នុយក្លេអ៊ែរ៖អ៊ីរ៉ង់បញ្ជាក់ពីការត្រៀមខ្លួនគោរពកិច្ចព្រមព្រៀងឆ្នាំ ២០១៥ ឲ្យបានពេញលេញ
នៅក្នុងប្រទេសអ៊ីរ៉ង់ ប្រធានាធិបតីលោកហាសាន រ៉ូហានីបានថ្លែងក្នុងថ្ងៃពុធ ទី៩ ធ្នូថា អ៊ីរ៉ង់បានត្រៀមខ្លួនរួចហើយដើម្បីគោរពឲ្យបានពេញលេញនូវកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥។ គួររម្លឹកថា កិច្ចព្រមព្រៀងមួយនេះត្រូវបានអ៊ីរ៉ង់ចុះហត្ថលេខាក្នុងឆ្នាំ ២០១៥ ជាមួយសមាជិកអចិន្រ្តៃយ៍ទាំង ៥ប្រទេសនៃក្រុមប្រឹក្សាសន្តិសុខអង្គការសហប្រជាជាតិបូកនឹងប្រទេសអាល្លឺម៉ង់។ តែឆ្នាំ ២០១៨ ប្រធានាធិបតីអាមេរិកលោកដូណាល់ ត្រាំបានដកសហរដ្ឋអាមេរិកចេញពីកិច្ចព្រមព្រៀង និងដាក់ទ័ណ្ឌកម្មសេដ្ឋកិច្ចជាថ្មីលើអ៊ីរ៉ង់។ អ៊ីរ៉ង់បានសងសឹកវិញដោយចាប់ផ្តើមមិនគោរពកតាព្វកិច្ចមួយចំនួនដែលមានចែងនៅក្នុងកិច្ចព្រមព្រៀង។
ចុះផ្សាយនៅថ្ងៃ៖
ស្តាប់ - ០២:២១
គឺនៅក្នុងសង្កថាតាមទូរទស្សន៍នាកិច្ចប្រជុំគណៈរដ្ឋមន្រ្តីដែលប្រធានាធិបតីអ៊ីរ៉ង់លោករ៉ូហានីបានថ្លែងថា នៅពេលដែលភាគីហត្ថលេខីផ្សេងទៀតត្រឡប់ទៅគោរពឲ្យបានត្រឹមត្រូវនូវកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ អ៊ីរ៉ង់ក៏នឹងត្រឡប់ទៅគោរពឲ្យបានត្រឹមត្រូវភ្លាមវិញដែរ។ « ខ្ញុំធ្លាប់បានថ្លែងរួចហើយថា រឿងត្រឡប់ទៅគោរពកិច្ចព្រមព្រៀងឲ្យបានពេញលេញឡើងវិញមិនអាស្រ័យលើពេលវេលាទេ តែវាអាស្រ័យលើឆន្ទៈ » នេះជាការបញ្ជាក់របស់លោករ៉ូហានី។ ទោះបីជាលោករ៉ូហានីមិនបាននិយាយចំឈ្មោះប្រទេសហត្ថលេខីណាមួយក៏ដោយក៏គេដឹងថា លោកចង់សំដៅខ្លាំងលើសហរដ្ឋអាមេរិកដែលលោកដូណាល់ ត្រាំបានដកសហរដ្ឋអាមេរិកចេញពីកិច្ចព្រមព្រៀងកាលពីឆ្នាំ ២០១៨។
បន្ទាប់មក គឺប្រទេសបារាំង អង់គ្លេស និងអាល្លឺម៉ង់ដែលបានធ្វើព្រងើយកន្តើយនៅចំពោះមុខទង្វើរបស់លោកដូណាល់ ត្រាំ។ គួរបញ្ជាក់ថា ក្រោយពីបានដកសហរដ្ឋអាមេរិកចេញពីកិច្ចព្រមព្រៀង លោកត្រាំក៏បានដាក់ទណ្ឌកម្មសេដ្ឋកិច្ចជាថ្មីលើអ៊ីរ៉ង់។ ជាការសងសឹកវិញចាប់ពីខែឧសភា ឆ្នាំ ២០១៩ អ៊ីរ៉ង់បានផ្តើមមិនគោរពតាមកិច្ចសន្យាមួយចំនួនដែលមានចែងនៅក្នុងកិច្ចព្រមព្រៀង។ ការបង្ហាញជំហរអ៊ីរ៉ង់របស់លោករ៉ូហានីពេលនេះបានធ្វើឡើង ខណៈដែលប្រធានាធិបតីអាមេរិកជាប់ឆ្នោតថ្មីលោកចូ បៃដិនបានបញ្ជាក់ពីការចង់នាំសហរដ្ឋអាមេរិកត្រឡប់ចូលក្នុងកិច្ចព្រមព្រៀងនុយក្លេអ៊ែរអ៊ីរ៉ង់ឡើងវិញ។
ម្យ៉ាងទៀត លោករ៉ូហានីក៏ចង់បញ្ជូនសារទៅកាន់ក្រុមអ្នកអភិរក្សនិយមអ៊ីរ៉ង់ដែលបានឈ្នះឆ្នោតសភានាការបោះឆ្នោតកាលពីខែកុម្ភៈកន្លងទៅ។ ក្នុងថ្ងៃទី២ ធ្នូ សភាអ៊ីរ៉ង់បានអនុម័តច្បាប់មួយកុំឲ្យរដ្ឋាភិបាលបន្ទន់ជំហរនៅចំពោះមុខគំនាបរបស់សហគមន៍អន្តរជាតិក្នុងរឿងនុយក្លេអ៊ែរ។ តែលោករ៉ូហានីបានទម្លាយឲ្យដឹងជាថ្មីថា លោកនឹងមិនប្រកាសដាក់ឲ្យប្រើប្រាស់ច្បាប់នោះទេ ព្រោះច្បាប់នោះអាចនឹងរុញរឿងនុយក្លេអ៊ែរអ៊ីរ៉ង់ទៅកាន់ក្រុមប្រឹក្សាសន្តិសុខជាថ្មី។ តាមលោករ៉ូហានី ភាគីអ៊ីរ៉ង់គ្រប់និន្នាការនយោបាយត្រូវនិយាយសំឡេងតែមួយនៅក្នុងរឿងនុយក្លេអ៊ែរ។ ដោយឡែកក្នុងថ្ងៃពុធ ទី៩ ធ្នូដែរ រុស្ស៊ីដែលជាប្រទេសហត្ថលេខាមួយនៃកិច្ចព្រមព្រៀងបានអំពាវនាវកុំឲ្យអ៊ីរ៉ង់ធ្លាក់ក្នុងអន្ទាក់អ្នកដទៃ និងត្រូវបង្ហាញការទទួលខុសត្រូវអតិបរមានៅក្នុងសំណុំរឿងនុយក្លេអ៊ែរនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ