យេម៉ែន៖មានមនុស្សស្លាប់យ៉ាងតិច ៧០នាក់នៅក្នុងការវាយប្រហារលើពន្ធនាគារមួយក្នុងតំបន់សាដា
នៅក្នុងប្រទេសយេម៉ែន មានមនុស្សស្លាប់យ៉ាងតិច ៧០នាក់នៅក្នុងការវាយប្រហារតាមផ្លូវអាកាសលើពន្ធនាគារមួយក្នុងតំបន់សាដាស្ថិតប៉ែកខាងជើងប្រទេសនាថ្ងៃសុក្រ ទី២១ មករា។ ការវាយប្រហារនេះត្រូវបានគេទម្លាក់ការទទួលខុសត្រូវលើកម្លាំងសម្ព័ន្ធអារ៉ាប់ដែលដឹកនាំដោយប្រទេសអារ៉ាប៊ីសាអូឌីត។ តែអារ៉ាប៊ីសាអូឌីតបានបដិសេធលើរឿងរ៉ាវមួយនេះ។ អង្គការគ្រូពេទ្យគ្មានព្រំដែនបានបរិហារលើការវាយប្រហារដ៏អាក្រក់។ ចំណែកប្រមុខអង្គការសហប្រជាជាតិបានថ្កោលទោសលើការវាយប្រហារ និងទាមទារឲ្យមានការស៊ើបអង្កេត។ អ្វីជាការកត់សម្គាល់ ការវាយប្រហារពេលនេះបានកើតមានឡើង ក្រោយពីក្រុមឧទ្ទាមហ៊ូទីដែលកំពុងគ្រប់គ្រងតំបន់សាដាបានវាយប្រហារកាលពីដើមសប្តាហ៍លើអេមីរ៉ាតអារ៉ាប់រួមដែលជាប្រទេសស្ថិតក្នុងកម្លាំងសម្ព័ន្ធអារ៉ាប់។ តើនេះជាការសងសឹករបស់កម្លាំងសម្ព័ន្ធអារ៉ាប់លើក្រុមឧទ្ទាមហ៊ូទីនៅយេម៉ែនឬ?
ចុះផ្សាយនៅថ្ងៃ៖
ស្តាប់ - ០១:១៤
« ពិតណាស់ ការវាយប្រហារនេះបានធ្វើឡើងនៅក្នុងបរិបទនៃការសងសឹករបស់កម្លាំងសម្ព័ន្ធអារ៉ាប់ដែលដឹកនាំដោយប្រទេសអារ៉ាប៊ីសាអូឌីត ក្រោយពីមានការវាយប្រហារដោយប្រើដ្រូន និងគ្រាប់មីស៊ីលរបស់ក្រុមឧទ្ទាមហ៊ូទីទៅលើទីក្រុងអាប៊ូដាប៊ីរបស់ប្រទេសអេមីរ៉ាតអារ៉ាប់រួមកាលពីថ្ងៃចន្ទដើមសប្តាហ៍នេះ។
ដូច្នេះគេអាចនិយាយបានថា ការវាយប្រហារពេលនេះជាប្រតិកម្មវាយបកសងសឹកវិញនៅលើគ្រប់មុខព្រួញទាំងអស់ នៅតំបន់សាបា នៅតំបន់ហូដីដា ឬមួយក៏នៅតំបន់សាណា។ កម្មវត្ថុនៃការវាយប្រហារលើគ្រប់មុខព្រួញ គឺដើម្បីធ្វើឲ្យសមត្ថភាពនៃកម្លាំងប្រដាប់អាវុធរបស់ក្រុមឧទ្ទាមហ៊ូទីចុះខ្សោយ។
គេអាចគិតថា ប្រហែលជាមានប្រតិបត្តិការសឹកមួយពិតប្រាកដទៅលើគ្រប់មុខព្រួញកំពុងប្រព្រឹត្តិទៅនៅពេលនេះ នោះបើទោះបីជាគេមានមន្ទិលសង្ស័យលើសមត្ថភាពរបស់កម្លាំងសម្ព័ន្ធអារ៉ាប់ក្នុងការធ្វើសង្រ្គាមនៅយេម៉ែន និងទទួលជ័យជំនះទាំងស្រុងលើក្រុមឧទ្ទាមហ៊ូទីដែលកំពុងសោយរាជ្យនៅក្នុងតំបន់ជាច្រើនរបស់ប្រទេសក៏ដោយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ