដ្រា ម៉ូឌីឲ្យផ្តើមកំណែទម្រង់លើវិស័យធនាគារ។ តាមរយៈកំណែទម្រង់មួយនេះត្រូវបានក្រុងញូដែលីសង្ឃឹមថា នឹងអាចជួយផ្តល់សន្ទុះកំណើនសេដ្ឋកិច្ចនៅត្រីមាសខាងមុខ។
នៅក្នុងកំណែទម្រង់លើវិស័យធនាគារត្រូវបានរដ្ឋមន្រ្តីក្រសួងហិរញ្ញវត្ថុលោកស្រីនៀម៉ាឡា ស៊ីថារ៉ាម៉ាប្រាប់ឲ្យដឹងថា ត្រូវចាប់ផ្តើមពីការច្របាច់បញ្ចូលគ្នារវាងធនាគាររដ្ឋចំនួន ១០ ឲ្យទៅជា៤ ធនាគារវិញ ហើយធនាគារថ្មីទាំង ៤ បូកបញ្ចូលគ្នានឹងមានសាច់ប្រាក់សកម្មសរុបជាង ៧១០ ០០០លានដុល្លារ ហើយរដ្ឋាភិបាលនឹងបន្ថែមលុយជាង ៧ ០០០លានដុល្លារ។ ជាមួយនឹងកំណែទម្រង់នេះ ធនាគារដែលគ្រប់គ្រងដោយរដ្ឋនឹងធ្លាក់ពី ២៧ធនាគារមកនៅត្រឹម ១២ធនាគារប៉ុណ្ណោះ។ ថ្មីៗនេះ និងដើម្បីជួយបំពេញកង្វះសាច់ប្រាក់ ធនាគារកណ្តាលបានបញ្ជូនលុយទៅឲ្យរដ្ឋាភិបាលចំនួន ២៤ ០០០លានដុល្លារ។
លោករ៉ាហ្ស៊ី គូម៉ារដ្ឋលេខាធិការក្រសួងហិរញ្ញវត្ថុបានថ្លែងថា ធនាគារដើរតួនាទីសំខាន់នៅក្នុងវិស័យសេដ្ឋកិច្ច តែដើម្បីអាចដើរតួនាទីមួយនេះបាន ធនាគារត្រូវមានសមត្ថភាពផ្តល់ប្រាក់កម្ចីឲ្យបានច្រើនជាងនេះ។ ក្រៅពីធ្វើកំណែទម្រង់លើវិស័យធនាគារ រដ្ឋាភិបាលក្រុងញូដែលីក៏បានពិចារណាលើផ្នែកផ្សេង ពិសេសបន្ធូរបន្ថយការរឹតបន្តឹងលើក្រុមអ្នកវិនិយោគបរទេសសម្រាប់វិស័យគន្លឹះចំនួន ៤ ដូចជាអាជីវកម្មរ៉ែធ្យូងថ្មជាដើម។ គួររម្លឹកថា តាំងពីលោកណារិន ដ្រា ម៉ូឌីឡើងកាន់តំណែងជានាយករដ្ឋមន្រ្តីក្នុងឆ្នាំ ២០១៤ ឥណ្ឌាបានស្គាល់កំណើនសេដ្ឋកិច្ចក្នុងរង្វង់ ៧%។ តែឥណ្ឌានៅមិនទាន់អាចបង្កើតការងារគ្រប់គ្រាន់សម្រាប់ពលរដ្ឋឥណ្ឌាចំនួន ១ ២០០ ០០០នាក់ដែលបានចូលក្នុងទីផ្សារការងារជារៀងរាល់ឆ្នាំទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ