អាជ្ញាធរប្រាប់ឲ្យផ្អាកការលក់ដូរនៅមុខអង្គរ ដើម្បីរៀបចំពិធីសាសនានៅថ្ងៃស្អែក
ពិធីសាសនាដ៏ធំមួយ នឹងត្រូវរៀបចំធ្វើនៅមុខប្រាង្គប្រាសាទអង្គរវត្តដ៏ស្កឹមស្កៃ ចាប់ពីថ្ងៃទី២ ដល់ថ្ងៃទី៣ខែធ្នូខាងមុខនេះ ក្រោមអធិបតីភាកលោកនាយករដ្ឋមន្ដ្រី ហ៊ុន សែន និងភរិយា ព្រមទាំងមន្ដ្រីគ្រប់លំដាប់ថ្នាក់។ បើតាមរដ្ឋាភិបាល ពិធីនេះរៀបចំធ្វើឡើងដើម្បីបួងសួងសុំសេចក្ដីសុខដល់ប្រជារាស្ត្រ និងប្រជាជាតិកម្ពុជា។ ដើម្បីរក្សាសណ្ដាប់ធ្នាប់នៅក្នុងពិធីដ៏ធំសម្បើមនេះ អាជ្ញាធរអប្សរាបានណែនាំឲ្យអាជីវករនៅមុខប្រាសាទអង្គរវត្តទាំងអស់ ផ្អាកការលក់ដូរចាប់ពីថ្ងៃទី១ខែធ្នូនេះតទៅ។
ចុះផ្សាយនៅថ្ងៃ៖
ស្តាប់ - ០១:៥៥
តាមរយៈលិខិតចុះថ្ងៃទី២៨វិច្ឆិការបស់អាជ្ញាធរអប្សរា ការផ្អាកសកម្មភាពលក់ដូររបស់អាជីវករនៅមុខប្រាសាទអង្គរវត្ត នឹងអូសបន្លាយដល់ថ្ងៃទី៣ខែធ្នូ។ ពោលគឺទាល់តែពិធីបុណ្យសាសនានៅមុខប្រាសាទអង្គរវត្តបិទបញ្ចប់តែម្ដង។ ក្រៅពីផ្អាកការលក់ដូរហើយ អាជ្ញាធរអប្សរាបានបង្គាប់ឲ្យក្រុមអាជីវករយកសម្ភារៈលក់ដូររបស់ខ្លួនចេញផងដែរ។
ចំពោះបញ្ហាចរាចរណ៍វិញ ប្រសិនបើមានគោលដៅទៅកាន់ប្រាសាទអង្គរវត្ត អាជ្ញាធរអប្សរាបានណែនាំឲ្យដាក់ភ្ញៀវនៅច្រកខាងកើត។ ចំណែកយានជំនិះគ្រប់ប្រភេទផ្សេងទៀតដែលមានគោលដៅផ្សេងពីប្រាសាទអង្គរវត្ត ត្រូវប្រើប្រាស់ផ្លូវ៦០ម៉ែត្រ រួចបន្តដំណើរទៅកាន់គោលដៅរបស់ខ្លួន តាមផ្លូវវង់តូចឬវង់ធំ។
គួរជម្រាបជូនថា សេចក្ដីណែនាំរបស់អាជ្ញាធរអប្សរាយ៉ាងដូច្នេះ ធ្វើឡើងចំពេលដែលទីក្រុងសៀមរាបកំពុងតែត្រៀមខ្លួនសំអិតសំអាង រៀបចំពិធីសាសនាដ៏ធំមួយ រយៈពេលពីរថ្ងៃ ចាប់ពីថ្ងៃទី២ដល់ថ្ងៃទី៣ខែធ្នូ ដើម្បីបួងសួងសុំសេចក្ដីសុខដល់ពលរដ្ឋខ្មែរនិងប្រទេសជាតិ។ មិនត្រឹមតែប៉ុណ្ណោះ រដ្ឋាភិបាលបញ្ជាក់បន្ថែមថា ពិធីនេះក៏រៀបចំធ្វើដើម្បីជាការរំឭកដឹងគុណដល់បុព្វបុរសខ្មែរ ដែលបានបន្សល់ទុកប្រាង្គប្រាសាទបុរាណរាប់ពាន់ដល់កូនចៅជំនាន់ក្រោយ។
ពិធីសាសនានៅខេត្តសៀមរាបនេះ ចាប់ផ្ដើមដោយការក្រុងពាលីនិងសូត្រមន្តព្រះសង្ឃចំនួន៥០០អង្គ នៅថ្ងៃទី២វិច្ឆិកាមុខប្រាសាទអង្គរវត្ត។ នៅព្រឹកថ្ងៃទី៣វិច្ឆិកា ពិធីបន្តដោយការបួងសួងសុំសេចក្ដីសុខចម្រើននៅស្ពានហាលប្រាសាទអង្គរវត្ត និងបន្តដោយការរាប់បាតព្រះសង្ឃចំនួន៥ពាន់អង្គ នៅមុខប្រាសាទអង្គរ។
ក្រៅពីពិធីសាសនាទាំងនេះ គណៈកម្មការរៀបចំ ក៏នឹងចាត់ចែងឲ្យមានការសម្ដែងសិល្បៈ ដូចជារបាំក្បាច់បុរាណ ប្រពៃណី ល្ខោន និងទស្សនីយភាពកម្សាន្តជាច្រើនទៀត ជូនដល់អ្នកមកចូលរួម។ អាជ្ញាធរបានអំពាវនាវឲ្យប្រជាពលរដ្ឋ និងភ្ញៀវទេសចរទាំងអស់ចូលរួមពិធីសាសនាដ៏ធំនេះ តាមការគួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ