ករណីផ្ទុះឆេះស្ថានីយអគ្គិសនីបរមាណូ Tchernobyl កាលពី ២៥ឆ្នាំមុន
ពេលដែលម៉ាស៊ីនប្រតិករនុយក្លេអ៊ែរទី៤ របស់ស្ថានីយអគ្គិសនីបរមាណូនៅអតីតសាធារណរដ្ឋសូវៀត Ukraine បានផ្ទុះឆេះ ក្នុងយប់ថ្ងៃ២៥ឆ្លងមក២៦មេសាឆ្នាំ១៩៨៦ មានអ្នកលត់ភ្លើង២៤០នាក់ដំបូង បានអន្តរាគមទៅបង្ក្រាបភ្លើងនោះ។ លុះក្នុងឆ្នាំបន្ទាប់ៗមក ចំនួនអ្នកដែលចូលរួមពុះពារជំនះលើផលវិបាក នៃធាតុវិទ្យុសកម្មបន្សល់ទុក ដោយការផ្ទុះឆេះនេះ ឡើងដល់ជាង ៦០០.០០០នាក់ឯណោះ។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា ពីម៉ូស្គូ
មូលហេតុនៃការផ្ទុះឆេះនោះ គឺបណ្តាលមកពីប្រព័ន្ធបូមទឹក សម្រាប់ធ្វើឲ្យត្រជាក់ដល់ម៉ាស៊ីនប្រតិករ ខូចលែងដើរ ដូចករណីក្នុងស្ថានីយអគ្គិសនីបរមាណូនៅជប៉ុន ឥឡូវនេះអ៊ីចឹង។
ពេលផ្ទុះកាលណោះ វាបានច្រានគម្របទម្ងន់ដល់ ៣.០០០តោន ឲ្យប៉ើងខ្ទាតទៅក្នុងអាកាស កំពស់ដល់រាប់សិបម៉ែត្រ។ ធាតុធ្យូង Graphite នៃម៉ាស៊ីនប្រតិករនោះឆេះទ្រលោម បង្កើតជាភ្នក់អគ្គិភ័យ ចំនួន៣០កន្លែង នៅតាម bloc réacteur ៣ទៀត។ អ្នកលត់ភ្លើង ២៤០នាក់ដំបូង ដោយចំណាយពេលអស់៤ម៉ោង ក៏បានបង្ក្រាបភ្លើងនោះឲ្យរលត់ទៅវិញ ប៉ុន្តែ ដោយតម្លៃនៃសុខភាព និងជីវិតគេ ដ្បិតពេលលត់នោះ គេបានត្រូវផ្ចាញ់ដោយមិនដឹងខ្លួន ទៅដោយធាតុវិទ្យុសកម្មមើលមិនឃើញ ដក់ជាប់ក្នុងអាកាស។
ពេលផ្ទុះនោះ បានធ្លាក់ខ្លួនស្លាប់ភ្លាមភ្លែតនៅនឹងកន្លែង គឺបុគ្គលិក២នាក់ ដែលបានរងចំហាយផ្ទុះធ្ងន់ជាងគេ។ រីឯបុគ្គលិក១៣៤នាក់ទៀត ដែលពេលផ្ទុះបានស្ថិតនៅក្នុងស្ថានីយដែរ គេសុទ្ធតែផ្ចាញ់ដោយធាតុវិទ្យុសកម្ម ក្នុងកម្រិតខុសៗគ្នា ពីក្នុងនោះ ៣ខែក្រោយមក បានធ្លាក់ខ្លួនស្លាប់អស់ ៣១នាក់។ បណ្តាជន ១១៥.០០០នាក់ បានត្រូវជម្លៀសចេញពីតំបន់ក្នុងរង្វង់ ៣០គ.ម. នៅជុំវិញកន្លែងផ្ទុះ។
ធាតុ Uranium បរិមាណ ១៨៦តោន ដែលធ្លាយចេញពីម៉ាស៊ីនប្រតិករផ្ទុះនោះ បន្សល់ជាធាតុវិទ្យុសកម្ម រសាត់តាមខ្យល់ទៅគ្របដណ្តប់លើដែនដីអ៊ុយក្រែន បេឡារុស រុស្ស៊ី និងប្រទេសរាប់សិបផ្សេងទៀតនៃទ្វីបអឺរ៉ុប។ ក្នុង២៥ឆ្នាំកន្លងទៅ តាមតួលេខប្លែកៗ បានធ្លាក់ខ្លួនរងគ្រោះនិងស្លាប់ ដោយធាតុវិទ្យុសកម្មនេះ គឺមនុស្សរាប់ម៉ឺននាក់ទៅហើយ។
សោកនាដកម្មនៅ Tchernobyl ជាសោកនាដកម្មធំបំផុត ក្នុងប្រវត្តិនៃការប្រើធាតុនុយក្លេអ៊ែរ សម្រាប់គោលដៅស៊ីវិល។ ដើម្បីពុះពារជំនះលើផលវិបាករបស់វា សរុបទៅ មានមនុស្សដល់ជាង ៦សែននាក់ឯណោះ បានរួមចំណែក។
ស្ថានីយអគ្គិសនីបរមាណូ Tchernobyl មុនសោកនាដកម្មនោះ ផ្តល់អគ្គិសនី បាន១/១០ នៃថាមពលអគ្គិសនីនៅទូទាំងប្រទេសអ៊ុយក្រែន។ វាមានម៉ាស៊ីនប្រតិករនុយក្លេអ៊ែរ៤ នីមួយៗមានកម្លាំងភ្លើង ១.០០០ Megawatt។ បច្ចុប្បន្ន ម៉ាស៊ីនប្រតិករនុយក្លេអ៊ែរ ដែលបានផ្ទុះខូចនោះ គឺគ្របដណ្តប់ពីលើ ដោយផ្នូរកំពស់ ១០០ម៉ែត្រ ធ្វើពីបេតុងជាង ៤០០.០០០ម៣និងចម្រឹងដែក ៧.០០០ តោន ដើម្បីការពារទល់នឹងការភាយចេញមក នៃធាតុវិទ្យុសកម្ម ដែលគ្រោះថ្នាក់ដល់ជីវិតមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ