បក្សកាន់អំណាចថាក្រុមប្រឹក្សាអតីតបក្សសង្គ្រោះជាតិពាក់កណ្តាលបានចុះចូលនឹងខ្លួន តែមន្ត្រីអតីតបក្សប្រឆាំងថាជាតួលេខបំប៉ោង
លោកនាយករដ្ឋមន្ត្រីហ៊ុន សែន ប្រធានគណបក្សប្រជាជនកម្ពុជា បានដាក់ឱសានវាទដល់ក្រុមប្រឹក្សាឃុំសង្កាត់អតីតគណបក្សសង្គ្រោះជាតិត្រឹមម៉ោង៩ យប់នេះ ឲ្យចុះចូលជាមួយគណបក្សប្រជាជនកម្ពុជារបស់លោក។ ដោយឡែក គិតត្រឹមពេលនេះ លោកសុខ ឥសាន អ្នកនាំពាក្យគណបក្សប្រជាជនកម្ពុជា បានអះអាង មានក្រុមប្រឹក្សាអតីតបក្សសង្គ្រោះជាតិប្រមាណពាក់កណ្តាលហើយបានមកចុះចូលជាមួយគណបក្សប្រជាជនកម្ពុជា។
ចុះផ្សាយនៅថ្ងៃ៖
ស្តាប់ - ០២:២០
អ្នកនាំពាក្យគណបក្សប្រជាជនកម្ពុជា លោកសុខ ឥសាន បានបង្ហាញឲ្យដឹងថា គ្រាន់តែមួយសប្ដាហ៍បន្ទាប់ពីលោកនាយករដ្ឋមន្រី្ត ហ៊ុន សែន បានការអំពាវនាវឲ្យសមាជិកអតីតគណបក្សសង្គ្រោះជាតិមកចូលរួមជាមួយគណបក្សប្រជាជនកម្ពុជានោះ គឺមានសមាជិកក្រុមប្រឹក្សារបស់អតីតគណបក្សសង្គ្រោះជាតិ ប្រមាណ២៥០០នាក់ មានន័យថា ពាក់កណ្តាលនៃចំនួនក្រុមប្រឹក្សាឃុំសង្កាត់ ៥០០០នាក់បានមករួមរស់ជាមួយគណក្សប្រជាជនកម្ពុជា។ សម្រាប់លោកសុខ ឥសាន ចំនួនចុះចូលនេះ គឺឆ្លុះបញ្ចាំងពីឆន្ទៈមោះមុតពួកគេ ដែលចង់ឃើញប្រទេសជាតិមានសន្តិភាព ការអភិវឌ្ឍន៍ និងភាពរីកចម្រើន។ បើតាមអ្នកនាំពាក្យគណបក្សកាន់អំណាចដដែល តួលេខនេះក៏ជាការបញ្ជាក់ឲ្យឃើញកម្មវិធីនយោបាយរបស់គណបក្សប្រជាជនកម្ពុជា ដែលពិតជាត្រឹមត្រូវ ស្របតាមបំណងប្រាថ្នារបស់ប្រជាជនទូទៅដែលចង់បានសន្តិភាព ស្ថេរភាពនយោបាយ ការអភិវឌ្ឍន៍ រីកចម្រើន មានសេចក្តីសុខ និងសុភមង្គលក្នុងក្រុមគ្រួសារ ។
ចំពោះតួលេខនៃការចុះចូលដ៏ច្រើនសម្បើមនេះ លោកអេង ឆៃអ៊ាង អតីតអនុប្រធានគណបក្សសង្គ្រោះជាតិ បានចាត់ទុកថា ជាតួលេខបំប៉ោង។ លោកអេង ឆៃអ៊ាង បានអះអាងពីក្រៅប្រទេសថា ការប្រកាសតួលេខនៃអ្នកចុះចូលដោយគណបក្សកាន់អំណាចនេះ គឺគ្មានន័យនោះទេ ដោយថាជាតួលេខផ្សាយបំប៉ោង ព្រោះកាលពីសម័យឆ្នាំ១៩៧៩ បើតាមលោកអេង ឆៃអាង គឺគណបក្សកាន់អំណាចក៏បានប្រើយុទ្ធសាស្ត្រដូចគ្នានេះដែរ ហើយយុទ្ធសាសស្ត្រនេះនៅតែបន្តប្រើរហូតដល់ឆ្នាំ២០១។ ឆ្នាំ២០១៣ ដែលលោក អេង ឆៃអ៊ាងអះអាងថា គណបក្សលោកត្រូវឈ្នះ បើសិនជាគ្មានលួចបន្លំសន្លឹកឆ្នោត។
សូមបញ្ជាក់ថា ចរន្តចុះចូលពីសំណាក់សមាជិកអតីតគណបក្សប្រឆាំងទៅកាន់គណបក្សកាន់អំណាចនេះ បានកើតឡើងក្រោយពីតុលាការកំពូលបានសម្រេចរំលាយគណបក្សសង្គ្រោះជាតិ។ គណបក្សសង្គ្រោះជាតិ ត្រូវបានរំលាយដោយចោទថា ឃុបឃិតជាមួយបរទេសរៀបចំបដិវត្តពណ៌ ហើយតំណាងរាស្ត្របក្សចំនួន១១៨រូបក៏ត្រូវបានកាត់សិទ្ធិធ្វើនយោបាយ៥ឆ្នាំផងដែរ។
យ៉ាងណាក៏ដោយ នៅពេលនេះ អតីតអ្នកតំណាងរាស្ត្រគណបក្សសង្គ្រោះជាតិ កំពុងតែស្ថិតនៅក្រៅប្រទេសស្ទើរតែទាំងអស់ទៅហើយ។ នេះបើតាមលោកអេង ឆៃអ៊ាង ហើយលោកបញ្ជាក់បន្ថែមទៀតថា ការស្ថិតនៅបរទេសរបស់អតីតតំណាងរាស្ត្របក្សប្រឆាំងទាំងនេះ គឺដើម្បីធ្វើយុទ្ធនាការស្នើសុំសហគមន៍អន្តរជាតិឲ្យជួយ ដើម្បីទាមទារយកគណបក្សសង្គ្រោះជាតិដែលត្រូវរំលាយចោល ត្រឡប់មកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ