កូរ៉េខាងជើង៖គីម ជុងអ៊ុនប្រកាសប្រើអាវុធនុយក្លេអ៊ែរក្នុងករណីទទួលការគំរាមកំហែង និងប្រើសម្តីទន់ភ្លន់
នៅកូរ៉េខាងជើង សមាជរបស់គណបក្សពលករបានឈានចូលដល់ថ្ងៃទី៣ នាថ្ងៃអាទិត្យ ទី៨ ឧសភានេះ។ ថ្លែងនៅចំពោះមុខគណៈប្រតិភូជាច្រើនពាន់នាក់ក្នុងអង្គសមាជនាថ្ងៃសៅរ៍ ទី៧ ឧសភា មនុស្សខ្លាំងកូរ៉េខាងជើងលោកគីម ជុងអ៊ុលបានប្រកាសក្លែងៗ និងជាសាធារណៈថា កូរ៉េខាងជើងនឹងប្រើអាវុធនុយក្លេអ៊ែរនៅក្នុងករណីណាដែលអធិបតេយ្យកូរ៉េខាងជើងទទួលរងការគំរាមកំហែងពីអ្នកដទៃ។ ទន្ទឹមគ្នានេះ លោកគីម ជុនអ៊ុនក៏ហាក់បន្ទន់ឥរិយាបទដោយសន្យាគោរពកិច្ចព្រមព្រៀងមិនសាយភាយនុយក្លេអ៊ែរ និងចង់បង្កើនទំនាក់ទំនងជាមួយក្រុមប្រទេសដែលប្រឆាំងខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២១
អ្វីដែលលោកគីម ជុងអ៊ុនបានប្រកាសជារឿងដែលគ្រប់គ្នាបានរង់ចាំ ព្រោះអ្វីដែលមនុស្សខ្លាំងកូរ៉េខាងជើងបានប្រកាសនៅក្នុងសមាជគណបក្សពលករលើកទី១ គិតតាំងពីឆ្នាំ ១៩៨០ មិនមែនជាលើកទី១ និងក៏គ្មានខ្លឹមសារអ្វីថ្មីដែរ។ របបក្រុងព្យុងយ៉ាងធ្លាប់បានបញ្ជាក់ជាច្រើនដងថា ការដែលខ្លួនបាន និងកំពុងបន្តអភិវឌ្ឍន៍កម្មវិធីនុយក្លេរអ៊ែរមកដល់សព្វថ្ងៃ គឺដើម្បីការពារខ្លួន ពោលមិនមែនសម្រាប់គំរាមកំហែងអ្នកដទៃទេ។ លោកគីម ជុងអ៊ុនផ្ទាល់ខ្លួនបានបញ្ជាក់ជាថ្មីនៅថ្ងៃសៅរ៍ ទី៧ ឧសភាថា កូរ៉េខាងជើងនឹងប្រើអាវុធនុយក្លេអ៊ែរតែក្នុងករណីណាដែលសាធារណរដ្ឋប្រជាមានិតប្រជាធិបតេយ្យកូរ៉េទទួលការគំរាមកំហែងឈ្លានពានពីអ្នកដទៃ ពិសេសពីប្រទេសមហាអំណាចនុយក្លេអ៊ែរ។
អ្វីជាការកត់សម្គាល់នៅក្នុងសមាជជាប្រវត្តិសាស្រ្ត គឺការដែលរបបកុម្មុយនិស្តក្រុងព្យុងយ៉ាងបានតាំងខ្លួនជាមហាអំណាចនុយក្លេអ៊ែរ ហើយគីម ជុងអ៊ុនជាមេដឹកនាំកំពូលដែលគ្មានគូប្រៀប។ មួយវិញទៀត និងបើទោះបីជាកូរ៉េខាងជើងមិនបានអញ្ជើញប្រទេសណាមួយ សូម្បីចិនជាសម្ព័ន្ធមិត្តចាក់ទឹកមិនលេចឲ្យចូលរួមនៅក្នុងសមាជក៏ដោយ ក៏ព័ត៌មានស្តីពីសមាជត្រូវបានផ្សព្វផ្សាយជាសាកល ព្រោះកូរ៉េខាងជើងបានបើកទ្វារឲ្យអ្នកកាសែតបរទេសជាង ១០០នាក់ចូលយកព័ត៌មាន។
កំណត់សម្គាល់មួយទៀត ការថ្លែងរបស់លោកគីម ជុងអ៊ុនពេលនេះបានធ្វើឡើង ចំពេលដែលស្ថានការណ៍កំពុងតានតឹងខ្លាំងនៅក្នុងឧបទ្វីបកូរ៉េ ពិសេសបន្ទាប់ពីកូរ៉េខាងជើងបានធ្វើការសាកល្បងនុយក្លេអ៊ែរលើកទី៤ ក្នុងខែមករាកន្លងទៅ និងការបាញ់សាកល្បងគ្រាប់មីស៊ីលអន្តរទ្វីប។
សហគមន៍អន្តរជាតិស្ងប់ស្ងៀមព្រោះស្គាល់ច្បាស់ពីមាយាទរបស់កូរ៉េខាងជើង
រហូតមកដល់ពេលនេះ សហគមន៍អន្តរជាតិនៅមិនទាន់មានប្រតិកម្មអ្វីទេ និងប្រហែលជាគ្មានប្រទេសណាមួយយកចិត្តទុកដាក់ និងឲ្យតម្លៃខ្លាំងចំពោះការថ្លែងរបស់លោកគីម ជុងអ៊ុនដែរ។ មិនយកចិត្តទុកដាក់ និងមិនឲ្យតម្លៃខ្លាំង ព្រោះគេបានស្គាល់ធាតុពិតរបស់ថ្នាក់ដឹកនាំកូរ៉េខាងជើងតាំងពីជំនាន់លោកគីម អ៊ីលស៊ុងដែលជាជីតារបស់លោកគីម ជុងអ៊ុន និងជំនាន់លោកគីម ជុងអ៊ីលដែលជាឱពុករបស់លោកគីម ជុងអ៊ុន។ សម្រាប់របបកុម្មុយនិស្តក្រុងព្យុងយ៉ាង នុយក្លេអ៊ែរជារឿងស្លាប់រស់របស់ជាតិដែលខ្លួនត្រូវយកធ្វើជានុយដើម្បីដាក់គំនាបនៅក្នុងកិច្ចចរចាទាមទារអ្វីមួយ។ បើអត់នុយក្លេអ៊ែរ ជោគវាសនារបស់សាធារណរដ្ឋប្រជាមានិតប្រជាធិបតេយ្យកូរ៉េក៏មិនអាចរស់រានមានជីវិតមកដល់សព្វថ្ងៃដែរ។
ជាការពិត គេមិនអាចថ្លឹងថ្លែង វាស់វែងពីលទ្ធភាព សមត្ថភាព និងទម្ងន់នៃការគំរាមកំហែងរបស់កូរ៉េខាងជើងក្នុងបញ្ហានុយក្លេអ៊ែរ។ ម្យ៉ាងទៀត ក្រុមអ្នកឯកទេសក៏នៅបន្តមានមន្ទិលសង្ស័យពីសមត្ថភាព និងបច្ចេកវិទ្យានុយក្លេអ៊ែរដែលកូរ៉េខាងជើងមានពិតប្រាកដ។ តែយ៉ាងណាក៏ដោយ ក៏សហគមន៍អន្តរជាតិ ពិសេសអាមេរិកមិនបានមើលស្រាល និងធ្វេសប្រហែសចំពោះការគំរាមរបស់ក្រុងព្យុងយ៉ាងទេ។ ចូរកុំភ្លេចថា គឺនុយក្លេអ៊ែរនេះឯងដែលកូរ៉េខាងជើងកំពុងជាប់ទ័ណ្ឌកម្មសេដ្ឋកិច្ចអន្តរជាតិមកដល់សព្វថ្ងៃ និងដែលប្រទេសឯកោក្នុងលោកមួយនេះកំពុងត្រូវបានគេបន្តនិយាយសឹងតែរាល់ថ្ងៃ។
លោកគីម ជុងអ៊ុនបោះដៃទៅរកសហគមន៍អន្តរជាតិ?
ក្រៅពីការប្រកាសប្រើអាវុធនុយក្លេអ៊ែរក្នុងករណីទទួលការគំរាមកំហែងពីអ្នកដទៃ លោកគីម ជុងអ៊ុនហាក់បានបន្ទាន់ឥរិយាបទដោយសន្យាគោរពកិច្ចព្រមព្រៀងមិនសាយភាយនុយក្លេអ៊ែរ និងអំពាវនាវឲ្យមានកិច្ចសន្ទនាជាមួយក្រុមប្រទេសប្រឆាំងខ្លួន ពិសេសអាមេរិក។ តែគេពិបាកជឿ និងពិបាកទុកចិត្តចំពោះពាក្យសម្តីនេះ។ ជាមួយនឹងប្រទេសណាមិនដឹងទេ តែបើជាមួយកូរ៉េខាងជើង ទ្រឹស្តីមានច្រើនជាងការអនុវត្តន៍។ លោកគីម ជុងអ៊ុនបានថ្លែងនៅក្នុងសមាជនាថ្ងៃសៅរ៍ ទី៧ ឧសភាថា ក្នុងនាមជាមហាអំណាចនុយក្លេអ៊ែរ កូរ៉េខាងជើងសន្យាដោយភាពស្មោះត្រង់ក្នុងការគោរពកិច្ចព្រមព្រៀងមិនសាយភាយនុយក្លេអ៊ែរ។ តែគេមិនត្រូវភ្លេចនិយាយទេថា ក្រុងព្យុងយ៉ាងបានសម្រេចចិត្តដកខ្លួនឯងចេញពីកិច្ចព្រមព្រៀងមិនសាយភាយនុយក្លេអ៊ែរតាំងពីឆ្នាំ ២០០៣ មកម្ល៉េះ។
ម្យ៉ាងទៀត មនុស្សខ្លាំងគីម ជុនអ៊ុនថែមទាំងបានបញ្ជាក់ក្លែងៗថា កូរ៉េខាងជើងនឹងមិនបោះបង់ចោលកម្លាំងនុយក្លេអ៊ែរទេ ព្រោះវាជាកម្លាំងតែមួយគត់ដែលបានធ្វើឲ្យកូរ៉េខាងជើងរួចផុតពីការវាយប្រហាររបស់អាមេរិក។ អ៊ីចឹងសួរថា តើអ្វីដែលលោកគីម ជុងអ៊ុនបានថ្លែងមានការពិតនៅត្រង់ណា?។ ផ្ទុយទៅវិញ បើការថ្លែងរបស់លោកគីម ជុងអ៊ុនបង្កប់ដោយឆន្ទៈល្អមែន វារឿងមួយគួរឲ្យភ្ញាក់ផ្អើល និងដែលគេអាចសន្និដ្ឋានបានថា ជាសញ្ញាបន្ទន់ឥរិយាបទមួយរបស់កូរ៉េខាងជើង។ សញ្ញាល្អមួយទៀត គឺការដែលលោកគីម ជុងអ៊ុនមានបំណងចង់ត្រឡប់ទៅមានទំនាក់ទំនងល្អជាមួយក្រុមប្រទេសដែលប្រឆាំងខ្លួន។
លោកគីម ជុងអ៊ុនមិនបានទម្លាយឈ្មោះប្រទេសណាទេ តែគេអាចដឹងភ្លាមថា គឺចង់សំដៅលើអាមេរិក។ ចូរកុំភ្លេចថា កូរ៉េខាងជើងតែងតែបានធ្វើអ្វីគ្រប់យ៉ាងដើម្បីសុំចរចាផ្ទាល់ជាមួយអាមេរិក។ អាមេរិកដែលបន្តបដិសេធមកដល់សព្វថ្ងៃនៅមិនទាន់មានប្រតិកម្មតបអ្វីទេ។ តែគេអាចនិយាយបានថា បើមេដឹកនាំកំពូលកូរ៉េខាងជើងដ៏វ័យក្មេងពិតជាមានឆន្ទៈល្អមែន នោះសហគមន៍អន្តរជាតិក៏មិនត្រូវទុកឲ្យឱកាសល្អកន្លងផុតដែរ ពោលគួរតែបិទបញ្ចប់រឿងនុយក្លេអ៊ែរកូរ៉េខាងជើងដ៏ចម្រូងចម្រាសដូចដែលសហគមន៍អន្តរជាតិធ្លាប់បានធ្វើជាមួយអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ