គណបក្សប្រជាជនទទួលស្គាល់ថា កំណែទម្រង់ជាចំណុចស្លាប់រស់របស់ខ្លួន
គណបក្សប្រជាជនកម្ពុជានៅថ្ងៃសុក្រទី៣០ មករានេះ បានបើកមហាសន្និបាតវិសាមញ្ញតំណាងបក្សទូទាំងប្រទេសនៅមជ្ឈមណ្ឌលកោះពេជ្រ។ មហាសន្និបាតដែលមានអ្នកចូលរួមប្រមាណជាង១៣៥០នាក់នោះនឹងបើកធ្វើឡើងរយៈពេលពីរថ្ងៃកន្លះចាប់ពីថ្ងៃសុក្រ ដល់ថ្ងៃអាទិត្យទី១ កុម្ភៈ ដើម្បីពិភាក្សាស្តីពីការកំណែទម្រង់ជាបន្តទៀតនៃបក្សកាន់អំណាច ខណៈដែលការបោះឆ្នោតកន្លងទៅបក្សកាន់អំណាចចុះប្រជាប្រិយភាពខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ថ្លែងបើកមហាសន្និបាត ប្រធានកិត្តិយសគណបក្សលោកហេង សំរិន សង្កត់ធ្ងន់ថា កំណែទម្រង់គឺជាចំណុចស្លាប់រស់របស់បក្សកាន់អំណាច។ លោក ហេង សំរិន៖ “អង្គសន្និបាតរបស់យើងលើកនេះ មានប្រធានបទសំខាន់គឺ ការកំណែទម្រង់ គឺជាអាយុជីវិតរបស់ជាតិ និងរបស់គណបក្សប្រជាជនកម្ពុជា”។ លោក ហេង សំរិនដែលជាប្រធានរដ្ឋសភាផងនោះ បានបញ្ជាក់ពីមូលហេតុថា ដោយសារបរិយាកាសនៃសភាពការណ៍ថ្មីដែលតម្រូវឱ្យបក្សកាន់អំណាចជាង៣០ឆ្នាំមួយនេះ ត្រូវកែទម្រង់ជាចាំបាច់នៅការដឹកនាំរបស់ខ្លួន។
បើតាមលោកប្រធានគណបក្សកិត្តយសរូបនេះ មានតែកំណែទម្រង់ជាអចិន្ត្រៃយ៍ទេទើបអាចឱ្យគណបក្សកាន់អំណាចនៅតែជាអ្នកតំណាងឱ្យផលប្រយោជន៍ប្រជាជនគ្រប់ពេលវេលា។ ក្នុងមហាសន្និបាតដែលមានសុទ្ធតែមន្ត្រីជាន់ខ្ពស់គណបក្សដែលរួមមានទាំងយុវជនជាច្រើននាក់ផង លោក ហេង សំរិនបានប្រកាសឱ្យមហាសន្និបាតបក្សទាំងមូលត្រូវសិក្សាឱ្យគ្រប់ជ្រុងជ្រោយអំពីលទ្ធផលដែលបក្សកាន់អំណាចធ្លាក់ការគាំទ្រ និងវាយតម្លៃឱ្យបានម៉ត់ចត់ពីចំណុចខ្លាំងនិងចំណុចខ្សោយរបស់គណបក្សសំដៅជំរុញឱ្យការកំណែទម្រង់របស់ខ្លួនមានប្រសិទ្ធភាព។
សូមកត់សំគាល់ថាការដាក់របៀបវារៈស្តីពីកំណែទម្រង់នេះគឺក្រោយពេលដែលគណបក្សប្រជាជនកម្ពុជាបានធ្លាក់ចុះប្រជាប្រិយភាពយ៉ាងខ្លាំងមិនធ្លាប់មានក្នុងការបោះឆ្នោតអាណត្តិទី៥កន្លងទៅ។ បន្ថែមពីនេះ ក្រោយការបោះឆ្នោតបក្សកាន់អំណាចនៃលោកនាយករដ្ឋមន្ត្រីហ៊ុន សែនបានជួបប្រទះការធ្វើបាតុកម្មប្រឆាំងក្រោមការដឹកនាំដោយគណបក្សសង្គ្រោះជាតិ របស់លោកសម រង្ស៊ី និងលោក កឹម សុខា។
ដើម្បីឆ្លើយតបនឹងសកម្មភាពអសកម្មមួយចំនួន គណបក្សទាំងមូលនឹងពិនិត្យមើលលើបញ្ហាអសកម្មភាពក្រោមការដឹកនាំរបស់ខ្លួន ដូចជាអំពើពុករលួយ បក្ខពួកគ្រួសារនិយម ការប្រើប្រាស់អំណាចដោយបំពាន គម្លាតរវាងអ្នកមាននិងអ្នកក្រ ការខ្វះជំនឿទុកចិត្តរបស់ពលរដ្ឋលើប្រព័ន្ធយុត្តិធម៌ រួមទាំងបញ្ហាព្រៃឈើ និងបញ្ហាដីធ្លីផងដែរ។ នេះបើតាមការបញ្ជាក់ពីកិច្ចប្រជុំ។ បើតាមប្រភពដដែល បញ្ហាព្រំដែន និងជនអន្តោប្រវេសន៍នឹងត្រូវដាក់ក្នុងរបៀបវារៈផងដែរ។
សូមបញ្ជាក់ថា មហាសន្និបាតដែលមានលោកហេង សំរិន និងលោកនាយករដ្ឋមន្ត្រីហ៊ុន សែនជាប្រធាននឹង មើលលើកិច្ចការធំ៣ចំណុច។ របៀបវារៈធំទាំងបីនោះមាន ទី១ការឆ្លង និងអនុម័តលើរបាយការណ៍ស្តីពីស្ថានភាពនៅកម្ពុជារយៈពេល១ឆ្នាំ ២០១៣-២០១៤ក្រោយការបោះឆ្នោត និងទិសដៅរបស់គណបក្សជាបន្តទៀត។ ទី២គឺរបាយការណ៍ស្តីពីកំណែទម្រង់ការបោះឆ្នោត និងចុងក្រោយគឺការបោះឆ្នោតបំពេញបន្ថែមសមាជិកគណៈកម្មាធិការកណ្តាលគណបក្ស។ យ៉ាងណាក៏ដោយនៅមិនទាន់មានសមាសភាពគណៈកម្មាធិការកណ្តាលថ្មីត្រូវបានបង្ហើបឱ្យដឹងដែលនឹងត្រូវបន្ថែមលើសមាសភាពបច្ចុប្បន្នមានប្រមាណ២៦០នាក់ស្រាប់នោះ។
ក្នុងមហាសន្និបាតតំណាងទូទាំងប្រទេសដែលមានសមាសភាពប្រមាណជាង១៣៥០នាក់នោះ គឺមិនមានវត្តមានលោក ជាស៊ីមប្រធានគណបក្សនិងប្រធានព្រឹទ្ធសភាដែលកំពុងមានជំងឺនោះទេ ក្រៅពីនេះលោក ស ខេង ថ្នាក់ដឹកនាំជាន់ខ្ពស់នៃការរិយាល័យនយោបាយ ក៏មិនបានបង្ហាញវត្តមានក្នុងមហាសន្និបាតផងដែរ។ ទន្ទឹងនឹងនេះដែរ លោកនាយករដ្ឋមន្ត្រីហ៊ុន សែនដែលជាប្រធានស្តីទីគណបក្សប្រជាជនកម្ពុជា បានថ្លែងទៅកាន់សមាជិកចូលរួមទាំងអស់ថា គ្មានបក្សប្រហារនោះទេ ខណៈដែលលោកលោកជាស៊ីមប្រធានគណបក្សគ្មានវត្តមាន និងមានជំងឺបាត់មុខពីនយោបាយនោះ។
លោកនាយករដ្ឋមន្ត្រីបានបញ្ជាក់នៅក្នុងមហាសន្និបាតថា លោកជាស៊ីម នៅតែជាប្រធានគណបក្សដដែល បើទោះបីជាមានជំងឺក៏ដោយព្រោះថានេះ គឺជាវប្បធម៌សាមគ្គីភាពនិងរួបរួមគ្នារបស់គណបក្សកាន់អំណាច។ ការបញ្ជាក់របៀបនេះដើម្បីបញ្ចប់ពាក្យចចាមអារ៉ាមថា មហាសន្និបាតគណបក្សប្រជាជនលើកនេះអាចនឹងជជែកពីការផ្លាស់ប្តូរប្រធានគណបក្ស។ មហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជានឹងបន្តធ្វើរហូតដល់ថ្ងៃទី១កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ