លោកហ៊ុន ម៉ាណែតបញ្ជាឱ្យទប់ស្កាត់សកម្មភាពរាំតាមដងផ្លូវតាមចង្វាក់ស៊ីផ្លេរថយន្តធំ
នៅថ្ងៃទី១៨មីនា ឆ្នាំ២០២៤ លោក ហ៊ុន ម៉ាណែត នាយករដ្ឋមន្ត្រីកម្ពុជាបានបញ្ជាឱ្យកម្លាំងសមត្ថកិច្ចរាជធានី-ខេត្តទាំងអស់ត្រូវទប់ស្កាត់សកម្មភាពរាំតាមចង្វាក់ស៊ីផ្លេរថយន្តធំៗតាមដងផ្លូវ។ បទបញ្ជារបស់លោក ហ៊ុន ម៉ាណែត ធ្វើឡើង ខណៈមានយុវជននិងកុមារកម្ពុជាមួយចំនួនកំពុងវីវក់នឹងការរាំកំសាន្តរបៀបនេះ ដោយថែមទាំងថតយកទៅបង្ហោះក្នុងបណ្តាញទំនាក់ទំនងសង្គមនានាទៀតផង។
ចុះផ្សាយនៅថ្ងៃ៖
ស្តាប់ - ០១:៥៩
តាមបណ្តាញទំនាក់ទំនងសង្គម ពិសេសទិកតក់ និងហ្វេសប៊ុកនាពេលថ្មីៗនេះ មានយុវជន និងកុមារតូចៗមួយចំនួនបានរត់ចូលដងផ្លូវដែលរថយន្តធំៗកំពុងបរកាត់ដើម្បីរាំទៅតាមចង្វាក់ស៊ីផ្លេ។ តាមរយៈទំព័រហ្វេសប៊ុករបស់ខ្លួននៅថ្ងៃទី១៨ មីនា ឆ្នាំ២០២៤ លោក ហ៊ុន ម៉ាណែត នាយករដ្ឋមន្ត្រីកម្ពុជាមើលឃើញថា សកម្មភាពរាំកំសាន្តរបៀបនេះបានប៉ះពាល់ដល់សណ្តាប់ធ្នាប់តាមដងផ្លូវ បង្កហានិភ័យសម្រាប់ការធ្វើដំណើរ និងពិសេសអាចបណ្តាលឱ្យគ្រោះថ្នាក់ដល់យុវជននិងកុមារដែលជាអ្នកប្រព្រឹត្តិតែម្តង។
គួរជម្រាបជូនថា កន្លងមកសមត្ថកិច្ចតាមបណ្តាខេត្តមួយចំនួនរួមមាន ខេត្តកំពង់ស្ពឺ ខេត្តកំពត និងខេត្តបាត់ដំបងជាដើម បានចាត់វិធានការឱ្យអ្នកបើកបររថយន្តធំៗដោះស៊ីផ្លេដែលខុសលក្ខណៈបច្ចេកទេសចេញ និងបានណែនាំឱ្យយុវជននិងកុមារទាំងនោះបញ្ឈប់សកម្មភាពនេះដែរ។ ប៉ុន្តែលោក ហ៊ុន ម៉ាណែតចាត់ទុកជាវិធានការមិនគ្រប់គ្រាន់ និងគ្មានប្រសិទ្ធភាព។ នៅក្នុងន័យនេះ នាយករដ្ឋមន្រ្តីបានចាត់ឱ្យក្រសួង សាធារណៈការ និងដឹកជញ្ជូន អគ្គស្នងការដ្ឋាននគរបាលជាតិនៅទូទាំងប្រទេសត្រូវសហការគ្នាចុះត្រួតពិនិត្យលក្ខណៈបច្ចេកទេសស៊ីផ្លេរថយន្តទាំងអស់ ដើម្បីបញ្ឈប់សកម្មភាពអនាធិបតេយ្យតាមដងផ្លូវនេះ។
លោក សន ជ័យ អ្នកវិភាគបញ្ហាសង្គម មើលឃើញថា សកម្មភាពរាំតាមដងផ្លូវតាមចង្វាក់ស៊ីផ្លេរថយន្តនេះ ជារូបភាពទាក់ទាញចំណាប់អារម្មណ៍មួយដែលធ្វើឱ្យសីលធម៌សង្គមខ្មែរអាប់ឱន។ តាមអ្នកវិភាគបញ្ហាសង្គមរូបនេះដដែល សកម្មភាពនេះក៏បង្ហាញឱ្យឃើញពីកម្សោយនៃការអនុវត្តច្បាប់ចរាចរណ៍ផ្លូវគោកដែលមានកំណត់ការប្រើប្រាស់ស៊ីផ្លេរថយន្តនៅកម្ពុជាផងដែរ។
ចំណែកអ្នកនាង ស្រួង ភាវី ដែលជាកីឡាការនីខ្មែរមានឥទ្ធិពលក្នុងបណ្តាញសង្គមមួយរូប បានលើកឡើងថា សកម្មភាពអនាធិបតេយ្យតាមដងផ្លូវបង្កដោយយុវជននិងកុមារនេះ ជាឥទ្ធិពលអវិជ្ជមាននៃបណ្តាញសង្គម។ សម្រាប់កម្ពុជា ការយកចិត្តទុកដាក់លើកុមារនិងយុវជនឱ្យយល់ដឹងពីផលវិបាកនៃឥទ្ធិពលអវិជ្ជមានរបស់បណ្តាញសង្គម ជារឿងគួរត្រូវយកចិត្តទុកដាក់បំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ