ប៉េកាំងហាមមិនឱ្យគណៈកម្មការសភាអង់គ្លេសទៅហុងកុង
គណៈកម្មការកិច្ចការបរទេសរបស់សភាអង់គ្លេស បានសម្តែងការប្រឆាំងនៅថ្ងៃអាទិត្យទី ៣០ វិច្ឆកា ២០១៤នេះ នឹងសេចក្តីសម្រេចរបស់អាជ្ញាធរចិន ហាមឃាត់មិនឱ្យគណៈកម្មការនេះធ្វើដំណើរទៅកាន់ទីក្រុងហុងកុង។ គណៈកម្មការសភាអង់គ្លេសចង់ទៅសិក្សាអំពីទំនាក់ទំនងរវាងអង់គ្លេសជាមួយហុងកុងជាអតីតដែនដីអាណានិគមរបស់ខ្លួនរយៈពេលមួយសតវត្សរ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
បើតាមសេចក្តីជូនដំណឹងមួយរបស់គណៈកម្មការទទួលបន្ទុកកិច្ចការបរទេសនៃសភាអង់គ្លេស គឺ ស្ថានទូតចិន តែម្តងដែលបដិសេធ មិនអនុញ្ញាតឱ្យគណៈកម្មការនេះចុះទៅធ្វើអង្កេតស្វែងយល់អំពីទំនាក់ទំនងអង់គ្លេសហុងកុង។ ការិយាល័យអន្តរជាតិ បានប្រកាសលុបចោលទស្សនកិច្ចរបស់សមាជិកសភាអង់គ្លេសនៅហុងកុង នៅសប្តាហ៍ ខណៈដែលប៉េកាំងមិនព្រមផ្តល់ទិដ្ឋាការដល់សមាជិកម្នាក់ ដែលនិយមនិងការពារខ្លាំងស្វ័យភាពហុងកុង។
ជាមួយនឹងការបរិហារ ថារដ្ឋាភិបាលចិនបានប្រើវិធីគំរាមយ៉ាងចំហ ប្រធានគណៈកម្មការ នឹងបញ្ជូនសំណុំរឿងនេះជាបន្ទាន់ទៅកាន់អង្គសភាអង់គ្លេសនៅថ្ងៃចន្ទនេះតែម្តង។
សូមបញ្ជាក់ការអង្កេតនេះធ្វើឡើងដើម្បីស្ទាបស្ទង់ស្ថានភាពទំនាក់ទំនងការទូតរវាងក្រុងឡុងដ៍ និងហុងកុង ក្នុងក្របខ័ណ្ឌនៃសេចក្តីថ្លែងការណ៍រួមចិន-អង់គ្លេសចុះហត្ថលេខាកាលពីឆ្នាំ ១៩៨៤ ដែលបានកំណត់លក្ខខណ្ឌនៃការប្រគល់ហុងកុងឱ្យទៅចិននៅឆ្នាំ១៩៩៧។
ក៏ប៉ុន្តែការបដិសេធនេះធ្លាក់មកជួនចំពេល ដែលហុងកុង អតីតដែនដីអាណានិគមអង់គ្លេស និងជាដែនដីចិន មានស្វ័យភាពពិសេសកំពុងតែធ្លាក់ក្នុងវិបត្តិនយោបាយដ៏ធ្ងន់ធ្ងរមិនធ្លាប់មានគិតចាប់ពីឆ្នាំ១៩៩៧មក។ បាតុកររាប់ពាន់នាក់បានធ្វើបាតុកម្ម បិទខ្ទប់ក្រុងឱ្យកកស្ទះ ដើម្បីទាមទារឱ្យមានការបោះឆ្នោតជ្រើសរើសប្រមុខដឹកនាំកោះដោយសេរីជាសកល គ្មានការជ្រៀតជ្រែកពីប៉េកាំង។ ការប៉ះទង្គិចបន្តមានទៀតរហូតមកទល់ថ្ងៃអាទិត្យនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ