សហព័ន្ធស្រូវអង្ករ៖ អង្ករកម្ពុជានាំទៅចិនជិត២ម៉ឺនតោន ដូចការសន្យាទិញរបស់ចិន៤០ម៉ឺនតោន
សហព័ន្ធស្រូវអង្ករកម្ពុជាឲ្យដឹងនៅថ្ងៃព្រហស្បតិ៍នេះថា អង្ករកម្ពុជាជិត២ម៉ឺនតោនបាននាំចេញទៅចិនកាលពីខែមករា ដែលចំនួននេះស្ថិតនៅក្នុងការសន្យាទិញអង្ករ៤០ម៉ឺនតោន របស់ចិនកាលពេលថ្មីៗ។ តាមរយៈការនាំចេញនេះ វិស័យឯកជនមានសុទិដ្ឋិនិយមថា តម្លៃស្រូវនឹងលែងចោទជាបញ្ហាទៀតហើយចំពោះកសិករ។ ប៉ុន្តែតំណាងកសិករនៅតែមើលឃើញថា តម្លៃស្រូវនៅជាឧបសគ្គសម្រាប់ការលក់ចេញរបស់កសិករគិតមកដល់ពេលនេះ។
ចុះផ្សាយនៅថ្ងៃ៖
ស្តាប់ - ០២:២៨
លោក ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា បានប្រាប់វិទ្យុបារាំងអន្តរជាតិថា រដ្ឋាភិបាលចិនបានបើកផ្លូវឲ្យកម្ពុជានាំចូលអង្ករទៅចិនតាមកិច្ចសន្យាទិញ៤០ម៉ឺនតោនហើយ។ ប៉ុន្តែក្រុមហ៊ុនដែលនាំអង្ករទៅចិនត្រូវគិតឲ្យបានល្អិតល្អន់លើបញ្ហាតម្លៃនិងស្តង់ដាគុណភាពអង្ករ។ជាក់ស្ដែង កាលពីខែមករាអង្ករកម្ពុជាប្រមាណជាជិត២ម៉ឺនតោនបាននាំទៅចិន ខណៈការនាំចូលនេះបានធ្លាក់ចុះបន្តិចបើធៀបនឹងរយៈពេលដូចគ្នាកាលពីដើមខែមករាឆ្នាំ២០១៨។
ទោះយ៉ាងណា ការនាំចេញអង្ករទៅចិនសម្រាប់ខែមករានៅតែមានចំនួនតិច បើធៀបនឹងការចូលអង្ករទៅកាន់ទីផ្សារអឺរ៉ុប បន្ទាប់ពីអឺរ៉ុបផ្ដើមគិតពន្ធលើការនាំចូលអង្ករកម្ពុជា។ ក្នុងខែមករាដូចគ្នា អង្ករកម្ពុជានាំទៅអឺរ៉ុបមានចំនួនជាង២ម៉ឺនតោន និងបន្ទាប់បន្សំអង្ករកម្ពុជាបាននាំចេញទៅប្រទេសក្នុងតំបន់អាស៊ានផ្សេងទៀត ដែលសរុបក្នុងគោលដៅទាំងបីអង្ករកម្ពុជាជិត៦ម៉ឺនតោនបាននាំចេញ។ នេះបើតាម លោក ហ៊ុន ឡាក់ ។
លោកថេង សាវឿន តំណាងកសិករមើលឃើញថា ចំពោះការនាំអង្ករទៅចិនជិត២ម៉ឺនតោននេះនៅមិនទាន់ចាត់ទុកថា ជាដំណឹងរីករាយនៅឡើយទេ សម្រាប់កសិករកម្ពុជា។ មិនរីករាយព្រោះថា ការនាំចេញនៅក្នុងខែមករាបានធ្លាក់ចុះ៥ភាគរយ បើធៀបរយៈពេលដូចគ្នាកាលពីឆ្នាំមុន។ ក្នុងករណីដែលខែបន្តបន្ទាប់ ការនាំចូលអង្ករទៅចិនបន្តធ្លាក់ចុះនឹងក្លាយជារឿងមួយគួរឲ្យព្រួយបារម្ភបន្ថែមទៀត។
ទន្ទឹមនឹងការនាំអង្ករទៅចិន ឈ្មួញវៀតណាមក៏ផ្ដើមចូលមកទិញស្រូវពីកម្ពុជានៅក្នុងខេត្តខ្មែរជាប់ព្រំដែនវៀតណាមទៅតាមការស្នើសុំរបស់ក្រសួងកសិកម្មកម្ពុជាកាលពីកន្លងមក។ រដ្ឋមន្ដ្រីក្រសួងកសិកម្ម បានឲ្យដឹងនៅថ្ងៃទី១៣ម្សិលមិញថា តម្លៃស្រូវធម្មតា(IR)បានហក់ឡើងវិញពីតម្លៃ៦៣០រៀលក្នុងមួយគីឡូក្រាម ហក់ឡើងដល់៦៧០រៀលក្នុងមួយគីឡូក្រាម ។ ដោយឡែកចំពោះតម្លៃស្រូវក្រអូបពីតម្លៃ១,០០០រៀលហក់ឡើងដល់១,០២៥រៀលក្នុងមួយគីឡូក្រាម។ ប៉ុន្តែយ៉ាងមិញ លោក ថេង សាវឿន ក្រើនរំឭកថា ទោះតម្លៃស្រូវនៅក្នុងខេត្តមួយចំនួនបានឡើងថ្លៃបន្តិច តែរដ្ឋាភិបាលគួរបន្តឃ្លាំមើលមិនអាចភ្លេចខ្លួនបានឡើយ។
សូមបញ្ជាក់ថា អង្ករកម្ពុជាជិត៥០ម៉ឺនតោន ត្រូវបាននាំចេញទៅទីផ្សារអន្តរជាតិ ធ្លាក់ចុះ១៣ភាគរយ នៅរយៈពេល១១ខែ ឆ្នាំ២០១៨។ ក្នុងចំណោមប្រទេសជាង៦០ ដែលទិញអង្ករពីកម្ពុជាចិន ទិញអង្ករពីកម្ពុជាច្រើនជាងគេចំនួនជាង១៣ម៉ឺនតោន តាមពីក្រោយដោយប្រទេសបារាំង ចំនួនជាង៧ម៉ឺនតោន និងម៉ាឡេស៊ីចំនួនជិត៤ម៉ឺនតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ