អ្នកស្រុកថ្មបាំងគ្រោងដាក់ញត្តិស្នើរដ្ឋាភិបាលលុបចោលគម្រោងសាងសង់ទំនប់វារីអគ្គិសនីស្ទឹងឆាយអារ៉ែង
ក្រុមអ្នកស្រុកថ្មបាំងដែលនឹងត្រូវរងគ្រោះដោយសារគម្រោងសាងសង់ទំនប់វារីអគ្គិសនីស្ទឹងឆាយអារ៉ែងគ្រោងដាក់ញត្តិស្នើសុំរាជរដ្ឋាភិបាលកម្ពុជា ឲ្យលុបចោលគម្រោងសាងសង់នេះ។ការដាក់ញត្តិនឹងធ្វើឡើង នៅថ្ងៃចន្ទទី ៣១ មីនា ដោយក្រុមអ្នកស្រុកថ្មបាំងនឹងហែញត្តិពីតំបន់សាងសង់ទំនប់វារីអគ្គិសនីស្ទឹងជាយអារ៉ែង មកដាក់ជូនសាលាខេត្តកោះកុង និង មន្ទីរពាក់ព័ន្ធផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
នៅថ្ងៃចន្ទ ទី ៣១ មីនា ក្រុមអ្នកស្រុកថ្មបាំង ក្នុងខេត្តកោះកុង នឹងលើកគ្នាហែញត្តិស្នើសុំលុបចោលគម្រោងសាងសង់ទំនប់វារីអគ្គិសនីស្ទឹងឆាយអារ៉ែងដាក់ជូនសាលាខេត្ត និង បណ្តាមន្ទីរពាក់ព័ន្ធផ្សេងទៀតនៅក្នុងទីរួមខេត្តកោះកុង។លោក វ៉ែន វ៉ន តំណាងប្រជាពលរដ្ឋស្រុកថ្មបាំង បានប្រាប់វិទ្យុបារាំងអន្តរជាតិ RFI នៅថ្ងៃអាទិត្យ ទី 30 មីនានេះ ថា មកដល់ពេលនេះប្រជាពលរដ្ឋមិនទាន់ទទួលបានដំណោះស្រាយណាមួយពីអាជ្ញាធរ និង ក្រុមហ៊ុនចិន Sinohydro នៅឡើយនោះទេ។
លោក បន្តថា នៅថ្ងៃស្អែកនេះក្រុមប្រជាពលរដ្ឋប្រមាណ ២០០នាក់ ជិះម៉ូតូ១០០គ្រឿងនឹងហែរញត្តិមកដាក់នៅសាលាខេត្តកោះកុង និង មន្ទីរពាក់ព័ន្ធផ្សេងទៀត។ក្នុងញត្តិនោះបានស្នើសុំឲ្យរាជរដ្ឋាភិបាលកម្ពុជាលុបចោលគម្រោងសាងសង់ទំនប់វារីអគ្គិសនីស្ទឹងឆាយអារ៉ែង និង បានបង្ហាញពីផលប៉ះពាល់នានាពីគម្រោងសាងសង់នេះ។បើតាមលោក វ៉ែន វ៉ន ប្រជាពលរដ្ឋមិនចង់បាននោះឡើយនូវទំនប់វារីអគ្គិសនីនេះ ហើយស្នើឲ្យរដ្ឋាភិបាលពិចារណាឡើងវិញផងដែរ។
លោក អ៊ិន គង់ជិត មន្ដ្រីការពារសិទ្ធិមនុស្សរបស់ អង្គការ លីកាដូ ប្រចាំខេត្តកោះកុងបានឲ្យដឹងថា ប្រសិនបើទំនប់វារីអគ្គិសនីស្ទឹងឆាយអារ៉ែងនេះត្រូវបានសាងសង់ នោះប្រជាពលរដ្ឋដែលរស់នៅក្នុងតំបន់នោះអាចត្រូវរងការបណ្តេញចេញ ហើយធនធានធម្មជាតិក៏រងការបំផ្លិចបំផ្លាញផងដែរ។ ចំពោះការហែរញត្តិនៅថ្ងៃស្អែកវិញ មន្ត្រីការពារសិទ្ធមនុស្សរូបនេះបានថ្លែងថា លោក មិនមានការព្រួយបារម្តពីការរារាំង ឬ ការបង្ក្រាបពីសំណាក់អាជ្ញាធរមានសមត្ថកិច្ចនោះឡើយ ព្រោះការហែនេះនឹងធ្វើឡើងដោយអហិង្សា។
សូមជំរាបជូនថា គិតមកដល់ថ្ងៃអាទិត្យនេះ ជាថ្ងៃទី ១៦ហើយដែលក្រុមប្រជាពលរដ្ឋក្នុងស្រុកថ្មបាំង ខេត្តកោះកុង បាននាំតវ៉ាត្រៀមបិទផ្លូវមិនឲ្យក្រុមហ៊ុនចិន Sinohydro ចូលទៅសិក្សានៅក្នុងតំបន់សាងសង់ទំនប់វារីអគ្គិសនីស្ទឹងឆាយអារ៉ែង។ ក៏ប៉ុន្តែអាជ្ញាធរ និង ក្រុមហ៊ុនចិននៅមិនទាន់មានដំណោះស្រាយណាមួយសម្រាប់ក្រុមប្រជាពលរដ្ឋនោះឡើយ។ តាមការស្រាវជ្រាវ ទំនប់វារីអគ្គិសនីស្ទឹងឆាយអារ៉ែងនេះ អាចផ្តល់ថាមពលតែ១០៨មេហ្កាវ៉ាត់ប៉ុណ្ណោះ ប៉ុន្តែវានឹងប៉ះពាល់ដល់គ្រួសារចំនួនប្រមាណ ៦០០ គ្រួសារ ក្នុងឃុំចំនួន៣ គឺ ឃុំជំនាប់ ឃុំប្រឡាយ និងឃុំថ្មដូនពៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ