ថ្ងៃសែនចូលឆ្នាំចិនម្សិលមិញ៖ អ្នកស្លាប់ដោយសារគ្រោះថ្នាក់ចរាចរណ៍ មានទៅដល់១១នាក់
គិតមកដល់ថ្ងៃទី២៨ ខែ មករា ឆ្នាំ ២០១៧ ដែលត្រួវនឹងថ្ងៃចូលឆ្នាំចិន-វៀតណាម អ្នកស្លាប់ដោយសារគ្រោះថា្នក់ចរាចរណ៍បានកើនឡើងទៅដល់១១នាក់ និងរងរបួសធ្ងន់ស្រាលចំនួន២២នាក់។ លោក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានគូសបញ្ជាក់ឲ្យដឹងថា គ្រោះថ្នាក់ចរាចរណ៍ទាំងអស់នេះភាគច្រើនគឺ បណ្តាលមកពីមូលហេតុធំៗចំនួន២ ទី១គឺ ដោយសារតែការបើកបរហួសល្បឿនកំណត់ និងទី២ បណ្តាលមកពីការបើកបរនៅក្នុងស្ថានភាពស្រវឹង។ ព្រឿន បញ្ញារី រាយការណ៍៖
ចុះផ្សាយនៅថ្ងៃ៖
ស្តាប់ - ០២:៥៨
បើទោះបីជាមានការចាត់វិធានការយ៉ាងតឹងរឹងរបស់ នាយកដ្ឋាននគរបាល យ៉ាងណាក៏ដោយ គេនៅតែសង្កេតឃើញថាចំនួនអ្នកស្លាប់ដោយសារតែគ្រោះថ្នាក់ចរាចរណ៏នៅតែមានការកើនឡើង ពោលគឺកើនទៅដល់៤នាក់ បើប្រៀបធៀបទៅនឹងរយៈពេលមួយថ្ងៃមុនពិធីបុណ្យចូលឆ្នាំចិន-វៀតណាមបានខិតចូលមកដល់។បើយោងទៅតាមរបាយការណ៍ របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ យ៉ាងហោចណាស់ ប្រជាពលរដ្ឋខ្មែរចំនួន១១នាក់បានស្លាប់ និង២២នាក់រងរបួសធ្ងន់ស្រាល ក្នុងគ្រោះថ្នាក់ចរាចរណ៍ នៅទូទាំងប្រទេសកម្ពុជា។ ហេតុការណ៏ទាំងអស់នេះបានកើតឡើងចំថ្ងៃសែនចូលឆ្នាំចិន ពោលគឺនៅថ្ងៃទី២៧ ខែមករា ម្សិលមិញ។
របាយការណ៍នេះក៏បានបញ្ជាក់ផងដែរថា នាថ្ងៃម្សិលមិញ គ្រោះថ្នាក់ចរាចរណ៍បានកើតឡើងទូទាំងប្រទេសចំនួន ១៦លើកបណ្តាលឱ្យខូចខាតម៉ូតូ ១៤គ្រឿង រថយន្តតូច៨គ្រឿង រថយន្តធំ១គ្រឿង។ មូលហេតុដែលបណ្តាលឱ្យគ្រោះថ្នាក់រួមមាន ល្បឿនលឿន៧លើក ស្រវឹង៣លើក មិនគោរពសិទ្ធិ៣លើក បត់គ្រោះថ្នាក់១លើក ងងុយដេក១លើក និងប្រជែង១លើក។
លោក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈបានឱ្យដឹងថា មុនពេល ក៏ដូចជាក្រោយពេល ពិធីបុណ្យចូលឆ្នាំចិន-វៀតណាម ភាគីនគរបាលនិងសណ្តាប់ធ្នាប់សាធារណៈបានពង្រឹងស្ថានការណ៍ចរាចរណ៏ជាច្រើន តាមរយៈការត្រួតពិនិត្យល្បឿននៃការបើកបរ ព្រមទាំងការត្រួតពិនិត្យជាតិស្រវឹងជារៀងរាល់ថ្ងៃមិនដែលអាក់ខាននោះឡើយ។
លោកក៏បានបន្តទៀតថា ដោយសារតែជាទូទៅនៅក្នុងឱកាសចូលឆ្នាំចិននេះ ប្រជាពលរដ្ឋភាគច្រើនបានធ្វើដំណើរទៅតាមខេត្ត និងរមណីយដ្ឋានឆ្ងាយៗ ដែលភាគច្រើននៃពួកគាត់បានបើកបរហួសល្បឿនកំណត់នេះ ទើបបណ្តាលឱ្យករណីនៃគ្រោះថ្នាក់ចរាចរណ៏នេះមានការកើនឡើងខ្ពស់យ៉ាងដូច្នេះ។
លោក នេត សាវឿន អគ្គស្នងការនគរបាលជាតិក៏បានជំរុញឱ្យមានការរឹតបន្តឹងតាមរយៈការត្រួតពិនិត្យនៅតាមបេនឡាន ដើម្បីជៀសវាងការផ្ទុកមនុស្សលើសកំណត់ និងដាក់ឥវ៉ាន់ច្រើនសំពីងសំពោង ព្រមទាំងការត្រួតពិនិត្យផ្នែកបច្ចេកទេសមុនពេលចេញដំណើរផងដែរ។
ក្រៅពីនេះនគរបាលចរាចរណ៏ក៏បានធ្វើការត្រួតពិនិត្យនៅតាមផ្លួវជាតិសំខាន់ ដើម្បីជៀសវាងការបើកបរលឿនហួសកម្រិត។ នាពេលថ្មីៗនេះ នាយកដ្ឋាននគរបាលចរាចរណ៍ និងសណ្តាប់ធ្នាប់សារធារណៈក៏បានត្រួតពិនិត្យសារជាតិស្រវឹង និងសារជាតិញៀន នៅពេលយប់និងថ្ងៃផងដែរ ដោយសារតែករណីគ្រោះថ្នាក់ចរាចរណ៍មួយចំនួនក៏បណ្តាលមកពីកត្តាទាំងនេះដែរ។
គួរបញ្ជាក់ថា ក្នុងរយៈពេល២៧ថ្ងៃគិតចាប់ពីដើមខែមករា អ្នកដែលមានជាតិស្រវឹងនៅក្នុងពេលបើកបរមានទៅដល់៧១២នាក់ ស្មើនឹង៣% ហើយមនុស្ស៤១នាក់ក៏ត្រូវបានឃាត់ខ្លួនពាក់ព័ន្ធនឹងបញ្ហានេះផងដែរ។
លោក រុន រ័ត្នវាសនា បន្ថែមថា ដោយសារគិតមកដល់ថ្ងៃនេះទើបតែជាថ្ងៃទី១នៃពិធីបុណ្យចូលឆ្នាំចិនទើបលោកមិនទាន់អាចប្រៀបធៀបស្ថានការចរាចរណ៍នៅក្នុងឆ្នាំនេះទៅនឹងឆ្នាំ២០១៦នោះទេ។យ៉ាងណាក៏ដោយ លោកនឹងរង់ចាំមើលស្ថានការចរាចរណ៍នៅថ្ងៃបន្តបន្ទាប់ទៀត ក៏ប៉ុន្តែលោកក៏បានអំពាវនាវឱ្យប្រជាពលរដ្ឋខ្មែរធ្វើដំណើរឱ្យមានការប្រយ័ត្នប្រយែងកុំឱ្យហួសល្បឿនកំណត់ ព្រមទាំងកុំពិសារគ្រឿងស្រវឹងនាពេលបើកបរផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ