អតីតបក្សប្រឆាំងថា នឹងបង្កើនការតស៊ូមតិឲ្យដោះលែង លោក កឹម សុខា
អតីតគណបក្សសង្រ្គោះជាតិ ដែលបន្តប្រើប្រាស់រូបសញ្ញារបស់គណបក្សសង្រ្គោះជាតិ បានចេញសេចក្តីប្រកាសព័ត៌មានមួយពីទីកុ្រងវ៉ាស៊ីនតោន កាលពីថ្ងៃម្សិលមិញ ថា ខ្លួននឹងបង្កើនសកម្មភាពតស៊ូមតិឲ្យមានការដោះលែងលោក កឹម សុខា និងអ្នកទោសនយោបាយ ផ្សេងទៀតព្រមទាំងឲ្យមានវត្តមានគណបក្សសង្រ្គោះជាតិក្នុងការបោះឆ្នោតនាពេលខាងមុខនេះ។ ការដាក់ចេញយុទ្ធសាស្ត្រថ្មីរបស់អតីតបក្សប្រឆាំងធំជាងគេនេះ ធ្វើឡើងស្របពេល គ.ជ.ប កំពុងទទួលចុះបញ្ជីគណបក្សនយោបាយសម្រាប់ចូលរួមការបោះឆ្នោតថ្ងៃទី២៩ខែកក្កដាខាងមុខ។
ចុះផ្សាយនៅថ្ងៃ៖
ស្តាប់ - ០១:៥៣
ក្រៅពីបង្កើនការតស៊ូមតិឲ្យដោះលែង លោក កឹម សុខា អតីតគណបក្សសង្រ្គោះជាតិ បានឲ្យដឹងទៀតថា គណបក្សនេះនៅតែរក្សាគោលជំហររឹងមាំ គោរពឆន្ទៈប្រជាពលរដ្ឋ ដោយរៀបចំ និងពង្រឹងកម្លាំងបណ្តាញគាំទ្រគណបក្សសង្រ្គោះជាតិទាំងក្នុង និងក្រៅប្រទេស។
ការប្រកាសនេះធ្វើឡើងតែ៣ថ្ងៃប៉ុណ្ណោះ ក្រោយពីកិច្ចប្រជុំរបស់មន្ដ្រីជាន់ខ្ពស់អតីតបក្សប្រឆាំង ពីថ្ងៃទី២ ដល់ថ្ងៃទី៤ ខែឧសភា នៅសហរដ្ឋអាមេរិក។ គួរកត់សម្គាល់ មុននេះ៣ថ្ងៃ ពោលគឺនៅថ្ងៃពុធ ថ្នាក់ដឹកនាំអតីតគណបក្សសង្គ្រោះជាតិ ក៏បានចេញមកបញ្ជាក់ពីជំហររបស់ខ្លួនថា នៅតែបន្តរួបរួមគ្នាដដែល។ ជាការអះអាងនេះ ធ្វើឡើងក្រោយពីគណបក្សនយោបាយថ្មីៗមួយចំនួនទើបត្រូវបានបង្កើតឡើង ជាពិសេសគឺគណបក្ស«ឆន្ទៈខ្មែរ» របស់កូនប្រុសលោក គង់ គាំ។
នៅក្នុងសេចក្តីថ្លែងការណ៍កាលណោះ ថ្នាក់ដឹកនាំអតីតប្រឆាំងក៏បានអំពាវនាវដល់សមាជិក និងសកម្មជនទាំងអស់ឲ្យពង្រឹងស្មារតី និងបន្តការតស៊ូដោយអហិង្សាជាមួយអតីតគណបក្សសង្គ្រោះជាតិ ដើម្បីឲ្យមានការផ្លាស់ប្តូរជាវិជ្ជមានតាមបែបបទលទ្ធិប្រជាធិបតេយ្យ។
ចំណែកសេចក្តីប្រកាសនៅថ្ងៃទី៤ខែឧសភានេះវិញ អតីតគណបក្សសង្រ្គោះជាតិបានបញ្ជាក់ថា មន្ត្រី គណបក្សនេះនឹងជួបជុំគ្នានៅដើមខែមិថុនា ឆ្នាំ២០១៨ ដើម្បីកំណត់ផែនការយុទ្ធសាស្ត្រ សកម្មភាព មុនការបោះឆ្នោត។
ការដែលគណបក្សនេះគ្រោងជួបគ្នានៅខែមិថុនា គឺជួនចំពេលដែលគណៈប្រតិភូសហភាពអឺរ៉ុប (EU) នឹងមកទស្សនកិច្ចនៅកម្ពុជា នៅក្នុងអំឡុងខែមិថុនា ដើម្បីពិនិត្យមើលឡើងវិញ ពីកិច្ចព្រមព្រៀង ស្តីពីប្រព័ន្ធអនុគ្រោះពន្ធដល់កម្ពុជាលើកលែងតែអាវុធ (EBA) ។ លោកស្រី ហ្វ៊េតដេរីកា មុកហ្គើរីនី (Federica Mogherini) នាយិការងនៃគណៈកម្មការអឺរ៉ុបទទួលបន្ទុកកិច្ចការបរទេសបានលើកឡើងថា ការគោរពសិទ្ធិមនុស្ស និងលទ្ធិប្រជាធិបតេយ្យ គឺជាផ្នែកមួយនៃគោលនយោបាយពាណិជ្ជកម្មរបស់សហភាពអឺរ៉ុប សម្រាប់ការផ្តល់ប្រព័ន្ធអនុគ្រោះពន្ធខាងផ្នែកពាណិជ្ជកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ