កីឡាករបាល់ទាត់ឆ្នើមកម្ពុជាចាន់ វឌ្ឍនាកា ត្រូវបានផ្ទេរទៅលេងនៅជប៉ុន
នៅទីផុតទៅ កីឡាករបាល់ទាត់ឆ្នើមរបស់ក្រុមជម្រើសជាតិកម្ពុជា និងក្លិបបឹងកេតអង្គរចាន់ វឌ្ឍនាកា បានសម្រេចចិត្តទៅលេងឲ្យក្លិបFujiedaនៅលីគទី៣ក្នុងប្រទេសជប៉ុន។ នៅរសៀលនេះ ក្លិបបឹងកេតអង្គររបស់កម្ពុជា និងក្លិបFujieda របស់ជប៉ុនបានចុះហត្ថលេខាជាផ្លូវការហើយក្នុងការផ្ទេរកីឡាករឆ្នើមវ័យក្មេងរូបនេះទៅលេងក្នុងប្រទេសជប៉ុន។ យ៉ាងណាក៏ដោយ តម្លៃខ្លួនរបស់វឌ្ឍនាការមិនត្រូវបានក្លិបទាំងពីរ និងសាម៉ីខ្លួនប្រាប់ឲ្យដឹងនោះទេ។
ចុះផ្សាយនៅថ្ងៃ៖
ស្តាប់ - ០២:៣៥
បន្ទាប់ពីការចុះហត្ថលេខាផ្ទេរជាផ្លូវការនេះ កីឡាករចាន់ វឌ្ឍនាកា បានក្លាយជាកីឡាករបាល់ទាត់កម្ពុជាទី១ហើយដែលមានសមត្ថភាពអាចទៅលេងឲ្យក្លិបនៅក្នុងប្រទេសជប៉ុនបាន បើទោះបីជាក្លិបនោះលេងក្នុងលីគទី៣យ៉ាងណាក៏ដោយ។ ការផ្ទេរកីឡាករចាន់ វឌ្ឍនាកានេះ គឺធ្វើឡើងក្នុងក្របខណ្ឌខ្ចីជើងរយៈពេល១ឆ្នាំប៉ុណ្ណោះរវាងក្លិបបាល់ទាត់បឹងកេតអង្គរ និងក្លិបFujieda ហើយវាក៏ជាលទ្ធផលនៃការទៅសមជើងនៅក្លិបជប៉ុនមួយនេះពេញមួយសប្តាហ៍របស់កីឡាករចាន់ វឌ្ឍនាកាកាលពីអំឡុងដើមខែវិច្ឆិកាឆ្នាំ២០១៦កន្លងទៅផងដែរ។
ប្រធានក្លិបFujieda ដែលបានជិះយន្តហោះមកចុះហត្ថលេខានាំយកកីឡាករចាន់ វឌ្ឍនាកាដោយផ្ទាល់នៅក្នុងប្រទេសកម្ពុជា បានគូសបញ្ជាក់ថា ការសម្រេចនេះ គឺដោយសារតែលោកនិងក្លិបពេញចិត្តយ៉ាងខ្លាំងលើសមត្ថភាពរបស់គេ ជាពិសេសគឺល្បឿន និងបច្ចេកទេសបំប៉ោងសំណាញ់ទីដ៏ល្អ។ លោកបន្ថែមថា ក្លិបនឹងជួយបណ្តុះបណ្តាលកីឡាកររូបនេះឲ្យមានសមត្ថភាពកាន់តែល្អថែមទៀត។ សម្រាប់លោកបែរ មករា អ្នកចាត់ទូទៅរបស់ក្លិបបឹងកេតអង្គរដែលជាទ្រនំចាស់របស់កីឡាករចាន់ វឌ្ឍនាកាវិញ លោកពិតជាលំបាកក្នុងការសម្រេចឲ្យវឌ្ឍនាកាចាកចេញពីក្លិបព្រោះថាគេគឺជាបេះដូងរបស់ក្លិបបឹងកេតអង្គរ។ ប៉ុន្តែទោះជាចង់ឫមិនចង់លោកនៅតែបើកឱកាសឲ្យកីឡាករឆ្នើមរូបនេះទៅបន្តអាជីពនៅជប៉ុន ព្រោះលោកសង្ឃឹមថា វឌ្ឍនាកានឹងជួយលើកស្ទួយវិស័យបាល់ទាត់កម្ពុជាឲ្យល្បីឈ្មោះនៅក្នុងតំបន់អាស៊ីនេះ។
មានវ័យ២២ឆ្នាំកម្ពស់១ម៉ែត្រ៧៣ ចាន់ វឌ្ឍនាកា គឺខ្សែប្រយុទ្ធដ៏មុតស្រួចទាំងសម្រាប់ក្រុមជម្រើសជាតិកម្ពុជា និងទាំងក្លិបបឹងកេតអង្គរ។ កីឡាករដែលជាកូនប្រុសលោកអភិបាលខេត្តកំពតរូបនេះ បានជួយក្លិបបឹងកេតអង្គរឲ្យលើកពានលីគកំពូលកម្ពុជាក្នុងឆ្នាំ២០១៦ និងបានក្លាយជាម្ចាស់ស្បែកជើងមាស២រដូវកាលជាប់គ្នាក្នុងឆ្នាំ២០១៥ និងឆ្នាំ២០១៦ថែមទៀត។ មិនតែប៉ុណ្ណោះ គេក៏ធ្លាប់ជាម្ចាស់ស្បែកជើងមាសក្នុងពានរង្វាន់ Hun Sen-Cup ឆ្នាំ២០១៣ផងដែរ។ ចាន់ វឌ្ឍនាកា ចេញមកពីស្នាលយុវជនរបស់ក្លឹបព្រះខ័នរាជស្វាយរៀង និង ផ្ទេរទៅបឹងកេតអង្គរក្នុងឆ្នាំ២០១។ កីឡាករឆ្នើមជំនាញជើងឆ្វេងរូបនេះ ត្រូវបានកោះហៅឲ្យចូលលេងក្នុងក្រុមជម្រើសជាតិកម្ពុជាឈុតធំនៅក្នុងឆ្នាំ២០១៣ ហើយបានស៊ុតបញ្ចូលទីបាន១០គ្រាប់ក្នុងចំណោម២៨ប្រកួត។
កីឡាករចាន់ វឌ្ឍនាកាមិនត្រឹមតែមានឈ្មោះបោះសំឡេងក្នុងស្រុកប៉ុណ្ណោះទេ ប៉ុន្តែរូបគេក៏ត្រូវបានក្លិបនៃប្រទេសជិតខាងមួយចំនួនចាប់អារម្មណ៍ផងដែរ បន្ទាប់ពីឃើញសមត្ថភាពរបស់គេក្នុងពេលប្រកួតដណ្តើមពានរង្វាន់ថ្នាក់តំបន់នានាកន្លងមក។ ទោះជាយ៉ាងដូចម្តេចក្តី កីឡាករដែលពោរពេញដោយទេពកោសល្យរូបនេះបានសម្រេចចិត្តផ្លាស់ទៅលេងនៅជប៉ុនដោយគេចាត់ទុកថា ជាជំហានដំបូងនៃការចេញទៅលេងនៅក្រៅប្រទេស។ វឌ្ឍនាកា សង្ឃឹមថា ការចេញទៅលេងនៅជប៉ុននេះ នឹងជាការត្រួសត្រាយផ្លូវមួយសម្រាប់យុវជនក្រោយៗដែលចូលចិត្តលេងបាល់ និងមានឆន្ទៈចង់ទៅលេងនៅក្រៅប្រទេសនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ