លោក កឹម សុខា៖ការពារសិទ្ធិមនុស្ស គឺថែរក្សាសន្តិភាព
លោក កឹម សុខា ប្រធានអតីតគណបក្សសង្គ្រោះជាតិបានចេញសារអបអរសាទរទិវាសិទ្ធិមនុស្សអន្តរជាតិ១០ធ្នូលើកទី៧១នៅឆ្នាំ២០១៩នេះ។ បើតាមអតីតប្រធានអង្គការសិទ្ធិមនុស្សដ៍ធំមួយនេះការ«ការពារសិទ្ធិមនុស្ស គឺថែរក្សាសន្តិភាព» ខណៈរដ្ឋាភិបាលតែងតែអះអាងថាទាល់តែមានសន្តិភាព ទើបសិទ្ធិមនុស្សកើតឡើងតាមក្រោយ។
ចុះផ្សាយនៅថ្ងៃ៖
ការចេញសាររបស់លោក កឹម សុខា ទាក់ទងនឹងបញ្ហាសិទ្ធិមនុស្សនៅកម្ពុជានេះ គឺជាលើកទី១ហើយចាប់តាំងពីតុលាការឃុំខ្លួនលោកនៅខែកញ្ញាឆ្នាំ២០១៧ ហើយទើបត្រូវបានតុលាការបន្ធូរបន្ថយលក្ខខណ្ឌនៃការរស់នៅក្នុងផ្ទះកាលពីដើមខែវិច្ឆិកាឆ្នាំ២០១៩នេះ។
តាមរយៈទំព័រហ្វេសប៊ុកផ្លូវការ លោក កឹម សុខា បានចាត់ទុកការរំលោភសិទ្ធិមនុស្ស នាំមកនូវភាពអយុត្តិធម៌ បង្កការឈឺចាប់ បណ្តាលឲ្យមានការរើរបម្រះ ហើយអាចនាំមកនូវអស្ថេរភាពសង្គម ដែលជាកត្តានាំឲ្យប៉ះពាល់ដល់សន្តិភាព។ លោកគូសបញ្ជាក់ថា ខ្លឹមសារនៅក្នុងបុព្វកថានៃសេចក្តីប្រកាសជាសកលរបស់អង្គការសហប្រជាជាតិស្តីពីសិទ្ធិមនុស្សដែលរដ្ឋធម្មនុញ្ញខ្មែរទទួលស្គាល់ បានបញ្ជាក់ថា ការការពារសិទ្ធិមនុស្ស គឺជាការចាំបាច់ដើម្បីចៀសវាងកុំឲ្យមនុស្សត្រូវបង្ខំចិត្តជ្រើសរើសយកការប្រឆាំងនឹងការគៀបសង្កត់ រំលោភបំពានណាមួយ ដោយពឹងផ្អែកលើការរើបម្រះបះបោរ។
បើតាម លោក កឹម សុខា «មានមនុស្សមួយចំនួនយល់ច្រឡំថា ដើម្បីរក្សាសន្តិភាព សង្គមមួយត្រូវបិទឬកាត់បន្ថយសិទ្ធិរបស់ប្រជាពលរដ្ឋ» ខណៈរដ្ឋាភិបាលតែងតែអះអាងថាទាល់តែមានសន្តិភាព ទើបសិទ្ធិមនុស្សកើតឡើងតាមក្រោយ។
លោក កត្តា អន អ្នកនាំពាក្យគណៈកម្មាធិការសិទ្ធិមនុស្សរបស់រដ្ឋាភិបាលបានអះអាងថា សម្រាប់បរិបថកម្ពុជាគឺទាល់តែមានសន្តិភាពទើបអាចធ្វើសកម្មភាពសិទ្ធិមនុស្សបាន ដោយលោកលើកពីករណីកម្ពុជាកាលពីសម័យសង្គ្រាមមកបញ្ជាក់។
តែសម្រាប់ អំ សំអាត អនុប្រធានអង្គការសិទ្ធិមនុស្សលីកាដូ បានលើកឡើងពីករណីសង្គ្រាមលោកមកធ្វើអំណះអំណាងទើបបង្កើតឲ្យមានសន្ធិសញ្ញាស្តីពីសិទ្ធិមនុស្សកើតឡើង។
ទោះជាយ៉ាងណា លោក កឹម សុខា បានអះអាងថា ការចូលរួមលើកកម្ពស់និងការពារសិទ្ធិមនុស្ស មិនមែនជាការជ្រៀតជ្រែកកិច្ចការផ្ទៃក្នុងនេះទេ។ ហើយក៏មិនត្រូវប្រមាថភាពជាមនុស្សរបស់ខ្មែរ ដោយលើកឡើងថា សិទ្ធិមនុស្សគឺជាគំនិតបរទេសនោះដែរ។
ការលើកយ៉ាងដូច្នេះរបស់លោក កឹម សុខា គឺដូចគ្នានឹងការលើកឡើងរបស់ លោក ធន សារ៉ាយ ប្រធានសមាគមការពារសិទ្ធិមនុស្សអាដហុកដែលកំពុងនៅក្រៅប្រទេសដែរ។ នៅក្នុងវីដេអូឃ្លីបរយៈពេលប្រមាណ៧នាទី លោក ធន សារ៉ាយ បានលើកឡើងពីការគោរពសិទ្ធិមនុស្ស និងលទ្ធិប្រជាធិបតេយ្យ ដែលមានការប្រាសចាក ជាហេតុធ្វើឲ្យប្រទេសកម្ពុជាទទួលការឈឺចាប់ដូចដែលបានកើតមានពីអតីតកាលស្រាប់។ លោកបន្ថែមថា ការគោរពសិទ្ធិមនុស្ស និងប្រជាធិបតេយ្យឲ្យបានត្រឹមត្រូវ មិនមែនជាការធ្វើតាមការបង្គាប់បញ្ជារបស់ប្រទេសណាមួយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ