សុវត្ថិភាពនុយក្លេអ៊ែរ ៖ មេរៀននៃគ្រោះថ្នាក់នុយក្លេអ៊ែរឈែរណូប៊ីល
ថ្ងៃនេះជាគម្រប់ខួប៣០ឆ្នាំគត់ នៃគ្រោះថ្នាក់នុយក្លេអ៊ែរឈែរណូប៊ីល ដែលជាគ្រោះថ្នាក់ដ៏ធ្ងន់ធ្ងរជាងគេបំផុតក្នុងប្រវត្តិសាស្ត្រ។ នៅថ្ងៃទី ២៦ មេសា ១៩៨៦ ម៉ាស៊ីនប្រតិករនុយក្លេអ៊ែរទីបួន នៃមជ្ឈមណ្ឌលនុយក្លេអ៊ែរ ឈែរណូប៊ីល ក្នុងរដ្ឋអ៊ុយក្រែន ជាអតីតសហភាពសូវៀតនៅឡើយ បានផ្ទុះ បែកសាយភាយធាតុវិទ្យុសកម្ម មួយសេរីក្នុងតំបន់។ អាជ្ញាធរសូវៀត បានប្រើពេលបីសប្តាហ៍ ទម្រាំទទួលស្គាល់គ្រោះថ្នាក់ដែលបង្កមហន្តរាយយ៉ាងធ្ងន់ធ្ងរដល់សុខភាព ដល់បរិស្ថាន និងសេដ្ឋកិច្ច ...
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០២
គ្រោះថ្នាក់នុយក្លេអ៊ែរនៅឈែរណូប៊ីល ត្រូវបានចាត់ទុកថាគ្រោះមហន្តរាយដ៏ធ្ងន់ធ្ងរមិនធ្លាប់ក្នុងប្រវត្តិសាស្ត្រ តែគ្រោះថ្នាក់នេះបានបញ្ឆក់ស្មារតីពិភពលោក បានហែកភ្នែកសហគមន៍អន្តរជាតិទាំងមូលឱ្យបានយល់ដឹងអំពីទំហំនៃគ្រោះថ្នាក់បង្កឡើងដោយអាតូម ដោយនុយក្លេអ៊ែរ និងនាំគ្នារួសរាន់គិតគូរដល់បញ្ហាសុវត្ថិភាពនុយក្លេអ៊ែរ។
វិស័យសុវត្ថិភាពនុយក្លេអ៊ែរ បានស្គាល់ការជឿនលឿនជាក់ស្តែង និងគួរឱ្យកត់សម្គាល់ខ្លាំង ជាងគេភ្លាម គឺការបង្កើតសមាគមន៍ក្រុមហ៊ុនអាជីវករនុយក្លេអ៊ែរពិភពលោក WANO នៅឆ្នាំ១៩៨៩។ មានអាជីវករសរុប ១៣០ គ្រប់គ្រងម៉ាស៊ីនប្រតិករ ចំនួន ៤៣០ នៅទូទាំងពិភពលោក ក្នុងពេលបច្ចុប្បន្ននេះ មានភ្នាក់ងារសវនកម្ម សម្រាប់ត្រួតពិនិត្យ និងផ្តល់អនុសាសន៍ឱ្យសមាជិកគោរពតាម។
តួនាទីរបស់អង្គការសហប្រជាជាតិផ្នែកនុយក្លេអ៊ែរ តំណាងដោយភ្នាក់ងារថាមពលអន្តរជាតិ អាអ៊ីអឺអា ក៏ត្រូវបានពង្រឹង។ ភ្នាក់ងារបានរៀបចំតាក់តែងបទដ្ឋានសុវត្ថិភាព និងបង្ខំឱ្យគ្រប់ប្រទេសជាសមាជិកទាំង១៦៨ ធ្វើសេចក្តីប្រកាសភាពនូវរាល់គ្រោះថ្នាក់ទាំងឡាយណាពាក់ព័ន្ធនឹងនុយក្លេអ៊ែរ បើទោះបីជាគ្រោះថ្នាក់តូចតាចក៏ដោយក្តី។
សន្ធិសញ្ញាស្តីពីសុវត្ថិភាពនុយក្លេអ៊ែរ ត្រូវបានអនុម័តនៅឆ្នាំ១៩៩៤។ កិច្ចព្រមព្រៀងអន្តរជាតិជាច្រើនទៀត ស្តីពីសំណល់វិទ្យុសកម្ម និងប្រព័ន្ធប្រកាសអាសន្នមុនគ្រោះថ្នាក់ ត្រូវបានចុះហត្ថលេខា។
ការវិវត្តន៍នៃភូមិសាស្ត្រនយោបាយ ក៏មានចំណែកក្នុងការវិស័យសុវត្ថិភាពដែរ។ ក្រោយការដួលរំលំរបបសហភាពសូវៀតទៅ រនាំងឧបសគ្គមួយចំនួនធំ ដែលខណ្ឌចែកពិភពលោកជាប្លុកកុម្មុយនិស្តនិងសេរី ក៏បានរលុបបាត់ទៅតាមនោះ និងបានធ្វើកិច្ចសហប្រតិបត្តិការអន្តរជាតិ ផ្នែកសុវត្ថិភាពនុយក្លេអ៊ែរមានដំណើរការកាន់តែប្រសើរឡើង។ អតីតប្រទេសកុម្មុយនិស្តនៅអឺរ៉ុបកណ្តាល ដែលមានប្រើម៉ាស៊ីនប្រតិករនុយក្លេអ៊ែរ ម៉ូដែលសូវៀត ដូចនៅឈែរណូប៊ីល បានទទួលជំនួយពីសហភាពអឺរ៉ុប ក្នុងនាមជាសមាជិកសហភាព។ ក្នុងចំណោមម៉ាស៊ីនប្រតិករ១៧ មាន៦ ត្រូវបានបិទជាស្ថាពរ។
កំហុសមនុស្ស
ប៉ុន្តែទោះបីជាសុវត្ថិភាពនុយក្លេអ៊ែរបានប្រសើរខ្លាំងយ៉ាងណាក៏ដោយ ក៏គ្រោះថ្នាក់នៅមាន មហន្តរាយនៅហ្វូគីស្ហ៊ីម៉ា ប្រទេសជប៉ុនដែលល្បីខាងមានបច្ចេកវិទ្យាសុវត្ថិភាពស្រួចខ្លាំង ជាឧទាហរណ៍។ ក្រោយហ្វូគូស្ហ៊ីម៉ា ពិភពលោកបានដកស្រង់មេរៀនមួយទៀត ! គ្រប់មជ្ឈមណ្ឌល គ្រប់ម៉ាស៊ីនប្រតិករ ត្រូវឆ្លងកាត់ការធ្វើតេស្តសាកល្បងភាពធន់នឹងសុវត្ថិភាព ឬហៅថា Stress Test ទាំងអស់។
ហានិភ័យដ៏ធំមួយទៀត ដែលគេពិបាកគ្រប់គ្រងបំផុត និងដែលមានកើតរួចមកហើយដូចគ្នា នៅឈែរណូប៊ីល និងហ្វូគូស្ហ៊ីម៉ា គឺ កត្តាមនុស្ស ! បើទោះបីជាសុវត្ថិភាពនុយក្លេអ៊ែរ ជឿនលឿនប្រសើរហួសគិត ប្រព័ន្ធការពារសុវត្ថិភាពម៉ាស៊ីនប្រតិករ គួរឱ្យទុកចិត្តបំផុតយ៉ាងណាក៏ដោយ ក៏កំហុសមនុស្ស នៅតែជាហានិភ័យដ៏ខ្ពស់។ បើតាមសហភាពអ្នកវិទ្យាសាស្ត្រ នៅឆ្នាំ២០១៥នេះ អាមេរិកវិះតែមានគ្រោះថ្នាក់នុយក្លេអ៊ែរ បង្កឡើងដោយកំហុសមនុស្ស ដល់ទៅ១០ដង។
ចំណាស់របស់ម៉ាស៊ីនប្រតិករក៏អាចជាបុព្វហេតុមួយ ! នេះបើតាមអង្គការការពារបរិស្ថាន Greenpeace។ វ័យចាស់ ខ្លះសាងសង់តាំងពីឆ្នាំ៦០ ឬ៧០ ដោយមិនបានគិតដល់បញ្ហាសុវត្ថិភាពគំរាមកំហែងដោយកត្តាខាងក្រៅ ពោលគឺការគំរាមកំហែងភេវកម្មឡើយ។ តាំងពីជាច្រើនខែមកហើយ ដែលអឺរ៉ុបព្រួយបារម្ភខ្លាំងខា្លចរងវាយប្រហារភេរវកម្មប៉ះពាល់ដល់នុយក្លេអ៊ែរ។ ថ្វីបើអឺរ៉ុបមានបទដ្ឋានសុវត្ថិភាពត្រឹមត្រូវ តែកត្តាមនុស្ស គឺមិនអាចទាយទុកបានឡើយ។
ទីផ្សារនុយក្លេអ៊ែរ
ក្នុងពេលដែលពិភពលោក ប្រឹងពង្រឹងសុវត្ថិភាព ការប្រកួតប្រជែងទីផ្សារនុយក្លេអ៊ែរក៏ស្ទុះឡើងទន្ទឹមគ្នាដែរ ! បច្ចុប្បន្ននេះ មានម៉ាស៊ីនប្រតិករនុយក្លេអ៊ែរជិត៤០០កំពុងដំណើរការ នៅក្នុងប្រទេសចំនួន ៣១។ ៦៥កំពុងសាងសង់ ក្នុងនោះជាងមួយភាគបីនៅប្រទេសចិន និងក្នុងគម្រោង ១៧៣រោងចក្រនុយក្លេអ៊ែរនឹងត្រូវបង្កើតឡើងនៅឆ្នាំ២០៣០ នៅក្នុងប្រទេសដែលមិនធ្លាប់មាននុយក្លេអ៊ែរ។
កំណើនសេដ្ឋកិច្ច តម្រូវការកើនឡើងឥតឈប់ផ្នែកថាមពល បានរុញច្រានប្រទេសកំពុងលូតលាស់ ចាប់អារម្មណ៍នឹងបច្ចេកវិទ្យានុយក្លេអ៊ែរដែលផ្តល់បរិមាណអគ្គីសនីបានច្រើន បើទោះបីជាដឹងថាបច្ចេកវិទ្យានេះត្រូវការចំណាយថវិកាវិនិយោគច្រើន។ ពេលនេះគ្រប់គ្នាកំពុងសំលឹងមើលចិន ដែលនឹងមានម៉ាស៊ីនប្រតិករជំនាន់ថ្មី ធានាបានសុវត្ថិភាពសក្តិសមនឹងតម្លៃប៉ុណ្ណា …
ក្រោយគ្រោះថ្នាក់នៅហ្វូគូស្ហ៊ីម៉ា បារាំងជើងឯកផ្នែកថាមពលអគ្គិសនីដើរដោយនុយក្លេអ៊ែរ ក៏បានសន្យាកាត់បន្ថយនុយក្លេអ៊ែរជាបណ្តើរៗ ឱ្យបានពី៥០ទៅ៧០%។ អាមេរិក បានបិទមជ្ឈមណ្ឌលមួយចំនួន តាំងពីឆ្នាំ២០១០ ដោយប្រឈមនឹងភាពសម្បូរហូរហៀនៃឧស្ម័នSchiste ការដាក់បង្ខំដោយគោរពបទដ្ឋានសុវត្ថិភាពក្រោយហ្វូគូស្ហ៊ីម៉ាដែលមានតម្លៃខ្ពស់។
គេទំនងជាត្រូវរង់ចាំដល់ឆ្នាំ២០២២ ឆ្នាំដែលអាល្លឺម៉ង់បានសម្រេចចិត្តបោះបង់នុយក្លេអ៊ែរនៅឆ្នាំ២០២២ ទាំងស្រុង ជាគំរូមុនសិន ទើបអាចនិយាយអំពីទីផ្សាររំសាយប្រតិករនុយក្លេអ៊ែរបានដោយពិតៗ។ សម្រាប់ពេលនេះ បើតាមសមាគមន៍នុយក្លេអ៊ែរពិភពលោក មានម៉ាស៊ីនប្រតិករប្រមាណ២៥០ នឹងពន្យារអាយុកាលធ្វើអាជីវកម្ម ១៥០នឹងបិទនៅ៤០ឆ្នាំខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ