បក្សប្រឆាំងនឹងចាត់វិធានការលើលោកស្រី ឡាក់ សុភាព ប្រសិនបើមិនការពារកិត្តិយសគណបក្ស
គណៈកម្មាធិការវិន័យគណបក្សសង្គ្រោះជាតិ បានទុកឱកាសរយៈពេលមួយថ្ងៃឲ្យលោកស្រី ឡាក់ សុភាព សមាជិកគណៈកម្មការនាយកគណបក្ស បកស្រាយជាមួយប្រព័ន្ធផ្សព្វផ្សាយ ទាក់ទងទៅនឹងការចោទប្រកាន់ថា ប្រធាននិងអនុប្រធានគណបក្សប្រឆាំងមួយនេះ ប្រព្រឹត្តអំពើពុករលួយ។ មិនមានការបណ្ដេញចេញទេ ហើយក៏មិនមានការដើរចេញដោយស្ម័គ្រចិត្តដែរ ក៏ប៉ុន្តែ បើមិនមានការឆ្លើយតបដើម្បីការពារកិត្តិយសគណបក្សទេ គណៈកម្មាធិការវិន័យគណបក្ស នឹងចាត់វិធានការលើលោកស្រីឡាក់ សុភាព ទៅតាមបទបញ្ជាផ្ទៃក្នុងបក្ស។
ចុះផ្សាយនៅថ្ងៃ៖
ស្តាប់ - ០២:៣៤
លោកស្រីឡាក់ សុភាព សមាជិកគណៈកម្មការនាយកគណបក្សសង្គ្រោះជាតិ បានថ្លែងថា លោកស្រីមិនបាននិយាយថាប្រធាននិងអនុប្រធានគណបក្សរបស់ខ្លួន ប្រព្រឹត្តអំពើពុករលួយអ្វីនោះទេ។ ការថ្លែងបែបនេះ បានធ្វើឡើងបន្ទាប់ពីក្រុមប្រឹក្សាវិន័យរបស់គណបក្សប្រឆាំងដ៏ធំនៅកម្ពុជាមួយនេះ បានសាកសួរលោកស្រី នៅព្រឹកថ្ងៃចន្ទនេះ នៅទីស្នាក់ការកណ្ដាលគណបក្ស។
ស្ដ្រីមេម៉ាយដែលភ្ជាប់និស្ស័យនយោបាយជាមួយគណបក្សសង្គ្រោះជាតិអស់រយៈពេល២០ឆ្នាំកន្លងទៅនេះ បានរំលឹកថា កាលពីថ្ងៃទី៥ខែធ្នូ នៅក្នុងកិច្ចប្រជុំគណៈកម្មការនាយកគណបក្ស លោកកឹម សុខា អនុប្រធានគណបក្សបានលើកឡើងនៅក្នុងអង្គប្រជុំថា លោកស្រី បានប្រាប់គាត់ថា លោកសម រង្ស៊ី បានទៅយកលុយពីគេ ទាក់ទងនឹងទឹកប្រាក់រាប់សិបលានដុល្លារ។
ក៏ប៉ុន្តែនៅពេលនេះ លោកស្រីបដិសេធដោយចោទថា លោកកឹម សុខា បានយករឿងដែលមិនពិត វាយប្រហារលោកស្រីនៅក្នុងអង្គប្រជុំ ហើយលោកស្រីគ្មានឱកាសបកស្រាយ។ ក៏ប៉ុន្តែនៅក្នុងកិច្ចប្រជុំគណៈកម្មការវិន័យនៅថ្ងៃនេះ លោកស្រីនៅតែអះអាងថា នោះគឺជាសម្ដីរបស់លោកកឹម សុខា មិនមែនជាសម្ដីរបស់លោកស្រី ទេ។ ជាមួយគ្នានេះ លោកស្រីឡាក់ សុភាព ទាមទាររក្សាកិត្តិយសក្នុងនាមជាមន្ដ្រីជាន់ខ្ពស់របស់គណបក្ស និងបញ្ហាសុវត្ថិភាពផ្ទាល់ខ្លួនផងដែរ។
ទោះជាយ៉ាងនេះក្ដី លោកស្រី ឡាក់ សុភាព មិនបានបញ្ជាក់ពីការចាកចេញពីគណបក្សសង្គ្រោះជាតិនោះទេ ក៏ប៉ុន្តែលោកស្រីអះអាងថា ការសម្រេចចិត្តយ៉ាងណានោះ អាស្រ័យលើថ្នាក់ដឹកនាំគណបក្សប៉ុណ្ណោះ។ មានសំណួរមុតស្រួចមួយចំនួនត្រូវបានចោទសួរលោកស្រី អំឡុងពេលចូលសវនាការ ចំពោះមុខគណៈកម្មការវិន័យ ដូចជាការលើកឡើងថា «លោកស្រីចង់នៅក្នុងគណបក្សសង្គ្រោះជាតិដែរឬទេ?» ជាដើម។
ទាក់ទងទៅនឹងបញ្ហានេះ លោក អ៊ូ ច័ន្ធរិទ្ធិ ប្រធានគណៈកម្មាធិការវិន័យគណបក្សសង្គ្រោះជាតិថ្លែងថា គណបក្សបានទុកឱកាសរយៈពេលមួយថ្ងៃឲ្យលោកស្រីឡាក់ សុភាព បកស្រាយទៅអ្នកកាសែតវិញ បើទោះណាលោកស្រីបាននិយាយឬអត់និយាយក្ដី ដោយសារផ្ដើមចេញពីគាត់ ដែលបានចោទប្រកាន់ពីអំពើពុករលួយរបស់ថ្នាក់ដឹកនាំបក្ស។
លោកអ៊ូ ច័ន្ទរិទ្ធិ បញ្ជាក់ថា បើមិនមានការឆ្លើយតបជាវិជ្ជមានទេ គណៈកម្មការវិន័យនឹងចាត់វិធានការទៅតាមបទបញ្ជាផ្ទៃក្នុងរបស់គណបក្ស ទៅតាមទំងន់ទោសរបស់លោកស្រី។ ជាមួយគ្នានេះ លោក អ៊ូ ច័ន្ទរិទ្ធិ ក៏បានបន្ថែមផងដែរថា ជំហរបស់គណបក្ស គឺបដិសេធទាំងស្រុង អំពើពុករលួយរបស់មេដឹកនាំគណបក្ស ព្រមទាំងច្រានចោលផងដែរនូវការបែកបាក់គ្នាក្នុងជួរគណបក្ស។
ដោយឡែក ចំពោះញត្តិសរសេរដោយដៃ ដែលមានស្នាមមេដៃអ្នកគាំទ្រគណបក្សជិត២០មេដៃ ដាក់ប្ដឹងទៅអង្គភាពប្រឆាំងអំពើពុករលួយឲ្យមានការស៊ើបអង្កេតនោះ ទាំងលោកស្រីឡាក់ សុភាព និងលោកអ៊ូ ច័ន្ទរិទ្ធិ បានបដិសេធថា ជាលិខិតមិនពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ