អាមេរិកវាយប្រហារលើកងជីវពលដែលគាំទ្រដោយប្រទេសអ៊ីរ៉ង់នៅក្នុងប្រទេសអ៊ីរ៉ាក់ និងស៊ីរី
នៅថ្ងៃអាទិត្យ ទី២៧ មិថុនា អាមេរិកបានវាយប្រហារលើក្រុមសកម្មប្រយុទ្ធដែលគាំទ្រដោយប្រទេសអ៊ីរ៉ង់នៅតាមបណ្តោយព្រំដែនរវាងប្រទេសស៊ីរី និងអ៊ីរ៉ាក់ដោយបានបណ្តាលឲ្យមនុស្សស្លាប់យ៉ាងតិច ៥នាក់។ តាមអង្គការក្រៅរដ្ឋាភិបាល ប្រតិបត្តិការសឹកនេះជាការសងសឹកទល់នឹងការវាយប្រហារដោយដ្រូនជាច្រើនដងប្រឆាំងនឹងផលប្រយោជន៍អាមេរិកក្នុងទឹកដីអ៊ីរ៉ាក់។ អ្នកនាំពាក្យក្រសួងការពារជាតិអាមេរិកលោកចន ខឺប៊ីបានបញ្ជាក់នៅក្នុងសេចក្តីប្រកាសព័ត៌មានថា ការវាយប្រហាររបស់អាមេរិកនេះបានធ្វើឡើងតាមការបញ្ជារបស់លោកចូ បៃដិន។
ចុះផ្សាយនៅថ្ងៃ៖
ស្តាប់
គឺជាប្រតិបត្តិការផ្លូវអាកាសដោយផ្តោតលើផ្ទាំងស៊ីបចំនួនពីររបស់ក្រុមសកម្មប្រយុទ្ធដែលគាំទ្រដោយអ៊ីរ៉ង់នៅតាមព្រំដែនរវាងស៊ីរី និងអ៊ីរ៉ាក់។ ផ្ទាំងស៊ីបទី១ គឺមជ្ឈមណ្ឌលប្រតិបត្តិការ និងផ្ទាំងស៊ីបទី២ គឺឃ្លាំងស្តុកអាវុធ។ តាមក្រសួងការពារជាតិអាមេរិក ឬមន្ទីរបញ្ចកោណ មានមជ្ឈមណ្ឌលប្រតិបត្តិការ និងឃ្លាំងស្តុកអាវុធចំនួនពីរកន្លែងនៅក្នុងទឹកដីស៊ីរី និងមួយកន្លែងនៅក្នុងទឹកដីអ៊ីរ៉ាក់។ តាមអង្គការសង្កេតការណ៍សិទ្ធិមនុស្សស៊ីរី ប្រតិបត្តិការផ្លូវអាកាសរបស់កងទ័ពអាមេរិកនេះបានសម្លាប់ក្រុមសកម្មប្រយុទ្ធយ៉ាងតិច ៥នាក់ និងរបួសជាច្រើននាក់។ គួរបញ្ជាក់ថាក្នុងរយៈពេលប៉ុន្មានខែចុងក្រោយនេះ ផលប្រយោជន៍អាមេរិកក្នុងប្រទេសអ៊ីរ៉ាក់បានក្លាយជាផ្ទាំងស៊ីបនៃការវាយប្រហារច្រើនដង។
បើគិតតាំងពីដើមឆ្នាំ ២០២១ មានការវាយប្រហារលើផលប្រយោជន៍អាមេរិកប្រមាណជា ៤០ដង រួមទាំងលើទីតាំងដែលប្រើប្រាស់ដោយ CIA និងកម្លាំងពិសេសទៀតផង។ ការវាយប្រហារទាំងនេះត្រូវបានរដ្ឋបាលអាមេរិកទម្លាក់ការទទួលខុសត្រូវលើក្រុមសកម្មប្រយុទ្ធដែលគាំទ្រដោយអ៊ីរ៉ង់។ អ្នកនាំពាក្យមន្ទីរបញ្ចកោណលោកចន ខឺប៊ីបានបញ្ជាក់ថា ក្រុមសកម្មប្រយុទ្ធបានប្រើមជ្ឈមណ្ឌលប្រតិបត្តិការ និងឃ្លាំងស្តុកអាវុធនៅតាមព្រំដែនរវាងអ៊ីរ៉ាក់ និងស៊ីរីដើម្បីវាយប្រហារលើផលប្រយោជន៍អាមេរិកក្នុងទឹកដីអ៊ីរ៉ាក់។ បច្ចុប្បន្ន មានទ័ពអាមេរិកជិត ២ ៥០០នាក់កំពុងឈរជើងនៅអ៊ីរ៉ាក់ក្នុងក្របខណ្ឌនៃកម្លាំងសម្ព័ន្ធមិត្តដើម្បីប្រយុទ្ធប្រឆាំងនឹងពួកជីហាតអង្គការរដ្ឋអ៊ីស្លាម។
ទ័ពអាមេរិក រួមទាំងទ័ពសម្ព័ន្ធមិត្តនៅអ៊ីរ៉ាក់កំពុងឈឺក្បាលនឹងការវាយប្រហារដោយប្រើដ្រូនរបស់ក្រុមសកម្មប្រយុទ្ធគាំទ្រដោយអ៊ីរ៉ង់ ព្រោះថា ដ្រូនអាចគេចផុតពីប្រព័ន្ធការពារដែនអាកាសដែលទ័ពអាមេរិកបានដាក់តាំង។ តាមរដ្ឋអំណាចគួដឌីស្ថាន ដ្រូនមួយផ្ទុកពេញដោយ TNT បានផ្ទុះធ្លាក់លើបញ្ជាការដ្ឋានរបស់កម្លាំងសម្ព័ន្ធមិត្តនៅអាកាសយានដ្ឋាន Erbil ស្ថិតប៉ែកខាងជើងអ៊ីរ៉ាក់។ បន្ទាប់មកក្នុងខែឧសភា ដ្រូនមួយទៀតបានផ្ទុះធ្លាក់លើមូលដ្ឋានទ័ពអ៊ីរ៉ាក់ដែលមានវត្តមានទ័ពអាមេរិក។ បន្ទាប់មកទៀតនាដើមខែមិថុនានេះ មានដ្រូនចំនួន ៣ បានសំដៅលើអាកាសយានដ្ឋានក្នុងក្រុងបាកដាដដែលមានវត្តមានទ័ពអាមេរិក។ តាមសេតវិមាន លោកចូ បៃដិនធ្វើសេចក្តីថ្លែងការណ៍មួយក្នុងថ្ងៃចន្ទ ទី២៨ មិថុនាស្តីពីការវាយប្រហាររបស់អាមេរិកលើទីតាំងរបស់ក្រុមសកម្មប្រយុទ្ធគាំទ្រដោយអ៊ីរ៉ង់នៅក្នុងប្រទេសស៊ីរី និងអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ