អង្គការសង្គមស៊ីវិលសុំឱ្យរដ្ឋាភិបាលបើកចំហសេចក្តីព្រាងច្បាប់ស្តីពីអង្គការ
ក្រុមអង្គការសង្គមស៊ីវិលជាតិនិងអន្តរជាតិ នៅថ្ងៃសុក្រនេះ បានធ្វើសន្និសីទកាសែតមួយ ដើម្បីបង្ហាញពីផលប៉ះពាល់នៃសេចក្តីព្រាងច្បាប់ស្តីពី សមាគម និងអង្គការមិនមែនរដ្ឋាភិបាល។ ក្រុមអង្គការសង្គមស៊ីវិលបានមើលឃើញថា ប្រសិនបើសេចក្តីព្រាងច្បាប់នេះ ត្រូវបានអនុម័តក្នុងស្ថានភាពបច្ចុប្បន្ននេះ នោះប្រាកដណាស់ថា ច្បាប់នេះ នឹងធ្វើឱ្យប៉ះពាល់ទៅដល់ គោលដៅអភិវឌ្ឍន៍របស់ប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
បើទោះបីជាក្តីសង្ឃឹមនៅមានតិចតួចក្តី ក៍ប៉ុន្តែក្រុមអង្គការសង្គមស៊ីវិលមួយក្រុម ដែលនាំមុខដោយ គណៈកម្មាធិការកិច្ចសហប្រតិបត្តិការកម្ពុជា (CCC), វេទិការអង្គការមិនមែនរដ្ឋាភិបាលហៅកាត់ថា (NGO Forum) រួមជាមួយនឹងអង្គការសង្គមស៊ីវិលជាតិនិងអន្តរជាតិប្រមាណជា ៣៣៦ បានចូលរួមនៅក្នុងយុទ្ធនាកា Stop and Consult ដើម្បីទទួចសុំឱ្យរដ្ឋាភិបាលបើកចំហការពិភាក្សាលើសេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាល។ យុទ្ធនាការ Stop and Consult បានចាប់ផ្តើមកាលពីថ្ងៃទី៤ឧសភា ដែលបានទទួលការគាំទ្រ (Like) ពីប្រជាពលរដ្ឋចំនួន ៥០០០នាក់ នៅលើទំព័រ Facebook។
លោក តឹក វណ្ណារ៉ា នាយកប្រតិបត្តិវេទិការអង្គការមិនមែនរដ្ឋាភិបាលហៅកាត់ថា (NGO Forum) បានមានប្រសាសន៍នៅក្នុងសន្និសីទកាសែតនៅឯភូជនីយដ្ឋានខ្មែរសូរិននៅថ្ងៃសុក្រទី២៩ឧសភានេះថា មានការបង្ហាញការព្រួយបារម្ភជាខ្លាំង លើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនេះ ក្នុងនោះក៍មានប្រធានសហភាពអឺរ៉ុប ប្រធានទីភ្នាក់ងារអង្គការសហប្រជាជាតិប្រចាំនៅកម្ពុជា មន្រ្តីស្ថានទូត និងដៃគូរអភិវឌ្ឍន៍ផ្សេងៗទៀត។
ដូច្នេះ លោក តឹក វណ្ណារ៉ា បានថ្លែងក្នុងនាមតំណាងឱ្យសំលេងរបស់អង្គការសង្គមស៊ីវិលនៅកម្ពុជា ដោយបានស្នើសុំទៅរដ្ឋាភិបាលចំនួន២ចំណុច៖ ទី១គឺសុំឱ្យរដ្ឋាភិបាលផ្តល់សេចក្តីព្រាងច្បាប់ចុងក្រោយ។ សេចក្តីព្រាងច្បាប់ចុងក្រោយដែលបានព្រាងចប់នៅឆ្នាំ២០១៥នេះ។ និងទី២គឺស្នើសុំឱ្យរដ្ឋាភិបាលបើកចំហឱ្យមានការពិភាក្សាពិគ្រោះយោបល់ពេញលេញមួយទៅលើសេចក្តីព្រាងច្បាប់នេះ មុនពេលបញ្ជូនទៅឱ្យគណៈរដ្ឋមន្រ្តីនិងរដ្ឋសភាអនុម័ត។
ប៉ុន្តែសំណើររបស់ក្រុមអង្គការសង្គមស៊ីវិលនៅពេលនេះ ហាក់ដូចជាយឺតពេលបន្តិចទៅ ហើយ។ យឺតពេលដោយសារតែនៅថ្ងៃសុក្រនេះ ទីស្តីការគណៈរដ្ឋមន្រ្តីបានបើកកិច្ចប្រជុំដើម្បីអនុម័តលើសេចក្តីព្រាងច្បាប់ដ៏ចម្រូងចម្រាស់នេះ។ ប៉ុន្តែជាសំណាងល្អ ដែលកិច្ចប្រជុំនេះ ត្រូវបានលើកពេល ដោយសារតែអវត្តមានរបស់លោក ស ខេង រដ្ឋមន្រ្តីក្រសួងមហាផ្ទៃដែលជាម្ចាស់សាម៉ីក្រសួង។ ប៉ុន្តែបើតាមការបញ្ជាក់ពីលោកផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី បើគ្មានការប្រែប្រួលទេនោះ នោះទីស្តីការគណៈរដ្ឋមន្រ្តីនឹងបើកកិច្ចប្រជុំជាថ្មីនៅថ្ងៃសុក្រទី៥មិថុនាខាងមុខនេះ ដើម្បីអនុម័តលើសេចក្តីព្រាងច្បាប់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ