លោកនាយករដ្ឋមន្ត្រីហ៊ុន សែន ប្រកាសបញ្ចប់យុទ្ធនាការចែកទឹកទ្រង់ទ្រាយធំ
ថ្លែងចេញពីពិធីចែកសញ្ញាបត្រនៅសកលវិទ្យាល័យអាស៊ីអឺរ៉ុប ប្រមុខរដ្ឋាភិបាលកម្ពុជា នៅថ្ងៃពុធទី២៥ ខែឧសភានេះ បានប្រកាសបញ្ចប់យុទ្ធនាការទ្រង់ទ្រាយធំក្នុងការចែកទឹកជូនប្រជាពលរដ្ឋដែលបានខ្វះខាតទឹក។ ការប្រកាសបិទបញ្ចប់នេះ គឺបន្ទាប់ពីចេញប្រតិបត្តិការណ៍បានមួយខែ។ ក្រៅពីនោះលោកក៏បានលើកឡើងពីការកំណត់ពេលវេលាបោះឆ្នោតឃុំ សង្កាត់ និងការបោះឆ្នោតតំណាងរាស្ត្រផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
ចាប់ពីពេលនេះតទៅយុទ្ធនាការចែកទឹកទ្រង់ទ្រាយធំកម្រិតទូទាំងប្រទេសត្រូវបិទបញ្ចប់ហើយ ក្រោយយុទ្ធនាការ បានធ្វើឡើងយ៉ាងភ្លូកទឹកភ្លូកដីអស់រយៈពេល១ខែបន្ទាប់ពីបញ្ជាដាច់ណាត់របស់ប្រមុខរដ្ឋាភិបាលកម្ពុជាកាលពីថ្ងៃទី២៦ខែមេសា។ បើទោះបីជាយុទ្ធានាការទ្រង់ទ្រាយធំត្រូវបិទបញ្ចប់មែន ប៉ុន្តែយុទ្ធនាការទ្រង់ទ្រាយតូចអាចបន្ត នៅតាមតំបន់ដែលគ្មានភ្លៀងវស្សាធ្លាក់ និងគ្មានប្រព័ន្ធប្រឡាយ។ នេះជាការបន្ថែមពីលោកនាយករដ្ឋមន្ត្រី ដែលបានថ្លែងក្នុងពិធីចែកសញ្ញាបត្រដល់សិស្សានុសិស្ស។
យ៉ាងណាក៏ដោយ ពុំទាន់មានទូរលេខណាមួយបញ្ជាក់ពីការចំណាយទាំងមូលសម្រាប់យុទ្ធនាការទ្រង់ទ្រាយធំ ដែលមានទាំងការចូលរួមទាំងវិស័យឯកជន រដ្ឋ និងកាកបាទក្រហមក្នុងរយៈពេល១ខែនេះទេ។ ប៉ុន្តែក្នុងរយៈពេលនេះ គណៈកម្មកាជាតិគ្រប់គ្រងគ្រោះមហន្តរាយ បានចំណាយថវិការបស់រដ្ឋប្រមាណ១ពាន់លានរៀល ដើម្បីជួយសង្គ្រោះប្រជាពលរដ្ឋជាបឋម និងការជីកស្រះ១៤កន្លែង រួមទាំងអណ្តូង១៦កន្លែងនៅតាមខេត្ត ដែលរងគ្រោះខ្លាំង។ សូមបញ្ជាក់ថា គ្រោះមហន្តរាយរាំងស្ងួតនៅឆ្នាំ២០១៦នេះ បានធ្វើឱ្យប្រជាពលរដ្ឋរងផលប៉ះពាល់ប្រមាណ២លានកន្លះ សត្វគោក្របី និងសត្វត្រីរាប់រយក្បាល និងរាប់សិបតោន។
ក្រៅពីបញ្ហាគ្រោះរាំងស្ងួត លោកនាយករដ្ឋមន្ត្រីហ៊ុន សែន ក៏បានលើកឡើងពីបញ្ហានៃការបោះឆ្នោតក្រុមប្រឹក្សាឃុំ សង្កាត់ និងការបោះឆ្នោតតំណាងរាស្ត្រនាពេលខាងមុខផងដែរ។ សម្រាប់លោកនាយករដ្ឋមន្ត្រី ការប្រកាសពីថេរវេលានៃការបោះឆ្នោតក្រុមប្រឹក្សា ឃុំ សង្កាត់ និងការបោះឆ្នោតជាតិនេះ គឺដើម្បីឱ្យគណបក្សនយោបាយទាំងអស់អាចត្រៀមខ្លួនសម្រាប់ការប្រកួតប្រជែង។ ការបោះឆ្នោតឃុំសង្កាត់នឹងត្រូវធ្វើឡើងនៅសប្តាហ៍ទី៤នៃខែមិថុនាឆ្នាំ២០១៧ ដោយឡែកការបោះឆ្នោតថ្នាក់ជាតិក៏នឹងត្រូវធ្វើឡើងនៅសប្តាហ៍ទី៤ ក្នុងខែកក្កដា ឆ្នាំ២០១៨។ ត្រង់ចំណុចនេះ លោកនាយករដ្ឋមន្ត្រី ដែលជាប្រធានគណបក្សប្រជាជនកម្ពុជា ហើយធ្លាប់រងការចោទប្រកាន់ថាបន្លំសន្លឹកឆ្នោត និងធ្វើបញ្ជីក្លែងក្លាយផង បានប្រកាសជាសាធារណៈថា លោកក៏ចង់បានបញ្ជីឈ្មោះបោះឆ្នោតដែលសុក្រឹតដែរ។ បើតាមប្រមុខរដ្ឋាភិបាលរូបនេះ ក្រោយការធ្វើបញ្ជីឈ្មោះបោះឆ្នោតថ្មីហើយ ខាងគណបក្សលោកនឹងមានឱកាសបកស្រាយចំពោះការចោទប្រកាន់ថាបញ្ជីឈ្មោះចាស់ត្រូវបានលួចបន្លំ។
សូមបញ្ជាក់ថា បញ្ហាបោះឆ្នោតនៅកម្ពុជាតែងតែជាជម្លោះនយោបាយរវាងគណបក្សកាន់អំណាច និងគណបក្សប្រឆាំងរាប់អាណត្តិមកហើយ។ ហើយជម្លោះនេះពេលខ្លះក៏បានឈានទៅដល់ភាពតាងតឹងនយោបាយផងដែរជាក់ស្តែងកាលពីឆ្នាំ២០១៣កន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ