រង្វាន់ណូបែលគីមីវិទ្យាឆ្នាំ ២០១៨ បានធ្លាក់លើស្នាដៃនៃការផលិតអង់ស៊ីម និងអង់ទីករ
សម្រាប់រង្វាន់ណូបែលគីមីវិទ្យាឆ្នាំ ២០១៨ គណៈកម្មការណូបែលនៅក្នុងប្រទេសស៊ុយអែតបានសម្រេចប្រគល់ទៅឲ្យអ្នកស្រាវជ្រាវចំនួន ៣នាក់ ក្នុងនោះមានជនជាតិអាមេរិក ២នាក់ គឺលោកស្រី Frances H. Arnold លោក George P. Smith និងជនជាតិអង់គ្លេសម្នាក់ គឺលោក Gregory P. Winter។ ស្នាដែនៃការស្រាវជ្រាវរបស់អ្នកទាំង ៣ បានផ្តោតលើផលិតកម្មអង់ស៊ីម និងអង់ទីករ។
ចុះផ្សាយនៅថ្ងៃ៖
ស្តាប់ - ០១:៣៨
ក៏ដូចជារង្វាន់ណូបែលរូបវិទ្យាដែរ រង្វាន់ណូបែលគីមីវិទ្យាសម្រាប់ឆ្នាំ ២០១៨ ត្រូវបានចែកគ្នារវាងអ្នកស្រាវជ្រាវចំនួន ៣នាក់។ តែជ័យលាភីរង្វាន់ណូបែលគីមីវិទ្យាទាំង ៣រូបបានយកទ្រឹស្តីនៃការវិវត្តរបស់លោក Charles Darwin ធ្វើជាមូលដ្ឋានសម្រាប់ការងារស្រាវជ្រាវរបស់ខ្លួន។ ការងារស្រាវជ្រាវនោះ គឺការកែប្រែលក្ខណៈសម្បត្តិរបស់ប្រូតេអ៊ីនសម្រាប់បម្រើនៅក្នុងវិស័យព្យាបាល ឬនៅក្នុងវិស័យឧស្សាហកម្ម។ តាមរយៈការងារស្រាវជ្រាវមួយនេះបានអនុញ្ញាតឲ្យមានការផលិតចេញនូវវត្ថុធាតុដើមថ្មីៗ ឬជីវឥន្ធនៈស្អាត។
ស្នាដៃស្រាវជ្រាវរបស់លោកស្រី Frances H. Arnold ជនជាតិអាមេរិកដែលមានអាយុ ៦២ឆ្នាំ គឺការបង្កើតបានអង់ស៊ីមដែលជាសារធាតុជួយបង្កើនល្បឿនប្រតិកម្មគីមី ហើយសារធាតុគីមីទាំងនេះជាប្រភពដើមនៃការបង្កើតឱសថថ្មី និងប្រេងឥន្ធនៈបៃតងដែលមានការបំពុលតិចតួច។ ចំណែកស្នាដៃរបស់លោក George P. Smith ជនជាតិអាមេរិក និងលោក Gregory P. Winter ជនជាតិអង់គ្លេសដែលមានអាយុ ៦៧ឆ្នាំដូចគ្នា គឺការបង្កើតមេរោគម្យ៉ាងដែលឆ្លងទៅបាក់តេរី និងញុះញង់បាក់តេរីទាំងនេះឲ្យចាប់កំណើតដោយខ្លួនឯងកាន់តែច្រើន។
គោលដៅ គឺបង្កើតពូជមេរោគដែលអាចវាយប្រហារកំចាត់មេរោគខ្លាំងៗនៃជម្ងឺមួយចំនួន និងការព្យាបាលលើជម្ងឺសួត ឬទាក់ទងនឹងការរលាកខ្លាំង។ គេអាចនិយាយឲ្យងាយយល់ថា គឺការបង្កើតពូជមេរោគដើម្បីសម្លាប់មេរោគ ពិសេសមេរោគខ្លាំងៗមួយចំនួនដែលធុននឹងថ្នាំផ្សះ ឬនិយាយឲ្យខ្លីថា មេរោគដែលការប្រើថ្នាំផ្សះលែងមានប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ