ក្រុងគៀវ និងម៉ូស្គូអាចដោះលែងទៅវិញទៅមកអ្នកទោសម្ខាងៗ
នារសៀលថ្ងៃអង្គារម្សិលមិញ លោកប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ បាន បង្ហើបឲ្យដឹង ថា មានការព្រមព្រៀង ជាមួយសមភាគីរុស្ស៊ីរបស់គាត់ លោក វ៉្លាឌីមៀរ ពូទីន អំពីនីតិវិធីដែលអនុញ្ញាត ឲ្យដោះលែងជាយថាហេតុ រូបស្ត្រីពីឡុតអ៊ុយក្រែន ឈ្មោះ ណាឌីយ៉ា សៅឆេនកូ ក្លាយជាវីរស្ត្រីអ៊ុយក្រែនទៅហើយ។ គាត់ ត្រូវបានតុលាការរុស្ស៊ី កាត់ទោស ឲ្យជាប់ សម្រាប់អំឡុងពេល ២២ឆ្នាំ ក្នុង មជ្ឈមណ្ឌលអប់រំកែខ្លួននៅរុស្ស៊ី តាមបទពាក់ព័ន្ធនឹងឃាតកម្ម អ្នកកាសែតរុស្ស៊ី ពីរនាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
បន្ទាប់ពីបានភ្ជាប់ខ្សែទូរស័ព្ទសន្ទនាជាមួយ លោកប្រមុខរដ្ឋរុស្ស៊ី វ៉្លាឌីមៀរ ពូទីន ដោយ ថ្លែង ម្សិលមិញ ក្នុងសន្និសីទកាសែតនៅក្រុងគៀវ លោកប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ បានប្រកាសដូចតទៅ៖តាមខ្ញុំស្មាន យើងចេះសម្រេចបានការព្រមព្រៀងគ្នា លើ នីតិវិធីជាក់លាក់ ឆ្ពោះទៅ ដោះលែងឲ្យមានសេរីភាព ជនរួមឈាមណាឌីយ៉ា របស់យើង ដែល កំពុងធ្វើ កូដកម្មបង្អត់អាហារខ្លួនឯង តាំងពីដើមខែមេសាមក ហើយដែលអាការៈសុខភាពគាត់ ស្ថិតក្នុងគ្រោះថ្នាក់។ ម៉្លោះហើយ បានជាខ្ញុំត្រៀមបញ្ជូនយន្តហោះប្រធានាធិបតី ជិះដោយពួក អ្នកតំណាងរបស់ខ្ញុំ ទៅដឹកគាត់ត្រឡប់មកអ៊ុយក្រែនវិញឲ្យបានយ៉ាងឆាប់បំផុត។ ក្រោយពីថ្លែង យ៉ាងនេះ លោក ប៉ូរ៉ូឆេនកូ បានអញ្ជើញទៅជួប ម្តាយនិងប្អូនស្រី របស់ ស្ត្រីពីឡុត ណាឌីយ៉ា ។
ហើយដោយមិនលម្អិតទេ មេដឹកនាំអ៊ុយក្រែននេះបន្ថែមថា ការដែលតុលាការក្រុងគៀវ ថ្ងៃចន្ទ ទី១៨មេសា បានកាត់ទោសទាហានរុស្ស៊ីពីរនាក់ ឲ្យជាប់ពន្ធនាគារម្នាក់ៗ ១៤ ឆ្នាំ តាមបទ បាន ច្បាំងនៅខាងពួកឧទ្ទាមផ្តាច់ទឹកដីរុស្ស៊ីនិយមនៅតំបន់បះបោរប៉ែកខាងកើតអ៊ុយក្រែន គឺបើកជាទស្សនវិស័យជាក់លាក់ សម្រាប់អនុវត្ត យន្តការខាងប្តូរ ជាតិរុស្ស៊ីពីរនាក់នេះទល់នឹងស្ត្រីអ៊ុយក្រែន សៅឆេនកូ។
ខុទ្ទកាល័យប្រធានាធិបតីរុស្ស៊ី និងអ៊ុយក្រែន បានប្រកាសល្ងាចថ្ងៃចន្ទថា លោក ពូទីន និង លោក ប៉ូរ៉ូឆេនកូបានពិភាក្សា អំពីវាសនា ស្ត្រី សៅឆេនកូ និង ទាហានរុស្ស៊ីពីរនាក់នោះ។
តបនឹងសំណួរ ជុំវិញកិច្ចព្រមព្រៀងដែលលើកឡើង ដោយលោក ប៉ូរ៉ូឆេនកូ អ្នកនាំពាក្យវិមាន ក្រេមឡាំង លោក ឌ្មីទ្រី ពេស្កូវ ប្រកែកពុំព្រមធ្វើ អត្ថាធិប្បាយអ្វីណាទេ ដោយគ្រាន់តែនិយាយ សារឡើងវិញថា ប្រមុខរដ្ឋទាំងពីរ បានពិភាក្សាគ្នាអំពីវាសនាស្ត្រីពីឡុត។ ពីចំណែកខ្លួន លោកប្រធានាធិបតីអ៊ុយក្រែន ក្រោយពីបានសន្ទនាតាមទូរស័ព្ទ ជាមួយលោក ពូទីន បានសំដែងសេចក្តីសង្ឃឹមថា សំណុំរឿងដើម្បីដោះលែង ពលរដ្ឋអ៊ុយក្រែនផ្សេងទៀត ដែលឃុំឃាំងដោយម៉ូស្គូ មុខជានឹង វិវឌ្ឍបានចម្រើនទៅមុខពុំខាន។
ក្រុងគៀវប្រមាណថា មានពលរដ្ឋអ៊ុយក្រែនម្តុំ ១៣០នាក់ ត្រូវបានឃាត់ខ្លួនដោយខុសច្បាប់ នៅរុស្ស៊ី នៅទៀបកោះគ្រីមេរបស់អ៊ុយក្រែន ហើយភ្ជាប់ជាដែនដីឧបសម្ព័ន្ធ របស់រុស្ស៊ី តាំងពីខែ មីនា ឆ្នាំ២០១៤មក និងនៅតំបន់បះបោររុស្ស៊ីនិយម ខាងកើតអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ