លោក ហ៊ុន ម៉ាណែត ផ្តើមវេទិកាសាធារណៈជាលើកដំបូងក្រោយក្លាយជានាយករដ្ឋមន្ត្រី
បន្ទាប់ពីក្លាយជានាយករដ្ឋមន្ត្រីកាលពីថ្ងៃទី២២ ខែសីហា កន្លងទៅ លោក ហ៊ុន ម៉ាណែត នៅថ្ងៃទី២៩ ខែសីហានេះ បានចុះជួបកម្មករនៃវិស័យឧស្សាហកម្មវាយនភណ្ឌ កាត់ដេរជិត២ម៉ឺននាក់ នៅតំបន់ព្រៃស្ពឺ ក្នុងខ័ណ្ឌពោធិ៍សែនជ័យ រាជធានីភ្នំពេញ។ ជំនួបនេះ ត្រូវបានចាត់ទុកថាជាវេទិកាសាធារណៈលើកដំបូងជាមួយពលរដ្ឋបន្ទាប់ពីវេទិកាដូចគ្នានេះ ត្រូវបានធ្វើឡើងកាលពីមុនការបោះឆ្នោតជ្រើសតាំងតំណាងរាស្ត្រនីតិកាលទី៧។
ចុះផ្សាយនៅថ្ងៃ៖
ស្តាប់ - ០២:២៥
លាយឡំនឹងសិល្បៈនៃការនិយាយកំប្លែងលេងបែបឪពុករបស់លោក លោក ហ៊ុន ម៉ាណែត បានថ្លែងឲ្យដឹងថាជំនួបជាមួយកម្មករនៃវិស័យកាត់ដេរនៅថ្ងៃអង្គារនេះនៅតំបន់ព្រៃស្ពឺ ក្នុងខ័ណ្ឌពោធិ៍សែនជ័យគឺជាវេទិកាសាធារណៈដំបូងបន្ទាប់ពីលោកបានក្លាយជានាយករដ្ឋមន្ត្រី ដែលជំនួបនៅទីនេះ លោកពិព័ណ៌នាថាមានភាពកក់ក្តៅ និងមានស្នាមក្រែមជាប់ថ្ពាល់ច្រើនជាងគេកាលពីមុនការបោះឆ្នោតសកលឆ្នាំ២០២៣។
មិនភ្លេចរំលឹកពីការសួរសុខទុក្ខ និងគុណសម្បត្តិរបស់នាយករដ្ឋមន្ត្រីចាស់ លោកនាយករដ្ឋមន្ត្រីថ្មីបញ្ជាក់ឲ្យដឹងថា ជំនួបជាមួយកម្មករនៅថ្ងៃនេះ មានគោលបំណងពីរ ទី១គឺការអរគុណដល់កម្មករដែលបោះឆ្នោតឲ្យបក្សប្រជាជននិងគោលបំណងមួយទៀត គឺបញ្ជាក់ពីការប្តេជ្ញាចិត្តរបស់រដ្ឋាភិបាលថ្មីក្នុងការបន្តការកសាង និងថែរក្សាសមិទ្ធផលដែលគណបក្សកាន់អំណាចសម្រេចបានជាង៤០ឆ្នាំ ជូនប្រជាពលរដ្ឋ។
នៅក្នុងសុន្ទរកថារយៈពេលជាង២ម៉ោង ដែលអាចជាស្តង់ដារនៃការថ្លែងរបស់លោក ហ៊ុន សែន អតីតនាយករដ្ឋមន្ត្រី ដែលជាឳពុកលោកដែរ លោក ហ៊ុន ម៉ាណែត បានលើកឡើងនូវចំណុចសំខាន់ៗជាច្រើនទៅកាន់កម្មករជុំវិញគោលនយោបាយរបស់រដ្ឋាភិបាលថ្មី ជាពិសេសវិស័យសេដ្ឋកិច្ច និងវិស័យការងារ និងការយកចិត្តទុកដាក់ដល់កម្មករ។ លោកអះអាងថាគោលនយោបាយរបស់គណបក្សប្រជាជនកម្ពុជាជាគោលនយោបាយត្រឹមត្រូវ ដែលអាចវាស់ស្ទង់បានតាមរយៈនៃការបោះឆ្នោត និងលទ្ធផលឆ្នោត ដែលគណបក្សនេះទទួលបានការគាំទ្រយ៉ាងពេញទំហឹង។
ថ្លែងដោយផ្ទាល់មាត់យ៉ាងស្វាហាប់ រំលេចនូវទឹកមុខញញឹមញញែម ពេលខ្លះងាកឆ្វេងងាកស្តាំ មិនអានតាមក្រដាស អមពីក្រោយខ្នងដោយឧបនាយករដ្ឋមន្ត្រី រដ្ឋមន្ត្រី និងមន្ត្រីជាន់ខ្ពស់ផ្សេងៗទៀត លោក ហ៊ុន ម៉ាណែត បានលើកឡើងពីសុខដុមនីយកម្មរបស់រោងចក្រកាត់ដេដែលភាគីនិយោជក និងនិយោជិតត្រូវមានទំនាក់ទំនងវិជ្ជាជីវៈយ៉ាងល្អ។ មិនខុសពីលោក ហ៊ុន សែន នោះទេ លោក ហ៊ុន ម៉ាណែត ដែលការបញ្ចេញសូរស័ព្ទបែបពលរដ្ឋខ្មែរធ្លាប់និយាយភាសាបរទេស បានឆ្លៀតធ្វើការឆ្លើយតប ស៊កសៀត ប្រតិកម្មទៅនឹងការរិះគន់ ពីអ្នកនយោបាយប្រឆាំង និងអ្នកវិភាគជាអន្លើផងដែរ នៅចន្លោះៗ សុន្ទរកថាដ៏វែងគួរសម។
ទោះយ៉ាងណា ភាពដូចគ្នាផ្សេងទៀតរវាងលោក ហ៊ុន ម៉ាណែត និងឳពុករបស់លោកនៅក្នុងការថ្លែងជាសាធារណៈត្រូវគេកត់សម្គាល់ថាមានចំណុចខ្លះជាន់គ្នាច្រើនដងដែរ នៅក្នុងសុន្ទរកថាតែមួយ ដ្បិតជាការថ្លែងដោយផ្ទាល់មាត់ ខុសពីការអានអក្សរលើក្រដាស ដែលមន្ត្រីបានរៀបចំឲ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ