Unicef៖កុមារជិត ២ ៥០០ ០០០នាក់នៅក្នុងប្រទេសយេម៉ែនកំពុងរងការគំរាមកំហែងដោយគ្រោះអត់ឃ្លាន
ប្រទេសយេម៉ែនកំពុងបន្តបំផ្លិចបំផ្លាញដោយសង្រ្គាមស៊ីវិលតាំងពី ៥ឆ្នាំ។ សេដ្ឋកិច្ចជាវិស័យមួយក្នុងចំណោមវិស័យផ្សេងទៀតដែលកំពុងរងគ្រោះខ្លាំងជាងគេ។ តែអ្វីដែលអង្គការ Unicef កំពុងបារម្ភ និងទាញសញ្ញាអាសន្ន គឺគ្រោះអត់ឃ្លានដែលកំពុងគំរាមកំហែងលើកូនក្មេងជាច្រើនលាននាក់។ តាម Unicef បើគ្មានជំនួយមនុស្សធម៌ជាបន្ទាន់ទេ ចំនួនកូនក្មេងដែលអាចជួបកង្វះអាហាររូបត្ថម្ភពីពេលនេះទៅដំណាច់ឆ្នាំ ២០២០ មានចំនួន ២ ៤០០ ០០០នាក់ ពោលមានការកើនឡើងចំនួន ២០%។ ចំណែកអត្រាស្លាប់នៅក្នុងចំណោមកូនក្មេងមានអាយុក្រោម ៥ឆ្នាំក៏មានការកើនឡើងដែរ។ លោកសេបាស្យៀង លីយ៉ុង អគ្គនាយក Unicef ក្នុងប្រទេសបារាំងបានបញ្ជាក់ថា អ្វីដែលត្រូវធ្វើនៅចំពោះមុខ និងជាបន្ទាន់សម្រាប់យេម៉ែន គឺការបញ្ចប់សង្រ្គាមស៊ីវិលដ៏សោកនាដកម្ម និងអន្តរាយដែលបានអូសបន្លាយជាច្រើនឆ្នាំ។ នៅក្នុងន័យនេះ លោកលីយ៉ុងបានអំពាវនាវឲ្យគ្រប់ភាគីជម្លោះចូលអង្គុយតុចរចាដើម្បីរកដំណោះស្រាយឲ្យបានឆាប់រហ័ស។
ចុះផ្សាយនៅថ្ងៃ៖
ស្តាប់ - ០១:៣៨
« សង្រ្គាមស៊ីវិលរយៈពេល ៥ឆ្នាំបានធ្វើឲ្យប្រទេសយេម៉ែនជួបសោកនាដកម្មយ៉ាងខ្លាំង ធ្វើឲ្យប្រជាពលរដ្ឋជួបការលំបាក ខ្វះខាតគ្រប់បែបយ៉ាង និងបានបំផ្លាញហេដ្ឋារចនាសម្ព័ន្ធសឹងតែទាំងស្រុង ទោះក្នុងវិស័យសុខាភិបាល ឬក្នុងវិស័យសេដ្ឋកិច្ច ហើយគឺវិស័យសេដ្ឋកិច្ចនេះតែម្តងដែលកំពុងបន្តធ្លាក់ធ្ងន់ធ្ងរកាន់តែខ្លាំងឡើងៗពីមួយថ្ងៃទៅមួយថ្ងៃ។
គួរបញ្ជាក់ថា ស្បៀងអាហារចំនួន ៩០% ដែលមាននៅយេម៉ែនសព្វថ្ងៃត្រូវបាននាំចូលពីក្រៅ។ វិស័យកសិកម្មដែលត្រូវបានបំផ្លិចបំផ្លាញសឹងទាំងស្រុងដោយសង្រ្គាមស៊ីវិលក៏បានជួបប្រទះនឹងការវាយលុកពីសត្វកណ្តូបទៀត។ ប្រឈមនឹងស្ថានភាពដែលប្រទេសកំពុងជួបប្រទះពេលនេះ យេម៉ែនពិតជាមិនអាចធ្វើការកំចាត់សត្វកណ្តូបដែលកំពុងបំផ្លាញផលិតកសិកម្មដ៏តិចតួចបានឡើយ។
អ្វីដែលត្រូវធ្វើនៅចំពោះមុខ និងជាបន្ទាន់សម្រាប់យេម៉ែន គឺការបញ្ចប់សង្រ្គាមស៊ីវិលដ៏សោកនាដកម្ម និងអន្តរាយដែលបានអូសបន្លាយជាច្រើនឆ្នាំ។ អ្វីដែលជាសំណើ និងការចង់ឃើញរបស់អង្គការ Unicef គឺសុំឲ្យគ្រប់ភាគីជម្លោះទាំងអស់ចូលអង្គុយតុចរចា។ ពិតណាស់ក្នុងរយៈពេលប៉ុន្មានចុងក្រោយនេះ មានការព្យាយាមស្វែងរកការសម្របសម្រួលរវាងភាគីជម្លោះ តែនៅមិនទាន់ទទួលបានជោគជ័យនៅឡើយ។
ដូច្នេះគេត្រូវរកឲ្យបានឆាប់រហ័សបំផុតនូវដំណោះស្រាយមួយ ព្រោះស្ថានការណ៍កំពុងធ្លាក់ដុនដាបលឿនខ្លាំងណាស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ