កូរ៉េខាងជើងនឹងព្រមចរចាជាមួយអាមេរិក បើមានលក្ខខណ្ឌគ្រប់គ្រាន់
មន្ដ្រីការទូតជាន់ខ្ពស់របស់កូរ៉េខាងជើង បានអះអាងនៅថ្ងៃសៅរ៍ទី១៣ឧសភានេះថា ទីក្រុងព្យុងយ៉ាងនឹងព្រមចរចាជាមួយសហរដ្ឋអាមេរិក ប្រសិនបើមានលក្ខខណ្ឌគ្រប់គ្រាន់និងត្រឹមត្រូវ។ ជំហររបស់ទីក្រុងព្យុងយ៉ាងដូច្នេះ ធ្វើឡើងខណៈពេលដែលសម្ពាធក្នុងឧបទ្វីបកូរ៉េនៅតែបន្តតានតឹង។
ចុះផ្សាយនៅថ្ងៃ៖
ស្តាប់ - ០២:០២
មន្ដ្រីជាន់ខ្ពស់ការិយាល័យអាមេរិកខាងជើងនៃក្រសួងការបរទេសកូរ៉េខាងជើង បានបង្ហើបប្រាប់អ្នកកាសែតនៅព្រលានយន្តហោះអន្ដរជាតិប៉េកាំង នៅថ្ងៃសៅរ៍នេះថា រដ្ឋបាលក្រុងព្យុងយ៉ាង នឹងព្រមចរចាជាមួយរដ្ឋបាលក្រុងវ៉ាស៊ីនតោន ក្រោមលក្ខខណ្ឌដ៏ត្រឹមត្រូវ។ លោកស្រី Choe Son-Hui បានអះអាងយ៉ាងដូច្នេះ ខណៈដែលលោកស្រីកំពុងធ្វើដំណើរត្រឡប់ទៅកូរ៉េខាងជើងវិញ ក្រោយពីបានទៅចូលរួមកិច្ចប្រជុំនៅទីក្រុង អូស្លូ ជាមួយអតីតមន្ដ្រីនៅក្នុងរដ្ឋបាលសហរដ្ឋអាមេរិក និងអតីតប្រេសិតអង្គការសហប្រជាជាតិមួយចំនួនទៀត។
គួរជម្រាបជូនថា មិនមែនមានតែរដ្ឋបាលក្រុងព្យុងយ៉ាងតែឯងទេ ដែលបានបង្ហើបពីបំណងបើកផ្លូវឲ្យមានជំនួបចរចាជាមួយអាមេរិក។ សហរដ្ឋអាមេរិកខ្លួនឯង ក៏មានបំណងដូចគ្នានេះដែរ។ ប្រធានាធិបតីអាមេរិក លោក ដូណាល់ ត្រាំ កាលពីដើមខែឧសភាថ្មីៗនេះ បានអះអាងថា លោកត្រៀមខ្លួនរួចជាស្រេច នឹងជួបជាមួយប្រមុខដឹកនាំកូរ៉េខាងជើង គីម ជុងអ៊ុន ប្រសិនបើមានលក្ខខណ្ឌគ្រប់គ្រាន់។ លោក ដូណាល់ ត្រាំ មិនបានបញ្ជាក់លម្អិតអំពីលក្ខខណ្ឌទាំងនោះឡើយ។
ដោយឡែក ប្រធានាធិបតីកូរ៉េខាងត្បូង ដែលទើបតែឡើងកាន់តំណែង បានប្រកាសថា លោកត្រៀមខ្លួនធ្វើដំណើរទៅទីក្រុងព្យុងយ៉ាង ប្រសិនបើលក្ខខណ្ឌអំណោយផល។ បំណងធ្វើដំណើរទៅកាន់ទីក្រុងព្យុងយ៉ាងនេះ ត្រូវបានលោកប្រធានាធិបតី មូន ជេអ៊ីន ពន្យល់ថា គឺដើម្បីបន្ថយភាពតានតឹង។ យ៉ាងណាក៏ដោយ នៅពេលសាកសួរថាតើទីក្រុងព្យុងយ៉ាង ត្រៀមខ្លួនដើម្បីជួបចរចាជាមួយទីក្រុងសេអ៊ូលដែរឬយ៉ាងណា មន្ដ្រីជាន់ខ្ពស់កូរ៉េខាងជើង លោកស្រី Choe បានឆ្លើយប្រាប់អ្នកកាសែតយ៉ាងខ្លីថា៖ ចាំមើលសិន។
គួរកត់សម្គាល់ថា ត្បិតតែភាគីពាក់ព័ន្ធក្នុងវិបត្តិឧបទ្វីបកូរ៉េបានបង្ហាញទំនោរទន់ទោររកគ្នាជាបន្តបន្ទាប់ក្ដី ប៉ុន្តែភាពតានតឹងនៅឧបទ្វីបកូរ៉េ មិនទាន់ធូរស្រាលនៅឡើយទេ។ ប៉ុន្មានខែចុងក្រោយនេះ ស្ថានភាពនៅជ្រោយកូរ៉េបានឡើងកម្ដៅយ៉ាងខ្លាំងបន្ទាប់ពីកូរ៉េខាងជើងបន្តអភិវឌ្ឍកម្មវិធីនុយក្លេអ៊ែរនិងមីស៊ីលបាលីស្ទីកដ៏គ្រោះថ្នាក់ ហើយបានបាញ់សាកល្បងគ្រាប់មីស៊ីលទាំងនោះជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ