ធម្មយាត្រារបស់យុវជនបរិស្ថានទៅកាន់ខេត្តព្រះសីហនុបានផ្អាកមួយថ្ងៃ ក្រោយជួបឧបសគ្គខ្លះៗ
ក្រុមយុវជនមួយក្រុមដែលអះអាងថា ជាក្រុមយុវជនស្រលាញ់បរិស្ថាន បានសម្រេចផ្អាកដំណើរធម្មយាត្រាទៅកាន់ខេត្តព្រះសីហនុមួយថ្ងៃ នៅថ្ងៃទីបីនេះ បន្ទាប់ពីបានជួបឧបសគ្គ។ ក្រុមយុវជនបរិស្ថាននៃចលនាមាតាធម្មជាតិ ដែលក្នុងនោះរួមមានព្រះសង្ឃផង បានដាក់គោលដៅថា នឹងធ្វើធម្មយាត្រាដោយថ្មើរជើងពីភ្នំពេញទៅកាន់ខេត្តព្រះសីហនុ ក្នុងរវាង៧ទៅ១០ថ្ងៃ ដើម្បីពញ៉ាក់ស្មារតីឲ្យអាជ្ញាធរខេត្តព្រះសីហនុ អនុវត្តឲ្យម៉ឺងម៉ាត់ចំពោះអគារកាស៊ីណូចិនមួយកន្លែង ដែលសង់រំលោភលើដីឆ្នេរកោះរ៉ុងសន្លឹម ហើយបង្ហូរកាកសំណល់ចូលទៅក្នុងសមុទ្រ។
ចុះផ្សាយនៅថ្ងៃ៖
ស្តាប់ - ០២:០៧
ធម្មយាត្រារបស់ក្រុមយុវជនមួយក្រុមដែលអះអាងថា ជាយុវជនស្រលាញ់បរិស្ថាននៃចលនាមាតាធម្មជាតិ ដែលក្នុងនោះរួមមានព្រះសង្ឃផង បានចាប់ផ្តើមចេញដំណើរពីទីក្រុងភ្នំពេញ ឆ្ពោះទៅកាន់ខេត្តព្រះសីហនុ កាលពីថ្ងៃទី ១៥ តុលា។ ប៉ុន្តែដំណើរធម្មយាត្រានេះ បានផ្អាកមួយថ្ងៃ នៅថ្ងៃទី ១៧ តុលានេះ ដោយសារតែជួបឧបសគ្គមួយចំនួន។ ក្នុងនោះ ព្រះសង្ឃខ្លះបានជួបនឹងបញ្ហាសុខភាព ចំណែកឯយុវជនខ្លះ បានជួបបញ្ហាស្ពឹកជើងជាដើម។ នេះបើតាមការបញ្ជាក់ពី យុវជន ថុន រដ្ឋា សកម្មជនបរិស្ថាននៃចលនាធម្មជាតិ។ តែយ៉ាងណាក្តី យុវជនរូបនេះបានអះអាងថា ពួកគេនឹងបន្តដំណើរទៅមុខទៀត និងទៅឲ្យដល់គោលដៅនៅរវាង៧ ទៅ១០ថ្ងៃទៀត។
សូមបញ្ជាក់ថា គោលដៅនៃដំណើរថ្មើរជើង ឬធម្មយាត្រា របស់យុវជនដែលអះអាងថា ជាក្រុមស្រលាញ់បរិស្ថាននៃចលនាមាតាធម្មជាតិនេះ គឺដើម្បីទាមទារឲ្យអាជ្ញាធរខេត្តព្រះសីហនុ ចុះអនុវត្តវាយកម្ទេចសំណង់កាស៊ីណូចិនខុសច្បាប់មួយកន្លែង ឈ្មោះ ជីង ទីង Jingding ដែលបានសាងសង់រំលោភលើដីឆ្នេរសមុទ្រកោះរ៉ុងសន្លឹម និងបានបង្ហូរកាកសំណល់ចូលទៅក្នុងសមុទ្រដែលបង្កឲ្យមានបញ្ហាដល់បរិស្ថាន។ បន្ថែមលើនេះ ធម្មយាត្រាក៏ជានិមិត្ដរូប ដើម្បីបង្ហាញឲ្យពលរដ្ឋចូលរួមថែរក្សា និងអភិរក្សដល់ឆ្នេរសមុទ្រ និងជានិមិត្តរូបសម្រាប់ដាស់ស្មារតីដល់យុវជនជំនាន់ក្រោយ ឲ្យហ៊ានចូលរួមការពារធនធានធម្មជាតិ និងលះបង់ដើម្បីបរិស្ថានផងដែរ។ យ៉ាងណាក្តី អ្នកនាំពាក្យសាលាខេត្តព្រះសីហនុ លោក ឃាង ភារម្យ បានថ្លែងថា អាជ្ញាធរខេត្តបានចាត់វិធានការផ្អាកអាជីវកម្មកាស៊ីណូនេះរួចហើយ កាលពីចុងខែឧសភាមក ដោយមិនមានសកម្មភាពអ្វីទៀតឡើយ។ ចំណែកឯការវាយកម្ទេចកាស៊ីណូនេះវិញ ត្រូវបានលោក ឃាង ភារម្យ បញ្ជាក់ថា ក៏កំពុងស្ថិតនៅក្នុងនីតិវិធីរបស់សមត្ថកិច្ចផងដែរ។ បើតាមលោក ឃាង ភារម្យ សមត្ថកិច្ចមិនអាច ធ្វើអ្វីភ្លាមៗ តាមការចង់បានរបស់ក្រុមយុវជនទាំងនេះបានឡើយ។
គួរជំរាបជូនថា គិតត្រឹមល្ងាចថ្ងៃទី១៦ តុលា ធម្មយាត្រារបស់យុវជនបរិស្ថាននៃចលនាមាតាធម្មជាតិប្រមាណជាជិត១០នាក់ ដែលក្នុងនោះរួមមានព្រះសង្ឃផង បានដើរដល់ឃុំចំបក់ ស្រុកសំរោងទង ខេត្តកំពង់ស្ពឺ ហើយគ្រោងនឹងបន្តដំណើរទៅមុខ ទៅឲ្យដល់គោលដៅនៅរវាង៧ទៅ១០ថ្ងៃទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ