អាមេរិកកាត់បន្ថយចំនួនប្រព័ន្ធការពារដែនអាកាសនៅតំបន់ដើមបូព៌ា
២ឆ្នាំក្រោយពង្រឹងប្រព័ន្ធការពារដែនអាកាសនៅតំបន់ដើមបូព៌ា ក្នុងបរិបទតានតឹងជាមួយអ៊ីរ៉ង់ អាមេរិកបានសម្រេចដកបណ្តើរៗ ប្រព័ន្ធខែលមីស៊ីលរបស់ខ្លួន។ នៅថ្ងៃសុក្រ ទី ១៨ មិថុនា អ្នកនាំពាក្យរបស់មន្ទីរបញ្ចកោនបានបញ្ជាក់ការចុះផ្សាយរបស់កាសែតអាមេរិក Wall Street Journal ដែលថា អាមេរិកកំពុងកាត់បន្ថយ ចំនួន ប្រព័ន្ធការពារដែនអាកាសនៅតំបន់ដើមបូព៌ា។ ហេតុអ្វីអាមេរិកដកប្រព័ន្ធខែលមីស៊ីល ចេញពីតំបន់ដើមបូព៌ា នៅពេលនេះ?
ចុះផ្សាយនៅថ្ងៃ៖
ស្តាប់ - ០២:៥៦
តាមការចុះផ្សាយរបស់កាសែតអាមេរិកាំង Wall Street Journal ចាប់តាំងពីខែមិថុនានេះ ក្រសួងការពារជាតិអាមេរិកបានចាប់ផ្តើមដក ប្រព័ន្ធខែលមីស៊ីលចំនួន៨គ្រឿង ពីក្នុងប្រទេស អ៊ីរ៉ាក់ កូវែត ហ្សកដានី និងអារ៉ាប៊ីសាអូឌីត។
អ្នកនាំពាក្យរបស់មន្ទីរបញ្ចកោន លោកស្រី មេបញ្ជាការ Jessica McNulty បានបញ្ជាក់ព័ត៌មានចុះផ្សាយរបស់កាសែត និងថា រដ្ឋមន្រ្តីការពារជាតិ លោក ឡយដ៍ អូស្ទីន Lloyd Austin បានបញ្ជាឲ្យគេដកចេញ កម្លាំង សមត្ថភាពទ័ព និងជាពិសេស សម្ភារៈការពារដែនអាកាស ចេញពីប្រទេសនៅតំបន់ដើមបូព៌ា។
តាមអ្នកនាំពាក្យរបស់ក្រសួងការពារជាតិអាមេរិក នៅពេលប្រព័ន្ធខែលមីស៊ីលមួយចំនួន ត្រូវដឹកត្រលប់ចូលអាមេរិក សម្រាប់ជួសជុល កែលម្អ ប្រព័ន្ធខែលមីស៊ីលផ្សេងទៀត ត្រូវបង្វែរ បញ្ជូន ទៅកាន់តំបន់ដទៃទៀត។
ភាគីអាមេរិក មិនបានបញ្ជាក់ថា តើគេដកប្រព័ន្ធខែលមីស៊ីល ចេញពីតំបន់ដើមបូព៌ា ដើម្បីយកទៅដាក់នៅ តំបន់ឥណ្ឌូប៉ាស៊ីហ្វិក ជាទីដែលរដ្ឋបាលលោកចូ បៃដិនកំពុងផ្តោតកម្លាំង ដើម្បី ប្រជែងជាមួយចិន ដែរឬយ៉ាងណានោះទេ។
ប្រព័ន្ធខែលមីស៊ីល នីមួយៗ ត្រូវការវត្តមានទ័ពអាមេរិកជាច្រើនរយនាក់ សម្រាប់ដាក់ឲ្យដំណើរការ។ ការដកប្រព័ន្ធខែលមីស៊ីលអាមេរិកយ៉ាងដូច្នេះ នឹងអាចធ្វើឲ្យគេជឿថា អាមេរិកនឹងសម្រេចដកកងទ័ពរបស់ខ្លួនបន្ថែមទៀតចេញពីតំបន់ដើមបូព៌ា នៅខណៈពេលដែលអាមេរិកកំពុងត្រៀមដកទ័ពចេញឲ្យអស់ពីអាហ្វហ្កានីស្ថាន នៅខែកញ្ញាខាងមុខ។ អ្នកនាំពាក្យរបស់ក្រសួងការពារជាតិអាមេរិក បានលម្អិតថា ទោះអាមេរិក ដកប្រព័ន្ធខែលមីស៊ីល ប៉ុន្តែ អាមេរិកនៅតែបន្តរក្សាកងទ័ព ហើយនិងនៅតែមានសមត្ថភាពអាចអន្តរាគមន៍បានឆាប់រហ័ស ក្នុងកាលៈទេសៈ មានការគំរាមកំហែងណាមួយ។
អាមេរិកក្រោមអាណត្តិលោកដូណាល់ ត្រាំ បានបញ្ជូនប្រព័ន្ធការពារដែនអាកាសជាច្រើនគ្រឿងទៅកាន់ប្រទេសអ៊ីរ៉ាក់ និងអារ៉ាប៊ី សាអូឌីត នៅឆ្នាំ ២០១៩ និងឆ្នាំ ២០២០ នៅបន្ទាប់អ៊ីរ៉ង់ បាញ់សំដៅមូលដ្ឋានទ័ពអាមេរិក នៅអ៊ីរ៉ាក់ និងនៅបន្ទាប់ពីយន្តហោះដ្រូនអ៊ីរ៉ង់បាញ់បំផ្លាញរោងចក្រចម្រាញ់ប្រេង នៅទឹកដីអារ៉ាប៊ី សាអូឌីត។
សម្រាប់ក្រសែភ្នែក អាមេរិក អ៊ីរ៉ង់នៅតែជាប្រភពគំរាមកំហែងសន្តិសុខ នៅតំបន់ដើមបូព៌ា ប៉ុន្តែ អាមេរិករបស់លោកចូ បៃដិនចង់កាត់បន្ថយ ភាពតានតឹង ជាមួយអ៊ីរ៉ង់ តាមរយៈ ការចង់វិលត្រលប់ក្នុងកិច្ចព្រមព្រៀងនុយក្លេអ៊ែរ អ៊ីរ៉ង់។ ការដកប្រព័ន្ធខែលមីស៊ីលចេញពីតំបន់ដើមបូព៌ា លើកនេះ ក៏អាចជាចេតនាមួយរបស់រដ្ឋបាលអាមេរិក ដើម្បីបន្ទន់ចិត្តអ៊ីរ៉ង់ដែរ។
ប៉ុន្តែ ជាផ្លូវការ អាមេរិកបានសម្រេចដកប្រព័ន្ធខែលមីស៊ីលពីអ៊ីរ៉ាក់ និងអារ៉ាប៊ី សាអូឌីត ក៏ព្រោះតែក្នុងហេតុផលថា ប្រទេសទាំងនេះ មានសមត្ថភាព យោធា ដើម្បី ការពារខ្លួនឯង ដោយមិនចាំបាច់ ត្រូវការអាមេរិកនោះទេ ជាពិសេស អារ៉ាប៊ី សាអូឌីតដែលបានចំណាយថវិកា សន្ធឹកសន្ធាប់សម្រាប់បំពាក់សព្វាវុធ ឲ្យកងទ័ពរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ