អេហ្ស៊ីបធ្វើជាអន្តរការីនៅក្នុងការដោះដូរអ្នកទោសរវាងអ៊ីស្រាអែល និងចលនាប៉ាឡេស្ទីនហាម៉ាស់
នៅថ្ងៃសៅរ៍ ទី១២ កញ្ញា ប្រភពមួយមកពីចលនាប៉ាឡេស្ទីនហាម៉ាស់បានបញ្ជាក់ប្រាប់ AFP ថា ប្រទេសអេហ្ស៊ីបដើរតួជាអន្តរការីស្វែងរកកិច្ចព្រមព្រៀងដោះដូរអ្នកទោសរវាងប្រទេសអ៊ីស្រាអែល និងចលនាហាម៉ាស់។ ព័ត៌មាននេះបានធ្លាក់មក ខណៈដែលអ៊ីស្រាអែលទើបបានភ្ជាប់ទំនាក់ទំនងប្រក្រតីជាមួយប្រទេសបារ៉ែនក្រោមការជួយជ្រោមជ្រែងពីសហរដ្ឋអាមេរិក។ គួររម្លឹកថា ហាម៉ាស់ជាចលនាប៉ាឡេស្ទីនជ្រុលនិយមដែលបានធ្វើសង្រ្គាមទល់នឹងអ៊ីស្រាអែលចំនួន ៣ដងគិតតាំងពីឆ្នាំ ២០០៨។ តែក្រោមអន្តរការីរបស់អង្គការសហប្រជាជាតិ ប្រទេសកាតា និងប្រទេសអេហ្ស៊ីប ភាគីជម្លោះទាំងពីរបានផ្អាកឈប់បាញ់តាំងពី ១ឆ្នាំកន្លងទៅ។
ចុះផ្សាយនៅថ្ងៃ៖
ស្តាប់ - ០២:៣៣
ព័ត៌មានមួយនេះត្រូវបានទម្លាយដោយមន្រ្តីចលនាហាម៉ាស់ម្នាក់មិនបញ្ចេញឈ្មោះដែលថា គណៈប្រតិភូអេហ្ស៊ីបដឹកនាំដោយឧត្តមសេនីយអាម៉េដ អាប់ឌែល ខាលីគបានទៅដល់ដែនដីប៉ាឡេស្ទីនក្នុងតំបន់ហ្កាហ្សាក្នុងថ្ងៃព្រហស្បតិ៍ ទី១០ កញ្ញាដើម្បីជួបសន្ទនាជាមួយថ្នាក់ដឹកនាំនៃចលនាហាម៉ាស់។ បន្ទាប់មក ឧត្តមសេនីយអេហ្ស៊ីបរូបនេះដដែលបានធ្វើដំណើរទៅកាន់ទឹកដីអ៊ីស្រាអែលដើម្បីជួបសន្ទនាជាមួយថ្នាក់ដឹកនាំអ៊ីស្រាអែល មុននឹងត្រឡប់ទៅកាន់តំបន់ហ្កាហ្សាជាថ្មី រួចទៅកាន់ប្រទេសអេហ្ស៊ីបក្នុងថ្ងៃសុក្រ ទី១១ កញ្ញា។ គេមិនដឹងថា តើឧត្តមសេនីយអេហ្ស៊ីបបាននិយាយអ្វីជាមួយថ្នាក់ដឹកនាំចលនាហាម៉ាស់ និងថ្នាក់ដឹកនាំអ៊ីស្រាអែលទេ។
តែបើតាមមន្រ្តីចលនាហាម៉ាស់មិនបញ្ចេញឈ្មោះ ចលនាហាម៉ាស់បានទាមទារឲ្យអ៊ីស្រាអែលដោះលែងកូនក្មេង ស្រ្តី និងអ្នកជំងឺ ព្រមទាំងអ្នកទោសប៉ាឡេស្ទីនដែលអ៊ីស្រាអែលបានដោះលែងក្នុងឆ្នាំ ២០១១ មុននឹងត្រូវបានអ៊ីស្រាអែលចាប់ខ្លួនជាថ្មី។ ជាថ្នូរត្រឡប់វិញ ចលនាហាម៉ាស់នឹងផ្តល់ព័ត៌មានទាក់ទងនឹងអ្នកទោសអ៊ីស្រាអែល។ មន្រ្តីចលនាហាម៉ាស់មិនបញ្ចេញឈ្មោះ រូបនេះដដែលបានបញ្ជាក់ថា គណៈប្រតិភូអេហ្ស៊ីបកំពុងស្វែងរកកិច្ចព្រមព្រៀងដោះដូរមួយដោយសង្ឃឹមទទួលបាននាពេលឆាប់ៗខាងមុខ។
សូមជម្រាបថា ចលនាហាម៉ាស់ដែលបានគ្រប់គ្រងតំបន់ហ្កាហ្សាតាំងពីឆ្នាំ ២០០៧ កំពុងឃុំទាហានអ៊ីស្រាអែល ២នាក់ដែលបានលួចចូលតំបន់ហ្កាហ្សាក្នុងឆ្នាំ ២០១៤ និង ២០១៥ រួមទាំងសពទាហានអ៊ីស្រាអែលចំនួន ២នាក់ដែលបានស្លាប់នៅក្នុងសង្រ្គាមចុងក្រោយទល់នឹងអ៊ីស្រាអែលក្នុងឆ្នាំ ២០១៤។ ក្រៅពីព្យាយាមស្វែងរកកិច្ចព្រមព្រៀងដោះដូរអ្នកទោសរវាងចលនាហាម៉ាស់ និងអ៊ីស្រាអែល អេហ្ស៊ីបក៏កំពុងប្រឹងប្រែងចរចាឲ្យលើកការបិទខ្ទប់របស់អ៊ីស្រាអែលទៅលើតំបន់ហ្កាហ្សា រួមទាំងព្យាយាមផ្សះផ្សារវាងភាគីប៉ាឡេស្ទីននៅតំបន់ហ្កាហ្សា និងនៅតំបន់ស៊ីហ្សកដានី។
គួររម្លឹកថាគិតតាំងពីឆ្នាំ ២០០៨ ចលនាហាម៉ាស់ និងអ៊ីស្រាអែលបានធ្វើសង្រ្គាមនឹងគ្នាចំនួន ៣ដង។ គឺទើបតែ ១ឆ្នាំកន្លងទៅដែលភាគីទាំងពីរបានព្រមព្រៀងលើបទឈប់បាញ់មួយក្រោមការជួយអន្តរាគមន៍អង្គការសហប្រជាជាតិ ប្រទេសកាតារ និងប្រទេសអេហ្ស៊ីប។ តែជាបទឈប់បាញ់ផុយស្រួយ ព្រោះមិនសូវបានគោរពត្រឹមត្រូវ។ គេត្រូវរង់ចាំដល់ដំណាច់ខែសីហាកន្លងទៅថ្មីៗនេះទើបភាគីទាំងពីរបានប្រកាសចេញនូវកិច្ចព្រមព្រៀងមួយដើម្បីបិទបញ្ចប់ការបាញ់ទៅវិញ ទៅមកសឹងតែរាល់ថ្ងៃនៅក្នុងតំបន់ហ្កាហ្សា និងនៅជុំវិញតំបន់ហ្កាហ្សា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ