រោងចក្រកាត់ដេរមួយចំនួន បន្តបិទទ្វារនៅដើមឆ្នាំនេះ ក្រោយកង្វះការបញ្ជាទិញ
រោងចក្រកាត់ដេរមួយចំនួនបានបន្តបិទទ្វារអាជីវកម្ម ខណៈរោងចក្រខ្លះព្យូរការងារដល់កម្មករនិយោជិករាប់ពាន់នាក់។ បើតាមសហជីព ការដែលរោងចក្រខ្លះឈានដល់ការបិទទ្វារ និងព្យូរការងារដល់កម្មករ គឺដោយសារតែគ្មានតម្រូវការ និងគ្មានការបញ្ជាទិញ។ យ៉ាងណាក៏ដោយ ខាងសហជីពក៏ព្រួយបារម្ភថា នាពេលខាងមុខទៀត រោងចក្រជាច្រើននឹងបន្តបិទទ្វារ ឬព្យូរការងារដល់កម្មករជាក់ជាមិនខាន។
ចុះផ្សាយនៅថ្ងៃ៖
ស្តាប់ - ០២:១៤
អ្នកស្រី ទូច សើ ប្រធានសហព័ន្ធសហជីពសេរីកម្មករនៃព្រះរាជាណាចក្រកម្ពុជាបានឱ្យដឹងថា គិតត្រឹមដើមឆ្នាំ២០២៣នេះ មានរោងចក្រ១កន្លែងបានបិទទ្វារ និងមួយកន្លែងទៀតសម្រេចព្យូរការងារកម្មកររយៈពេល២ខែ។ ការបន្តបិទទ្វារ និងព្យូរការងារបែបនេះ ត្រូវបានអ្នកស្រីបញ្ជាក់ថា ខាងភាគីនយោជកជូនដំណឹងមកថា ផលិតផលដែលពួកគេផលិតបានខ្លះ គ្មានការបញ្ជាទិញពីខាងក្រៅ ដែលធ្វើឱ្យផលិតកម្មទាំងមូលត្រូវកកស្ទះ និងខាតបង់។
បើតាមប្រធានសហព័ន្ធសហជីពសេរីកម្មកររូបនេះ បញ្ហាកង្វះអ្នកបញ្ជាទិញអាចបណ្តាលមកពី ការដកប្រព័ន្ធអនុគ្រោះពន្ធEBA២០ភាគរយរបស់សហភាពអឺរ៉ុប និងGSPរបស់សហរដ្ឋអាមេរិកដែលធ្វើឱ្យការនាំចេញផលិតផលកាត់ដេររបស់កម្ពុជាត្រូវជួបរបាំងពន្ធខ្លះ។
ក្រោយរោងចក្រជាបន្តបន្ទាប់បិទទ្វារយ៉ាងដូច្នេះ អ្នកស្រី ទូច សើ ព្រួយបារម្ភទៅថ្ងៃខាងមុខ រោងចក្រកាត់ដេរជាច្រើនផ្សេងទៀត នឹងបង្ខំចិត្តបិទទ្វាររបស់ខ្លួនបន្ថែម ហើយចំណែកកម្មកររោងចក្រវិញ ពួកគេនឹងជួបប្រទះនូវបញ្ហាជីវភាពគ្រួសារកាន់តែធ្ងន់ធ្ងរ ដោយកម្មករខ្លះអាចទទួលរងបន្ទុកលើបំណុលធនាគារផង។
តែយ៉ាងណា ប្រធានសហជីពខាងលើចាត់ទុកថា ប្រសិនបើម្ចាស់រោងចក្រប្រកាសបិទទ្វារ ប៉ុន្តែជាលះដើម្បីអាចលួចលាក់បើកទីតាំងរោងចក្រថ្មីដែលមានទំហំផលិតកម្មតិចជាងមុន នោះចង់មិនចង់វាប្រាកដជាជាប់ទាក់ទិនទៅនឹងការរំលោភលើសិទ្ធិការងារ ក៏ដូចជារំលោភលើសិទ្ធិរបស់កម្មករ។
នៅថ្ងៃទី២៤ ខែមករានេះ រោងចក្រកាត់ដេរសំលៀកបំពាក់ ឈ្មោះ លឹម ឡាញ អ៊ិនធើណេសិនណល (ខេមបូឌា) ហ្គាមេន « Lim Line International (Cambodia) Garment Co.,Ltd. » ស្ថិតក្នុងភូមិសាស្ត្ររាជធានីភ្នំពេញ ដែលមានកម្មករ កម្មការិនីបម្រើការងារ ចំនួន៨៨៥នាក់ បានបិទទ្វារអាជីវកម្មរបស់ខ្លួន ដោយសម្អាងហេតុផលថា គ្មានអ្នកបញ្ជាទិញ។ ចំណែក កាលពីថ្ងៃទី២០ ខែមករា រោងចក្រកាត់ដេរមួយកន្លែងទៀតស្ថិតនៅខេត្តកំពង់ឆ្នាំ ឈ្មោះ អ៊ឹម និងវ៉េ កាត់ដេរអន្តរជាតិ អិលធីឌី (M & V International Manufacturing Ltd.) បានសម្រេចព្យួរកិច្ចសន្យាការងារកម្មករ និយោជិត ចំនួន ១,៩៧៤នាក់រយៈពេល៥០ថ្ងៃ ក្រោមកម្មវត្ថុដូចគ្នា។
សូមជម្រាបថា បើតាមរបាយការណ៍ពីសហព័ន្ធសហជីពសេរីកម្មករនៃព្រះរាជាណាចក្រកម្ពុជា គិតមកដើមឆ្នាំ២០២៣នេះ មានរោងចក្រចំនួន១០បានបិទទ្វារ និងរោងចក្រចំនួន២០ បានព្យួរការងារកម្មករ ខណៈរោងចក្រប្រមាណ៦០ផ្សេងទៀតបានកាត់បន្ថយបុគ្គលិក ខណៈរោងចក្រប្រមាណ៧០ ទៅ៨០ភាគរយគ្មានវត្ថុដើមសម្រាប់កាត់ដេរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ