កូវ៉ែតបណ្តេញឯកអគ្គរដ្ឋទូតលីបង់ ក្រោយរដ្ឋមន្ត្រីលីបង់ម្នាក់រិះគន់សង្គ្រាមនៅយេម៉ែន
ដូចគ្នាទៅនឹងអារ៉ាប៊ីសាអូឌីត និងបារ៉ែន ប្រទេសកូវ៉ែតនៅថ្ងៃសៅរ៍ ទី៣០ តុលា បានសម្រេចបណ្តេញឯកអគ្គរដ្ឋទូតលីបង់ចេញពីប្រទេស ដោយទុកពេលឲ្យ ៤៨ម៉ោង ព្រោះតែខឹងសម្បាចំពោះការអត្ថាធិប្បាយរបស់រដ្ឋមន្ត្រីលីបង់ម្នាក់ទាក់ទងនឹងសង្រ្គាមនៅយេម៉ែន។ ទន្ទឹមគ្នានេះ កូវ៉ែតក៏បានកោះហៅឯកអគ្គរដ្ឋទូតរបស់ខ្លួនពីទីក្រុងបេរូតឲ្យវិលចូលស្រុកវិញផងដែរ។
ចុះផ្សាយនៅថ្ងៃ៖
ស្តាប់ - ០២:១២
ជម្លោះការទូតរវាងរដ្ឋឈូងសមុទ្រអារ៉ាប់និងលីបង់ បានកើនឡើងខ្លាំងបន្ទាប់ពីបទសម្ភាសន៍មួយជាមួយរដ្ឋមន្ត្រីក្រសួងព័ត៌មានលីបង់លោក George Kordahi ត្រូវបានចាក់ផ្សាយ។ នៅក្នុងបទសម្ភាសន៍ដែលចាក់ផ្សាយកាលពីថ្ងៃចន្ទដើមសប្តាហ៍នេះ លោក Kordahi ដែលជាអ្នករិះគន់សង្គ្រាមនៅយេម៉ែនបានពណ៌នាសង្រ្គាមនៅទីនោះថាជាការឈ្លានពានរបស់អារ៉ាប៊ីសាអូឌីត និងអារ៉ាប់រួម។
សង្រ្គាមរយៈពេល ៧ឆ្នាំនៅយេម៉ែន គឺជារឿងមិនសមហេតុផលឡើយ ហើយវាដល់វេលាដែលត្រូវបញ្ចប់សង្គ្រាមឥតប្រយោជន៍នេះហើយ។ នេះគឺជាការលើកឡើងរបស់រដ្ឋមន្ត្រីក្រសួងព័ត៌មានលីបង់ ដោយបន្ថែមថាក្រុមឧទ្ទាមហ៊ូទីយេម៉ែនកំពុងការពារខ្លួន... ប្រឆាំងនឹងការឈ្លានពានពីខាងក្រៅ ហើយនៅយេម៉ែនមានផ្ទះសម្បែង ភូមិឋាន ពិធីបុណ្យសព និងពិធីមង្គលការជាច្រើនរងការទម្លាក់គ្រាប់បែកពីក្រុមចម្រុះដឹកមុខដោយអារ៉ាប៊ីសាអូឌីត។
ក្រសួងការបរទេសកូវ៉ែតបាននិយាយថាការបណ្តេញឯកអគ្គរដ្ឋទូតលីបង់និងការកោះហៅមន្ត្រីទូតខ្លួនមកវិញគឺដោយផ្អែកលើការលើកឡើងដែលមិនអាចទទួលយករបស់មន្ត្រីលីបង់ដែលប្រឆាំងនឹងរ៉ាប៊ីសាអូឌីត និងប្រទេសដទៃទៀតនៃបណ្តារដ្ឋក្រុមប្រឹក្សាសហប្រតិបត្តិការឈូងសមុទ្រពែក្ស។
អារ៉ាប៊ីសាអូឌីតវិញ ក្រៅពីបណ្តេញឯកអគ្គរដ្ឋទូតលីបង់ និងកោះហៅឯកអគ្គរដ្ឋទូតខ្លួនឲ្យវិលចូលស្រុកវិញ រដ្ឋអារ៉ាប់មួយនេះក៏បានហាមឃាត់រាល់ការនាំចូលពីលីបង់ដែរ។ ដើម្បីដោះស្រាយវិបត្តិជាមួយក្រុមប្រទេសអ្នកមានអារ៉ាប់ រដ្ឋមន្ត្រីការបរទេសលីបង់ Abdallah Bouhabib បានសម្រេចលុបចោលដំណើររបស់លោកទៅកាន់ទីក្រុង Glasgow ដែលជាកន្លែងលោកត្រូវទៅចូលរួមជំនួបកំពូលអាកាសធាតុ COP26 របស់អង្គការសហប្រជាជាតិ។
ដោយឡែក កាលពីយប់ថ្ងៃសុក្រ ទី២៨ តុលា នាយករដ្ឋមន្ត្រី និងប្រធានាធិបតីលីបង់បានជួបពិភាក្សាគ្នាអំពីការសម្រេចចិត្តរបស់អារ៉ាប៊ីសាអូឌីត ហើយបានអំពាវនាវឲ្យរដ្ឋមន្ត្រីក្រសួងព័ត៌មានលោក Kordahi លាលែងពីតំណែងដើម្បីបន្ធូរបន្ថយភាពតានតឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ