ផ្សែងពុលពីភ្លើងឆេះព្រៃ បង្ខំឱ្យសាលារៀនជាច្រើនបិទទ្វារ នៅឥណ្ឌូណេស៊ីនិងម៉ាឡេស៊ី
នៅម៉ាឡេស៊ី, រដ្ឋាភិបាល បានសម្រេចបិទទ្វារសាលារៀន ជាង៤០០សាលា ដោយសារតែក្តីបារម្ភពីផ្សែងពុល កើតចេញពីការឆេះព្រៃ។ ចំណែកនៅប្រទេសជិតខាងគ្នាវិញ ឥណ្ឌូណេស៊ី ក៏បានបិទទ្វារសាលារៀនបឋមសិក្សានិងមធ្យមសិក្សាអស់ជាច្រើនដែរ នៅលើកោះស៊ូម៉ាត្រា។
ចុះផ្សាយនៅថ្ងៃ៖
ស្តាប់ - ០២:១០
ដើមសប្តាហ៍នេះ នៅម៉ាឡេស៊ី កូនសិស្ស ជា១សែន៥ម៉ឺននាក់ មិនបានចូលសាលារៀនទេ។ ចំនួននេះផ្តល់ដោយក្រសួងអប់រំម៉ាឡេស៊ី ដែលក្នុងនោះ គឺមានសាលាចំនួនជាង៤០០សាលាត្រូវបិទទ្វារ ព្រោះតែត្រូវរងការរំខានដោយសារផ្សែងពុល។ ការប៉ះពាល់ ដែលដចេញពីភ្លើងឆេះព្រៃនេះ បានជះឥទ្ធិពលទៅលើស្រុក ចំនួន ៩ នៅលើកោះ Bornéo។
នៅឥណ្ឌូណេស៊ីវិញ ទារកដ្ឋានជាច្រើនកន្លែង ត្រូវបិទទ្វារដែរ ហើយ សាលាមត្តេយ្យសិក្សា បឋមនិងធម្យមសិក្សាជាច្រើន នៅកោះស៊ូម៉ាត្រា ក៏ត្រូវផ្អាកការសិក្សាសិន។ ប៉ុន្តែគេនៅមិនទាន់មានចំនួនពិតប្រាកដនៅឡើយ ថាមានចំនួនកូនសិស្សប៉ុន្មានរយនាក់ ដែលខកខានការរៀនសូត្រ។
នៅរដ្ឋធានីកូឡាឡាំពួរ របស់ម៉ាឡេស៊ី ដែលមានផ្តុំដោយអគារខ្ពស់ៗច្រូងច្រាង បែរជាហ៊ុំព័ទ្ធដោយពពកនិងផ្សែងមានជាតិពុល ដែលអាចបង្កផលប៉ះពាល់ដល់សុខភាព និងលំបាកដងដង្ហើម។ ពលរដ្ឋម៉ាឡេស៊ីនៅក្នុងរដ្ឋធានី បានត្អូញត្អែរពីក្លិនម្រិញផ្សែងភ្លើង និងផ្សែងពុល។ បើតាមទីភ្នាក់ងារព័ត៌មានបារាំង AFP ដែលបានសម្ភាសភ្ញៀវទេសចរនៅទីនោះ គេថា ពួកគេមានក្តីព្រួយបារម្ភ ព្រោះផ្សែងធ្វើឱ្យពួកគេផ្សាភ្នែក និងលំបាកស្រូបខ្យល់ដកដង្ហើម។ ពលរដ្ឋខ្លះទៀត ថាខ្លួនបានក្អកដោយសារផ្សែង និងពឹងតែពីបារម្ភពីសុខភាពរបស់ខ្លួន។ នេះបើតាមអ្នកកាសែតបារាំង AFP ដែលទៅយកការណ៍ផ្ទាល់។
ផ្សែងពីភ្លើងឆេះព្រៃ គឺបានរាលដល់ដល់ប្រទេសមួយចំនួននៅអាស៊ីអាគ្នេហ៍។ តួយ៉ាង នៅសង្ហរី ក៏បានទទួលការចុះផ្សែងអ័ព្ទ។ នៅថៃ, អាជ្ញាធរដាស់តឿនពលរដ្ឋនៅភាគខាងត្បូងប្រទេសថៃ ឱ្យពាក់ម៉ាស់ការពារ។
នៅឥណ្ឌូនេស៊ី រដ្ឋាភិបាលបានដាក់ទាហាននិងមនុស្សរាប់ពាន់នាក់បន្ថែមទៀត ក្នុងរយៈពេលប៉ុន្មានខែចុងក្រោយនេះ ដើម្បីចុះជួយពន្លត់ភ្លើងឆេះព្រៃ ដែលរាល់ដាលដល់តំបន់ជាប់ប្រទេសជិតខាងរបស់ខ្លួន។ សង្គមស៊ីវិលខាងបរិស្ថាននៅឥណ្ឌូនេស៊ី ក៏បានថ្កោលទោសផងដែរចំពោះពួកអ្នកដែលដុតព្រៃដោយចេតនា ដើម្បីលេងសើច ឬដើម្បីធ្វើកសិកម្ម ថាឱ្យគួរតែបញ្ឈប់សកម្មភាពរបស់ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ