មនុស្ស៧នាក់ស្លាប់ដោយសារគ្រោះថ្នាក់ចរាចរណ៍នៅថ្ងៃសែនចូលឆ្នាំចិន ខណៈគ្រោះអគ្គិភ័យ៤លើកបំផ្លាញផ្ទះរាប់សិបខ្នង
តុល្យការ ដំបូង នៅថ្ងៃសែនចូលឆ្នាំចិនកាលពីថ្ងៃម្សិលម៉ិញ យ៉ាងហោចណាស់មនុស្ស៧នាក់បានស្លាប់ និងមនុស្ស១៤នាក់បានរងរបួសធ្ងន់ដោយសារគ្រោះថ្នាក់ចរាចរណ៍។ ចំណែកឯបញ្ហាគ្រោះអគ្គិភ័យវិញ បានកើតឡើងចំនួន៤ករណីនៅទូទាំងប្រទេស និងបានបំផ្លាញផ្ទះប្រជាពលរដ្ឋអស់រាប់សិបខ្នង។
ចុះផ្សាយនៅថ្ងៃ៖
ស្តាប់ - ០២:០០
គ្រោះអគ្គិភ័យចុងក្រោយបានកើតឡើង កាលពីវេលាម៉ោង១២ អធ្រាត្រយប់ ថ្ងៃទី៧ឈានចូលទី៨កុម្ភៈឆ្នាំ២០១៦នេះ ស្ថិតនៅខាងក្រោយវត្តចាក់អង្រែក្រោម ស្ថិតក្នុងខ័ណ្ឌមានជ័យ រាជធានីភ្នំពេញ ដែលបានលេបត្របាក់យកផ្ទះប្រជាពលរដ្ឋអស់ចំនួន៩៧ខ្នង។
លោក នេត វន្ថា ប្រធានការិយាល័យនគរបាលបង្ការ និងពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញបានថ្លែងថា លំនៅស្ថានដែលរងការឆេះនេះ ជាប្រភេទសំណង់ថ្មក្រោម ឈើលើ និងប្រក់ស័ង្កសី ជាសំណង់មិនរៀបរយដែលសង់នៅតាមជួរមាត់ទន្លេក្នុងខណ្ឌមានជ័យ។ ប្រតិបត្តិការពន្លត់អគ្គិភ័យបានបញ្ចប់នៅប្រមាណជាម៉ោងជិត៤ទៀបភ្លឺ ថ្ងៃទី៨កុម្ភៈ ដោយប្រើប្រាស់រថយន្តពន្លត់អគ្គិភ័យចំនួន២៥គ្រឿង និងអស់ទឹកចំនួន៦៦ជើង។
សមត្ថកិច្ចនៅមិនទាន់បញ្ជាក់ពីមូលហេតុនៃគ្រោះអគ្គិភ័យនេះនៅឡើយទេ ក៏ប៉ុន្តែមូលហេតុបឋមត្រូវបានគេសន្និដ្ឋានថា បណ្តាលមកពីការដុតផាវ និងកាំជ្រួច អបអរសាទរបុណ្យចូលឆ្នាំចិន-វៀតណាមកាលពីថ្ងៃម្សិលម៉ិញ។ យ៉ាងណាក៏ដោយ គ្រោះអគ្គិភ័យនេះ មិនបណ្តាលឲ្យមានអ្នកស្លាប់បាត់បង់ជីវិតនោះទេ។
បើតាមតុល្យការដំបូងនៃថ្ងៃសែនចូលឆ្នាំចិនកាលពីថ្ងៃទី៧កុម្ភៈឆ្នាំ២០១៦ គ្រោះអគ្គិភ័យនៅទូទាំងប្រទេសមានចំនួន៤ករណី ក្នុងនោះ រាជធានីភ្នំពេញមាន២ករណី ខេត្តកំពង់ស្ពឺមាន១ករណី និងខេត្តកំពង់ធំមាន១ករណី។ មូលហេតុនៃគ្រោះអគ្គីភ័យទាំងនេះ ភាគច្រើនបណ្តាលមកពីការអុចទៀនធូប របស់ប្រជាពលរដ្ឋក្នុងថ្ងៃសែនចូលឆ្នាំចិន។ ចំណែកនៅខេត្តកំពង់ស្ពឺ មូលហេតុគឺបណ្តាលមកពីការលេងភ្លើងរបស់ក្មេងៗដែលធ្វើឲ្យឆេះផ្ទះអស់៤ខ្នង។
ក្រៅពីគ្រោះអគ្គិភ័យ គ្រោះថ្នាក់ចរាចរណ៏ ក៏បានបណ្តាលឲ្យមនុស្ស៧នាក់ស្លាប់ ១៤នាក់រងរបួសធ្ងន់ និង៦នាក់រងរបួសស្រាល នៅថ្ងៃសែនចូលឆ្នាំចិនកាលពីថ្ងៃទី៨កុម្ភៈ។ បើយោងតាមរបាយការណ៍ របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈនៃក្រសួងមហាផ្ទៃ គ្រោះថ្នាក់ចរាចរណ៍នៅទូទាំងប្រទេសមានចំនួន១៥ករណី។ ចំនួននេះនឹងកើនឡើងថែមទៀត ខណៈដែលពិធីបុណ្យចូលឆ្នាំប្រពៃណីចិននៅមានរយៈពេល២ថ្ងៃទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ